નવી દિલ્હી: વડાપ્રધાન નરેન્દ્ર મોદીએ આજે નવી દિલ્હીના ઐતિહાસિક સંવિધાન સદન ખાતે કોમનવેલ્થ દેશોના સ્પીકર્સ અને પ્રિસાઇડિંગ ઓફિસર્સની કોન્ફરન્સને સંબોધતા ભારતની લોકશાહી શક્તિનો પરિચય વિશ્વને આપ્યો હતો. પીએમ મોદીએ ભારપૂર્વક જણાવ્યું હતું કે, ભારત સરકાર કોઈપણ ભેદભાવ વિના 'જન કલ્યાણ'ની ભાવના સાથે કામ કરી રહી છે અને દેશની લોકશાહી પ્રક્રિયાઓએ જ વિકાસને નવી ગતિ અને સ્કેલ આપ્યો છે.
ગરીબી સામેની લડાઈ અને ડિજિટલ ક્રાંતિ
પોતાના સંબોધનમાં પીએમ મોદીએ એક મોટી સિદ્ધિ પર પ્રકાશ પાડતા કહ્યું કે, છેલ્લા કેટલાક વર્ષોમાં ભારતમાં આશરે ૨૫ કરોડ લોકો ગરીબીની રેખામાંથી બહાર આવ્યા છે. તેમણે ઉમેર્યું કે, "ભારતમાં લોકશાહીનો અર્થ 'લાસ્ટ માઇલ ડિલિવરી' (છેવાડાના માનવી સુધી સુવિધા પહોંચાડવી) છે." આજે ભારત વિશ્વની સૌથી ઝડપથી વિકસતી અર્થવ્યવસ્થા છે અને UPI જેવી સિસ્ટમ સાથે ભારત ડિજિટલ પેમેન્ટમાં વિશ્વનું નેતૃત્વ કરી રહ્યું છે. પીએમએ ભારતને વિશ્વના સૌથી મોટા રસી ઉત્પાદક અને બીજા નંબરના સૌથી મોટા સ્ટીલ ઉત્પાદક તરીકે પણ ઓળખાવ્યું હતું.
ગ્લોબલ સાઉથનો અવાજ બનતું ભારત
વડાપ્રધાને કહ્યું કે ભારત માત્ર પોતાનો જ નહીં, પણ સમગ્ર 'ગ્લોબલ સાઉથ'નો અવાજ બની રહ્યું છે. જી-૨૦ ની અધ્યક્ષતા દરમિયાન પણ ભારતે વિકાસશીલ દેશોની પ્રાથમિકતાઓને વિશ્વના એજન્ડાના કેન્દ્રમાં રાખી હતી. આ ચોથી વખત છે જ્યારે ભારત આ મહત્વપૂર્ણ કોમનવેલ્થ સંમેલનનું યજમાન બન્યું છે, જે ભારતની વધતી જતી વૈશ્વિક પ્રતિષ્ઠાનું પ્રતીક છે.
AI અને સોશિયલ મીડિયાના પડકારો
આ પ્રસંગે લોકસભા અધ્યક્ષ ઓમ બિરલાએ આધુનિક ટેકનોલોજીના બેવડા સ્વરૂપ વિશે વાત કરી હતી. તેમણે સ્વીકાર્યું કે આર્ટિફિશિયલ ઇન્ટેલિજન્સ (AI) અને સોશિયલ મીડિયાએ લોકશાહી સંસ્થાઓની કાર્યક્ષમતા વધારી છે, પરંતુ તેની સાથે ખોટી માહિતી (Misinformation), સાયબર ક્રાઇમ અને સામાજિક વિભાજન જેવા ગંભીર જોખમો પણ ઉભા થયા છે. શ્રી બિરલાએ આ પડકારોના ઉકેલ માટે તમામ દેશોને સામૂહિક જવાબદારી નિભાવવા અપીલ કરી હતી.