લંડન:  બ્રિટન સરકારે દેશમાં ગેરકાયદેસર રીતે વસતા અને કામ કરતા ઇમિગ્રન્ટ્સ વિરુદ્ધ અત્યાર સુધીનું સૌથી મોટું ઓપરેશન શરૂ કર્યું છે. તાજેતરના આંકડાઓ અનુસાર, યુકેમાં ઇમિગ્રેશન એન્ફોર્સમેન્ટ ટીમો દ્વારા પાડવામાં આવતા દરોડામાં ૭૭% અને ધરપકડમાં ૮૩% નો જંગી વધારો થયો છે, જે બ્રિટિશ ઇતિહાસમાં એક નવો રેકોર્ડ છે. સરકારની આ કડક કાર્યવાહીનો ઉદ્દેશ્ય સરહદ નિયંત્રણ પુનઃસ્થાપિત કરવાનો અને ગેરકાયદેસર રોજગાર આપતા નેટવર્કને તોડી પાડવાનો છે.
દરોડાના નિશાના પર કયા ક્ષેત્રો છે?
હોમ ઓફિસના અહેવાલ મુજબ, આ દરોડા મુખ્યત્વે નેઇલ બાર, કાર વોશ સેન્ટરો, વાળંદની દુકાનો અને ટેક-અવે શોપ જેવા સ્થળો પર કરવામાં આવ્યા છે. અધિકારીઓનું માનવું છે કે આ વ્યવસાયોમાં ઘણીવાર ગેરકાયદેસર કામદારોને છુપાવવામાં આવે છે, જે કાયદેસર રીતે કામ કરતા લોકોના રોજગારને નુકસાન પહોંચાડે છે. જુલાઈ ૨૦૨૪ થી ડિસેમ્બર ૨૦૨૫ સુધીમાં કુલ ૧૭,૪૦૦ થી વધુ દરોડા પાડવામાં આવ્યા છે, જેમાં ૧૨,૩૦૦ થી વધુ લોકોની ધરપકડ કરવામાં આવી છે.
ઉત્તરી આયર્લેન્ડમાં પણ ઓપરેશન તેજ
માત્ર લંડન જ નહીં, પરંતુ ઉત્તરી આયર્લેન્ડમાં પણ અમલીકરણની કાર્યવાહીમાં રેકોર્ડ વધારો થયો છે. ૨૦૨૫ માં ત્યાં ૧૮૭ દરોડા પાડવામાં આવ્યા હતા, જે અગાઉના વર્ષ કરતા ૭૬% વધુ છે. આ ઓપરેશન દ્વારા અત્યાર સુધીમાં અંદાજે ૫૦,૦૦૦ લોકોને બ્રિટનમાંથી દેશનિકાલ કરવામાં આવ્યા છે. ગૃહ સચિવ શબાના મહમૂદે કડક શબ્દોમાં ચેતવણી આપી છે કે, "બ્રિટિશ સમુદાયોમાં ગેરકાયદેસર કામ માટે કોઈ સ્થાન નથી અને અમે ગુનેગારોને છુપાવવા માટે કોઈ જગ્યા બાકી રાખીશું નહીં."
ટેકનોલોજી અને ડિજિટલ ID થી સજ્જ થશે સિસ્ટમ
સરકાર હવે આ કાર્યવાહીને વધુ અસરકારક બનાવવા માટે આધુનિક ટેકનોલોજીનો સહારો લઈ રહી છે. ઇમિગ્રેશન અધિકારીઓને હવે 'બોડી-વોર્ન' વિડિયો કેમેરાથી સજ્જ કરવામાં આવ્યા છે, જેથી ધરપકડ સમયે પુરાવા એકત્ર કરી શકાય. આ ઉપરાંત, ભવિષ્યમાં નોકરીદાતાઓ માટે ફરજિયાત 'ડિજિટલ ID' રજૂ કરવાની પણ યોજના છે. આનાથી ગિગ વર્કર્સ અને કોન્ટ્રાક્ટ કામદારોના 'રાઇટ-ટુ-વર્ક' ચેક વધુ સરળ અને સચોટ બનશે, જેનાથી ગેરકાયદેસર રોજગારની તકો નહિવત થઈ જશે.