નવી દિલ્હી: જો તમે અમેરિકા જવાનું પ્લાનિંગ કરી રહ્યા હોવ અને વિઝા ઇન્ટરવ્યૂની તારીખ માટે લાંબી રાહ જોઈને થાક્યા હોવ, તો તમારા માટે રાહતના સમાચાર છે. યુએસ ડિપાર્ટમેન્ટ ઓફ સ્ટેટ દ્વારા ૧૪ જાન્યુઆરી, ૨૦૨૬ના રોજ જાહેર કરાયેલા નવા આંકડા મુજબ, ભારતના અલગ-અલગ શહેરોમાં વિઝા ઇન્ટરવ્યૂ માટેના વેઇટિંગ પિરિયડમાં મોટો તફાવત જોવા મળ્યો છે. ખાસ કરીને હૈદરાબાદ અને કોલકાતા જેવા શહેરો વિઝિટર વિઝા માટે દિલ્હી-મુંબઈ કરતા વધુ ઝડપી સાબિત થઈ રહ્યા છે.
વિઝિટર વિઝા (B1/B2) માટે ક્યાં કેટલી રાહ?
જો તમે પ્રવાસ કે બિઝનેસ માટે જવા માંગતા હોવ, તો નવી દિલ્હીમાં આગામી એપોઇન્ટમેન્ટ માટે આશરે ૮ મહિના જેટલી લાંબી રાહ જોવી પડી શકે તેમ છે. મુંબઈમાં પણ આ સમયગાળો ૭ મહિના જેટલો લાંબો છે. તેની સરખામણીએ કોલકાતામાં માત્ર ૨.૫ મહિના અને હૈદરાબાદમાં ૪ મહિનામાં એપોઇન્ટમેન્ટ મળી રહી છે. ચેન્નાઈમાં પણ સરેરાશ રાહ જોવાનો સમય માત્ર ૧.૫ મહિનાનો છે, જે મેટ્રો શહેરોમાં સૌથી ઓછો છે.
સ્ટુડન્ટ્સ અને કર્મચારીઓ માટે કયું શહેર શ્રેષ્ઠ?
વિદ્યાર્થી વિઝા (F, M, J) મેળવવા માંગતા અરજદારો માટે નવી દિલ્હી અત્યારે સૌથી બેસ્ટ છે, કારણ કે ત્યાં માત્ર ૧ મહિનામાં સ્લોટ ઉપલબ્ધ છે. હૈદરાબાદ અને કોલકાતામાં ૨ મહિના અને મુંબઈમાં ૩ મહિનાની રાહ જોવી પડશે. તેવી જ રીતે, રોજગાર-આધારિત વિઝા (H, L, O, P, Q) માટે મુંબઈ સૌથી આગળ છે, જ્યાં માત્ર ૧ મહિનામાં ઇન્ટરવ્યૂની તારીખ મળી રહી છે, જ્યારે હૈદરાબાદમાં ૨.૫ મહિનાનો સમય લાગી રહ્યો છે.
ભારતમાં યુએસ વિઝા રાહ જોવાનો સમય (જાન્યુઆરી ૨૦૨૬)
શહેર    વિઝિટર વિઝા (આગામી સ્લોટ)    સ્ટુડન્ટ વિઝા (આગામી સ્લોટ)    રોજગાર વિઝા (આગામી સ્લોટ)
હૈદરાબાદ    ૪ મહિના    ૨ મહિના    ૨.૫ મહિના
કોલકાતા    ૨.૫ મહિના    ૨ મહિના    ઉપલબ્ધ નથી
ચેન્નાઈ    ૧.૫ મહિના (સરેરાશ)    ઉપલબ્ધ નથી    ઉપલબ્ધ નથી
મુંબઈ    ૭ મહિના    ૩ મહિના    ૧ મહિનો
નવી દિલ્હી    ૮ મહિના    ૧ મહિનો    ઉપલબ્ધ નથી
અરજદારો માટે ખાસ સલાહ
યુએસ ડિપાર્ટમેન્ટ ઓફ સ્ટેટના જણાવ્યા અનુસાર, આ ડેટા પાછલા મહિનાની માંગ પર આધારિત છે અને દર મહિને બદલાતો રહે છે. અરજદારોને સલાહ આપવામાં આવે છે કે તેઓ સતત સત્તાવાર વેબસાઇટ ચેક કરતા રહે, કારણ કે ઘણીવાર નવા સ્લોટ અચાનક ખુલતા હોય છે અને તમે અગાઉની તારીખે પણ તમારું ઇન્ટરવ્યૂ રી-શેડ્યૂલ કરી શકો છો.