ઢાકા: બાંગ્લાદેશ ક્રિકેટમાં  એવો 'ભૂકંપ' આવ્યો જેણે રમત જગતને હચમચાવી દીધું છે. બાંગ્લાદેશ ક્રિકેટ બોર્ડ (BCB) ના ડાયરેક્ટર એમ. નઝમુલ ઇસ્લામે ભૂતપૂર્વ સુકાની તમીમ ઇકબાલને જાહેરમાં "ભારતીય એજન્ટ" કહી દેતા વિવાદ વકર્યો છે. આ અપમાનજનક ટિપ્પણીથી છંછેડાયેલા બાંગ્લાદેશી ખેલાડીઓએ આજે 15 જાન્યુઆરી, 2026 ના રોજ યોજાનારી બાંગ્લાદેશ પ્રીમિયર લીગ (BPL) ની મેચોનો બહિષ્કાર કરીને મેદાન પર ઉતરવાનો ઇનકાર કરી દીધો છે. નોઆખલી એક્સપ્રેસ અને ચટ્ટોગ્રામ રોયલ્સ વચ્ચેની મેચ માટે ટોસનો સમય થયો હોવા છતાં બંને ટીમો મેદાન પર પહોંચી ન હતી, જેના કારણે આખી લીગ અને બાંગ્લાદેશી ક્રિકેટનું ભવિષ્ય અત્યારે અધ્ધરતાલ છે.

ખેલાડીઓના આ આક્રમક વલણ સામે BCB રક્ષણાત્મક મોડમાં આવી ગયું છે. બોર્ડે તાત્કાલિક અસરથી નઝમુલ ઇસ્લામને 'કારણ બતાવો' નોટિસ ફટકારી છે અને 48 કલાકમાં જવાબ માંગ્યો છે. જોકે, ક્રિકેટર્સ વેલ્ફેર એસોસિએશન (CWAB) એ સ્પષ્ટ ચીમકી આપી છે કે જ્યાં સુધી નઝમુલને પદ પરથી હટાવવામાં નહીં આવે ત્યાં સુધી હડતાળ ચાલુ રહેશે. આ વિવાદ માત્ર સ્થાનિક લીગ પૂરતો મર્યાદિત નથી, પરંતુ તેની અસર 2026 T20 વર્લ્ડ કપ ની તૈયારીઓ પર પણ પડી રહી છે. બાંગ્લાદેશે સુરક્ષાના બહાને ભારતનો પ્રવાસ ન ખેડવાની જાહેરાત કરી છે, જેની સામે BCCI એ પણ કડક વલણ અપનાવતા મુસ્તફિઝુર રહેમાનને IPL ટીમ KKR માંથી બહાર કરી દીધો છે, જેનાથી બંને દેશોના ક્રિકેટ સંબંધોમાં ખટાશ વધી છે.

હાલમાં પરિસ્થિતિ એવી છે કે બાંગ્લાદેશ તેની વર્લ્ડ કપની મેચો ભારતને બદલે શ્રીલંકામાં શિફ્ટ કરાવવા માટે ICC પર દબાણ કરી રહ્યું છે, પરંતુ ICC એ આ બાબતે અસંમતિ દર્શાવી છે. એક તરફ આંતરરાષ્ટ્રીય સ્તરે એકલતા અને બીજી તરફ ઘરઆંગણે ખેલાડીઓનો આક્રોશ, BCB અત્યારે બેવડા સંકટમાં ફસાયું છે. તમીમ ઇકબાલે જોકે સંયમ રાખવાની અપીલ કરી છે, પરંતુ મેદાન ખાલી હોવું એ સંકેત આપે છે કે બાંગ્લાદેશી ખેલાડીઓ હવે આરપારની લડાઈના મૂડમાં છે. આગામી 48 કલાક બાંગ્લાદેશી ક્રિકેટના ઈતિહાસ માટે ખૂબ જ નિર્ણાયક સાબિત થશે.