ઝ્યુરિચ: વર્ષ ૨૦૨૬માં યોજાનારા FIFA વર્લ્ડ કપ માટે વિશ્વભરના ફૂટબોલ પ્રેમીઓએ તમામ રેકોર્ડ તોડી નાખ્યા છે. ફૂટબોલની વૈશ્વિક સંસ્થા FIFA એ ખુલાસો કર્યો છે કે આગામી વર્લ્ડ કપ માટે તેને અત્યાર સુધીમાં ૫૦૦ મિલિયન (૫૦ કરોડ) થી વધુ ટિકિટ વિનંતીઓ મળી છે. અમેરિકા, મેક્સિકો અને કેનેડામાં સંયુક્ત રીતે યોજાનારી આ ટુર્નામેન્ટ માટે ચાહકો એટલા આતુર છે કે સપ્લાય કરતા માંગ અનેકગણી વધી ગઈ છે.
આ દેશોના ચાહકો સૌથી આગળ
યજમાન દેશો સિવાય જર્મની, ઇંગ્લેન્ડ, બ્રાઝિલ, સ્પેન, પોર્ટુગલ, આર્જેન્ટિના અને કોલંબિયાના ચાહકોએ ટિકિટ મેળવવા માટે સૌથી વધુ અરજીઓ કરી છે. આ વખતે પ્રથમવાર ૪૮ ટીમો ભાગ લેવાની હોવાથી મેચોની સંખ્યા પણ વધારે છે, તેમ છતાં ટિકિટો માટે પડાપડી થઈ રહી છે. રસપ્રદ વાત એ છે કે, ૧૧ ડિસેમ્બરથી શરૂ થયેલા વેચાણના તબક્કા દરમિયાન ૨૭ જૂને ફ્લોરિડામાં રમાનારી કોલંબિયા વિરુદ્ધ પોર્ટુગલની મેચ માટે સૌથી વધુ વિનંતીઓ મળી છે.
કિંમતોને લઈને ચર્ચાઓ અને સસ્તી ટિકિટની વ્યવસ્થા
FIFA એ ટિકિટના ભાવ ખૂબ જ ઊંચા રાખ્યા હોવાને કારણે શરૂઆતમાં ટીકાઓ થઈ હતી, કારણ કે કેટલીક ટિકિટોની કિંમત $૮,૬૮૦ (આશરે ૭.૨૧ લાખ રૂપિયા) સુધી પહોંચી હતી. જોકે, વિરોધ બાદ FIFA એ જાહેરાત કરી છે કે તેઓ સામાન્ય ચાહકો માટે દરેક મેચમાં $૬૦ (આશરે ૫,૦૦૦ રૂપિયા) ની સસ્તી ટિકિટો પણ ઉપલબ્ધ કરાવશે. આ સસ્તી ટિકિટોની વહેંચણી સંબંધિત રાષ્ટ્રીય ફૂટબોલ ફેડરેશનો દ્વારા કરવામાં આવશે.
નસીબનો ખેલ: ડ્રો દ્વારા થશે ફાળવણી
જે મેચો માટે માંગ વધુ છે, ત્યાં FIFA હવે 'રેન્ડમ સિલેક્શન' એટલે કે લકી ડ્રો દ્વારા ટિકિટોની ફાળવણી કરશે. જેમણે ટિકિટ માટે અરજી કરી છે, તેમને ૫ ફેબ્રુઆરી સુધીમાં ઈમેલ કે મેસેજ દ્વારા જાણ કરવામાં આવશે કે તેમને ટિકિટ મળી છે કે નહીં. ૧૯ જુલાઈએ ન્યૂ જર્સીમાં યોજાનારી ફાઈનલ મેચ માટે પણ રેકોર્ડબ્રેક વિનંતીઓ મળી છે.