નવી દિલ્હી: ભારતની ગ્રામીણ જિંદગીની લાઈફલાઈન ગણાતી 'મનરેગા' યોજનાના અસ્તિત્વ પર અત્યારે જોખમના વાદળો છવાયા છે. કેન્દ્ર સરકારે વર્ષ 2025 માં મનરેગાનું નામ બદલીને 'વિકાસ ભારત-રોજગાર અને આજીવિકા મિશન (ગ્રામીણ)' એટલે કે VB-G RAM G એક્ટ કરી નાખતા રાજકીય ગરમાવો વધી ગયો છે. કોંગ્રેસે આ પગલાને ગરીબોના હક પર તરાપ ગણાવીને રાષ્ટ્રવ્યાપી 'મનરેગા બચાવો' આંદોલનની જાહેરાત કરી છે. કોંગ્રેસના દિગ્ગજ નેતાઓ કે.સી. વેણુગોપાલ અને જયરામ રમેશે દિલ્હીમાં શંખનાદ ફૂંકતા જણાવ્યું કે, સરકાર મનસ્વી રીતે આ કાયદામાં ફેરફાર કરીને ગ્રામીણ મજૂરોનો કામ કરવાનો બંધારણીય અધિકાર છીનવી રહી છે, જેને હવે રસ્તા પર ઉતરીને અટકાવવામાં આવશે.

આ લડાઈમાં કર્ણાટકની કોંગ્રેસ સરકાર સૌથી આગળ જોવા મળી રહી છે. મંત્રી પ્રિયાંક ખડગેએ જાહેરાત કરી છે કે તેઓ આ નવા કાયદાને કાયદેસર રીતે અદાલતમાં પડકારશે. આ મુદ્દે ચર્ચા કરવા માટે 22 જાન્યુઆરીએ કર્ણાટક વિધાનસભાનું ખાસ સંયુક્ત સત્ર બોલાવવામાં આવ્યું છે. કોંગ્રેસનો આક્ષેપ છે કે નવો કાયદો મનરેગાની મૂળ ભાવનાને ખતમ કરી નાખશે અને મજૂરોને મળતી રોજગારની ગેરંટી જોખમમાં મૂકાશે. કર્ણાટકના મંત્રી એચ.કે. પાટીલે આ નિર્ણયને "ક્રૂર અને સરમુખત્યારશાહી" ગણાવતા કહ્યું કે, જે યોજના ગ્રામીણ ભારતના આર્થિક માળખાનો પાયો હતી, તેને તોડી પાડવાના પ્રયાસો થઈ રહ્યા છે.

કોંગ્રેસના આ 'મેગા પ્લાન'માં ત્રણ તબક્કામાં આંદોલન ચલાવવામાં આવશે. જાન્યુઆરીથી શરૂ થયેલું આ અભિયાન ફેબ્રુઆરીના અંત સુધી ચાલશે, જેમાં જિલ્લા સ્તરે ઉપવાસ, ગ્રામ પંચાયતોમાં 'ચોપાળ' અને વિધાનસભા ઘેરાવ જેવા કાર્યક્રમો યોજાશે. ખાસ કરીને 30 જાન્યુઆરીએ શહીદ દિવસે દેશભરમાં શાંતિપૂર્ણ વિરોધ પ્રદર્શન કરવામાં આવશે અને 16 થી 25 ફેબ્રુઆરી દરમિયાન ચાર મોટી પ્રાદેશિક રેલીઓ યોજીને કેન્દ્ર સરકાર પર દબાણ લાવવામાં આવશે. હવે જોવાનું એ રહેશે કે કોંગ્રેસનો આ જન-સંપર્ક કાર્યક્રમ ગ્રામીણ વોટબેંકને પોતાની તરફ ખેંચવામાં કેટલો સફળ રહે છે અને સરકાર આ મુદ્દે શું સ્પષ્ટતા કરે છે.