નવી દિલ્હી: રાજધાની દિલ્હી અને એનસીઆરના વિસ્તારોમાં શુક્રવાર, ૧૬ જાન્યુઆરી ૨૦૨૬ની સવાર હાડ થીજવતી ઠંડી લઈને આવી હતી. કાતિલ ઠંડીની સાથે ગાઢ ધુમ્મસ અને ભયજનક પ્રદૂષણને કારણે લોકોની મુશ્કેલીમાં બેવડો વધારો થયો છે.

 

હવામાન વિભાગના જણાવ્યા અનુસાર, પહાડી રાજ્યો જમ્મુ-કાશ્મીર, હિમાચલ પ્રદેશ અને ઉત્તરાખંડમાં થઈ રહેલી ભારે બરફવર્ષા અને પશ્ચિમી વિક્ષોભની સીધી અસર મેદાની વિસ્તારો પર જોવા મળી રહી છે, જેના કારણે શીતલહેર પ્રકોપ યથાવત છે.

દિલ્હીમાં ૨૦૧૦ બાદ પાલમમાં સૌથી નીચું તાપમાન નોંધાયું

 

આ સિઝનની સૌથી ઠંડી સવાર આજે શુક્રવારે નોંધાઈ હતી. હવામાન વિભાગના આંકડા મુજબ, સફદરજંગ વેધશાળામાં લઘુત્તમ તાપમાન ૨.૯ ડિગ્રી સેલ્સિયસ નોંધાયું હતું, જે જાન્યુઆરી ૨૦૨૩ પછીનું સૌથી નીચું તાપમાન છે. જ્યારે પાલમ વિસ્તારમાં પારો ગગડીને ૨.૩ ડિગ્રી સેલ્સિયસ સુધી પહોંચી ગયો હતો, જે વર્ષ ૨૦૧૦ બાદનું સૌથી નીચું સ્તર છે. આગામી બે-ત્રણ દિવસ સુધી શીતલહેરની આ સ્થિતિ યથાવત રહેવાની આગાહી કરવામાં આવી છે.

 

વાહનવ્યવહાર ઠપ: હાઈવે પર વાહનો ગોકળ ગાયની ગતિએ ચાલે છે

 

સવારે ૬ વાગ્યે પાલમમાં વિઝિબિલિટી ૮૦૦ મીટર અને સફદરજંગમાં ૭૦૦ મીટર હતી, પરંતુ સવારે ૭:૩૦ વાગ્યાની આસપાસ સ્થિતિ વધુ વણસી હતી અને ગાઢ ધુમ્મસને કારણે વિઝિબિલિટી ઘટીને માત્ર ૧૫૦ મીટર રહી ગઈ હતી. ધુમ્મસના કારણે દિલ્હી આવતી અનેક ટ્રેનો મોડી ચાલી રહી છે અને વિમાન ઉડાન પર પણ માઠી અસર પડી છે. હાઈવે પર વિઝિબિલિટી ઓછી હોવાથી વાહનચાલકોને લાઈટ અને ઈન્ડિકેટર ચાલુ રાખીને ધીમી ગતિએ વાહન ચલાવવાની ફરજ પડી હતી.

 

પ્રદૂષણની પણ માર: ગાઝિયાબાદના વિસ્તારોમાં એક્યુઆઈ ૪૦૦ને પાર

 

ઠંડીની સાથે પ્રદૂષણે પણ માઝા મૂકી છે. દિલ્હી અને આસપાસના શહેરોમાં હવાની ગુણવત્તા અત્યંત ખરાબ રહી હતી. દિલ્હીનો સરેરાશ એક્યુઆઈ ૩૫૦ ને પાર નોંધાયો હતો. ખાસ કરીને ગાઝિયાબાદના લોની અને વસુંધરા વિસ્તારમાં પ્રદૂષણનું સ્તર 'બેહદ ગંભીર' શ્રેણીમાં પહોંચ્યું છે.

 

શહેરોની એક્યુઆઈ સ્થિતિ (આજે ૧૬ જાન્યુઆરીએ):

 

 * લોની (ગાઝિયાબાદ): ૪૧૦ (બેહદ ગંભીર)

 * વસુંધરા (ગાઝિયાબાદ): ૪૦૯ (બેહદ ગંભીર)

 * ચાંદની ચોક (દિલ્હી): ૩૭૦ (બહુ ખરાબ)

 * બવાના (દિલ્હી): ૩૬૩ (બહુ ખરાબ)

 * આનંદ વિહાર (દિલ્હી): ૩૫૪ (બહુ ખરાબ)

 * નોઈડા સેક્ટર ૧૨૫: ૩૪૧ (બહુ ખરાબ)

 * ગુરુગ્રામ: ૩૩૦ (બહુ ખરાબ)

 

વર્તમાન પરિસ્થિતિને ધ્યાનમાં રાખીને લોકોને બિનજરૂરી બહાર ન નીકળવા અને બહાર નીકળતી વખતે એન-૯૫ માસ્ક પહેરવાની સલાહ આપવામાં આવી છે.