નવી દિલ્હી : વર્ષ ૨૦૨૬ના પ્રજાસત્તાક દિવસની ઉજવણી ભારત માટે રાજદ્વારી દૃષ્ટિએ અત્યંત ખાસ બની રહેશે. વડાપ્રધાન નરેન્દ્ર મોદીના ખાસ આમંત્રણ પર યુરોપિયન કમિશનના પ્રમુખ ઉર્સુલા વોન ડેર લેયન અને યુરોપિયન કાઉન્સિલના પ્રમુખ એન્ટોનિયો કોસ્ટા ૨૬મી જાન્યુઆરીના ૭૭મા પ્રજાસત્તાક પર્વ પર મુખ્ય અતિથિ તરીકે હાજરી આપશે. આ એક દુર્લભ ઘટના છે જ્યાં EU ના બે ટોચના નેતાઓ એકસાથે ભારતના મહેમાન બની રહ્યા છે, જે દર્શાવે છે કે ભારત હવે યુરોપને માત્ર દેશોના સમૂહ તરીકે નહીં પણ એક અખંડ વ્યૂહાત્મક ભાગીદાર તરીકે જુએ છે.
છ વર્ષનો લાંબો ઇન્તજાર પૂર્ણ થશે
વર્ષ ૨૦૨૦માં યોજાયેલી વર્ચ્યુઅલ સમિટ બાદ, ૬ વર્ષના લાંબા અંતરાલ પછી ૧૬મું ભારત-EU શિખર સંમેલન ૨૭ જાન્યુઆરી ૨૦૨૬ના રોજ નવી દિલ્હીમાં યોજાશે. આ પ્રવાસ દરમિયાન બંને નેતાઓ રાષ્ટ્રપતિ દ્રૌપદી મુર્મુ સાથે મુલાકાત કરશે અને વડાપ્રધાન મોદી સાથે પ્રતિનિધિમંડળ સ્તરની મહત્વની વાટાઘાટો કરશે. આ બેઠક ભારત અને યુરોપ વચ્ચેના આર્થિક અને રાજકીય સંબંધોને નવી ઊંચાઈ પર લઈ જશે.
વેપાર અને સુરક્ષા પર ખાસ નજર
ભારત અને EU વચ્ચે ૨૦૦૪થી વ્યૂહાત્મક ભાગીદારી છે. આ વર્ષની મુલાકાત દરમિયાન ખાસ કરીને ફ્રી ટ્રેડ એગ્રીમેન્ટ (FTA), આબોહવા પરિવર્તન, સંરક્ષણ-ઔદ્યોગિક સહયોગ અને સપ્લાય-ચેઈન મજબૂત કરવા પર ધ્યાન કેન્દ્રિત કરવામાં આવશે. મુલાકાત દરમિયાન ભારત-EU બિઝનેસ ફોરમનું પણ આયોજન કરવામાં આવ્યું છે, જેમાં બંને પક્ષોના અગ્રણી ઉદ્યોગપતિઓ વેપારના નવા દ્વાર ખોલવા પર ચર્ચા કરશે.
વ્યૂહાત્મક મહત્વ
વૈશ્વિક રાજકારણના વર્તમાન પ્રવાહમાં ભારત માટે યુરોપિયન યુનિયનનું સમર્થન અત્યંત નિર્ણાયક છે. ટેકનોલોજી ટ્રાન્સફર અને સંરક્ષણ ક્ષેત્રે યુરોપિયન કંપનીઓનું 'મેક ઇન ઇન્ડિયા' સાથે જોડાણ ભારતના આર્થિક વિકાસને નવી ગતિ આપશે. પ્રજાસત્તાક દિને કર્તવ્ય પથ પર આ નેતાઓની હાજરી ભારતની વધતી જતી વૈશ્વિક શક્તિનું પ્રતીક બની રહેશે.