નવી દિલ્હી, તા. ૧૬ : ક્રિપ્ટોકરન્સી માર્કેટમાં ફરી એકવાર વોલેટિલિટીનો જબરદસ્ત વંટોળ જોવા મળી રહ્યો છે. અમેરિકામાં ક્રિપ્ટો નિયમોને લઈને વધી રહેલી ચિંતાઓની સીધી અસર ડિજિટલ એસેટ્સ પર પડી છે. શુક્રવારે બિટકોઈન (BTC) એ રોકાણકારોને હરખાવ્યા હતા જ્યારે તે $97,000 ની સપાટી વટાવી ગયો હતો, પરંતુ આ ખુશી લાંબો સમય ટકી શકી નહીં. નિયમનકારી અડચણોના સમાચાર આવતાની સાથે જ કિંમત ધડાધડ નીચે ઉતરીને $95,498 પર ટ્રેડ થવા લાગી હતી.
અમેરિકી નિયમોનો ફાળકો
બજારના વિશ્લેષકોના જણાવ્યા મુજબ, અમેરિકામાં ક્રિપ્ટોકરન્સીના નિયમન (Regulation) ને લઈને થઈ રહેલા નવા વિકાસથી રોકાણકારોમાં ડર પેઠો છે. આ સાવચેતીભર્યા વલણને કારણે બિટકોઈન જ નહીં, પણ અન્ય મુખ્ય કરન્સી પણ દબાણ હેઠળ છે. ઈથેરિયમમાં 0.02% અને બિટકોઈનમાં 0.78% નો ઘટાડો નોંધાયો છે, જે દર્શાવે છે કે બજાર અત્યારે 'વેઈટ એન્ડ વોચ' ની સ્થિતિમાં છે.
અલ્ટકોઈન્સમાં પણ કડાકો
માત્ર બિટકોઈન જ નહીં, પણ અન્ય લોકપ્રિય સિક્કાઓ જેવા કે સોલાના (Solana), ડોગેકોઈન (Dogecoin) અને કાર્ડાનો (Cardano) માં પણ 3% સુધીનો મોટો ઘટાડો જોવા મળ્યો છે. વૈશ્વિક ક્રિપ્ટો માર્કેટ કેપિટલાઇઝેશન ઘટીને $3.22 ટ્રિલિયન થઈ ગયું છે. જોકે, આ ઘટાડા વચ્ચે પણ સંસ્થાકીય રોકાણકારો (ETFs) નો પ્રવાહ ચાલુ છે, જે બજારને સંપૂર્ણ રીતે તૂટતા બચાવી રહ્યો છે.
શું કહે છે નિષ્ણાતો?
કોઇનસ્વિચ અને માર્કેટ્સ ડેસ્કના મતે, હવે $95,200 થી $95,500 ની રેન્જ બિટકોઈન માટે અત્યંત મહત્વની સાબિત થશે. જો આ સ્તર જળવાઈ રહેશે તો બજાર ફરીથી $96,000 તરફ કૂચ કરી શકે છે. વળી, 'વ્હેલ' (મોટા રોકાણકારો) આ ઘટાડાનો લાભ લઈને ફરીથી ખરીદી કરી રહ્યા હોવાના સંકેતો પણ મળી રહ્યા છે. જે લાંબા ગાળાના રોકાણકારો માટે આશાનું કિરણ છે.