નવી દિલ્હી:દેશ જ્યારે તેના ૭૭મા પ્રજાસત્તાક દિવસની ઉજવણીની તૈયારીઓ કરી રહ્યો છે, ત્યારે સામાન્ય નાગરિકો માટે એક મોટા અને આનંદના સમાચાર આવ્યા છે. ૨૬ જાન્યુઆરીની મુખ્ય પરેડ પહેલાં યોજાતું ‘ફુલ ડ્રેસ રિહર્સલ’ હવે તમે બિલકુલ મફતમાં જોઈ શકશો. સંરક્ષણ મંત્રાલય દ્વારા સામાન્ય જનતાને ભારતની લશ્કરી તાકાત અને સાંસ્કૃતિક વિવિધતાનો આ નજારો નજીકથી જોવાની તક આપવા માટે મફત પાસ આપવાની જાહેરાત કરવામાં આવી છે.
પ્રજાસત્તાક દિવસની પરેડનું ફુલ ડ્રેસ રિહર્સલ ૨૩ જાન્યુઆરી, ૨૦૨૬ના રોજ નવી દિલ્હીના ઐતિહાસિક ‘કર્તવ્ય પથ’ પર યોજાશે. આ દિવસે પરેડ તેના પૂરા શાન અને શૌકત સાથે નીકળશે, જે ૨૬ જાન્યુઆરીના મુખ્ય કાર્યક્રમ જેવી જ ભવ્ય હશે. આ કાર્યક્રમમાં ભાગ લેવા માંગતા લોકો માટે ઓનલાઈન પાસ બુકિંગની સુવિધા ઉપલબ્ધ કરાવવામાં આવી છે.
 જો તમે આ ઐતિહાસિક ક્ષણના સાક્ષી બનવા માંગતા હોવ, તો ૧૫ અને ૧૬ જાન્યુઆરીની તારીખ ડાયરીમાં નોંધી લેજો. ૧૫મી જાન્યુઆરીએ સવારે ૯ વાગ્યાથી પાસનું બુકિંગ શરૂ થઈ જશે. નોંધનીય છે કે દરરોજ માટે પાસનો ચોક્કસ ક્વોટા નક્કી કરવામાં આવ્યો હોય છે, તેથી ‘વહેલા તે પહેલા’ના ધોરણે બુકિંગ કરવું હિતાવહ છે. ક્વોટા પૂર્ણ થતા જ લિંક બંધ થઈ જશે.
 મફત પાસ મેળવવા માટે તમારે સંરક્ષણ મંત્રાલયના અધિકૃત પોર્ટલ www.aamantran.mod.gov.in પર જવાનું રહેશે. આ ઉપરાંત, તમે ‘Aamantran’ નામની મોબાઈલ એપ ડાઉનલોડ કરીને પણ નોંધણી કરાવી શકો છો. બુકિંગ વખતે તમારી પાસે આધાર કાર્ડ, વોટર આઈડી અથવા પાસપોર્ટ જેવા ઓળખ પત્રો હોવા અનિવાર્ય છે. રિહર્સલના દિવસે આ પાસ અને અસલ આઈડી પ્રૂફ સાથે રાખવું જરૂરી છે, કારણ કે સુરક્ષાના કારણોસર કડક તપાસ કરવામાં આવશે