નવી દિલ્હી:આગામી કેન્દ્રીય બજેટ ૨૦૨૬માં નાણામંત્રી મહિલાઓના આર્થિક સશક્તિકરણ માટે અનેક ક્રાંતિકારી પગલાંની જાહેરાત કરી શકે છે. સરકારી સૂત્રો અને નીતિ વિષયક ચર્ચાઓ મુજબ, આ વખતે બજેટનું કેન્દ્રબિંદુ જન ધન ખાતાઓને વધુ સક્રિય બનાવી તેને "લાભ ખાતા" માં ફેરવવાનું રહેશે. સરકારનો ઉદ્દેશ્ય છે કે મહિલાઓ માત્ર ખાતાધારક જ ન રહે, પરંતુ બેંકિંગ સિસ્ટમનો સક્રિયપણે ઉપયોગ કરીને પોતાની આર્થિક સ્થિતિ મજબૂત કરે.
બજેટમાં પ્રથમ વખત બેંકિંગ સિસ્ટમમાં પ્રવેશી રહેલી મહિલાઓ માટે ખાસ ક્રેડિટ કાર્ડ મોડેલ રજૂ કરવામાં આવી શકે છે. સામાન્ય રીતે ક્રેડિટ કાર્ડ માટે આવકના પુરાવા અને ક્રેડિટ હિસ્ટ્રીની જરૂર હોય છે, જે ઘણી મહિલાઓ પાસે હોતી નથી. બજેટમાં આ નિયમોને હળવા કરી, નાની મર્યાદાવાળા ક્રેડિટ કાર્ડ આપવાની યોજના પર વિચાર થઈ રહ્યો છે. આ ઉપરાંત, સીવણકામ, ડેરી ફાર્મિંગ કે નાના સ્ટોર્સ ચલાવતી મહિલા ઉદ્યોગસાહસિકો માટે કોઈપણ જટિલ કાગળકામ વિના સરળતાથી લોન મળી રહે તેવી જોગવાઈ પણ કરવામાં આવી શકે છે.
 ગ્રામીણ વિસ્તારોમાં કાર્યરત સ્વ-સહાય જૂથો (SHGs) માટે ધિરાણ સહાયને વધુ સુલભ બનાવવાની તૈયારીઓ ચાલી રહી છે. નીતિ આયોગ અને નાણા મંત્રાલય હાલમાં જન ધન ખાતાઓની સમીક્ષા કરી રહ્યા છે. જો આ ખાતાઓને નાના ધિરાણ અને વીમા યોજનાઓ સાથે જોડવામાં આવે, તો ગ્રામીણ મહિલાઓ સાહુકારોના વ્યાજચક્રમાંથી મુક્ત થઈને આત્મનિર્ભર બની શકશે. સરકારનું વિઝન છે કે દરેક જરૂરિયાતમંદ મહિલા પાસે વીમાનું સુરક્ષા કવચ હોય, જે બીમારી કે કટોકટીમાં પરિવારને આર્થિક ટેકો આપી શકે.
માત્ર સુવિધાઓ આપવી પૂરતું નથી, પરંતુ મહિલાઓ તેનો ઉપયોગ કરતા શીખે તે માટે બજેટમાં ડિજિટલ સાક્ષરતા અભિયાન માટે પણ ફંડ ફાળવવામાં આવી શકે છે. વીમા દાવાઓનું ઝડપી સમાધાન અને બેંકિંગ ફરિયાદો માટે ગ્રાહક-મૈત્રીપૂર્ણ સિસ્ટમ બનાવવાની પણ તૈયારી છે. જો આ પ્રસ્તાવો બજેટમાં વાસ્તવિકતા બનશે, તો ૨૦૨૬નું બજેટ ભારતીય મહિલાઓ માટે આર્થિક આઝાદીનું નવું પ્રકરણ લખશે