મુંબઈ, તા. ૧૫ : મહારાષ્ટ્રના રાજકીય ઈતિહાસમાં આજે સૌથી મોટો દિવસ છે. એશિયાની સૌથી ધનિક મ્યુનિસિપલ કોર્પોરેશન ગણાતી બૃહન્મુંબઈ મ્યુનિસિપલ કોર્પોરેશન (BMC) સહિત રાજ્યની ૨૯ મહાનગરપાલિકાઓ માટે આજે સવારથી જ ઉત્સાહભેર મતદાન શરૂ થઈ ગયું છે. આ ચૂંટણીને મહારાષ્ટ્રની આગામી રાજકીય દિશા નક્કી કરનારી 'સેમીફાઈનલ' તરીકે જોવામાં આવી રહી છે. સવારના પ્રારંભિક કલાકોમાં મતદારોની પાંખી હાજરી બાદ ધીમે-ધીમે મતદાન મથકો પર લાંબી કતારો જોવા મળી રહી છે.
મતદાનના આંકડા: ક્યાં કેટલો ઉત્સાહ?
તાજા અહેવાલો મુજબ, રાજ્યની ૨૯ મહાનગરપાલિકાઓમાં સરેરાશ ૧૭.૪૧ ટકા મતદાન નોંધાયું છે. આર્થિક રાજધાની મુંબઈની વાત કરીએ તો, BMC માં અત્યાર સુધી ૧૭.૭૩ ટકા મતદારોએ પોતાના મતાધિકારનો ઉપયોગ કર્યો છે. નવી મુંબઈમાં સૌથી વધુ ઉત્સાહ જોવા મળ્યો છે, જ્યાં ૧૯.૬૮ ટકા મતદાન નોંધાયું છે. બીજી તરફ, નાગપુરમાં શરૂઆતના ચાર કલાકમાં માત્ર ૧૨ ટકા મતદાન થયું છે, જ્યારે થાણેમાં ૧૯ ટકા, પુણેમાં ૧૪.૯૨ ટકા અને નાસિકમાં ૧૬.૦૭ ટકા મતદાન નોંધાયું છે.
આંકડાની નજરે મહા-સંગ્રામ
આ વખતે ૨૯ મ્યુનિસિપલ કોર્પોરેશનોના કુલ ૮૯૩ વોર્ડની ૨,૮૬૯ બેઠકો પર જંગ ખેલાઈ રહ્યો છે. આ બેઠકો પર કબજો જમાવવા માટે કુલ ૧૫,૯૩૧ ઉમેદવારો મેદાનમાં છે. રાજ્યના અંદાજે ૩.૪૮ કરોડ મતદારો પાસે આ ઉમેદવારોના ભાવિનો ફેંસલો કરવાની સત્તા છે. રાજકીય પક્ષો માટે આ પ્રતિષ્ઠાનો જંગ છે, કારણ કે આ પાલિકાઓ પરના કબજાનો અર્થ છે આખા મહારાષ્ટ્રના વહીવટ પર પકડ.
સાંજે ૫:૩૦ વાગ્યા સુધી વોટિંગ, આવતીકાલે ફેંસલો
મતદાનની પ્રક્રિયા આજે સાંજે ૫:૩૦ વાગ્યા સુધી ચાલુ રહેશે. વહીવટીતંત્ર દ્વારા કડક સુરક્ષા બંદોબસ્ત ગોઠવવામાં આવ્યો છે જેથી કોઈ અનિચ્છનીય ઘટના ન બને. તમામની નજર હવે આવતીકાલ પર છે, કારણ કે મતદાન પૂર્ણ થયા બાદ આવતીકાલે સવારથી જ મતગણતરી હાથ ધરવામાં આવશે અને સાંજ સુધીમાં સ્પષ્ટ થઈ જશે કે મહારાષ્ટ્રના શહેરોમાં કોનું શાસન આવશે.