કમ્પાલા, તા. ૧૬ : પૂર્વ આફ્રિકાના દેશ યુગાન્ડામાં ગત ગુરુવારે રાષ્ટ્રપતિ પદ માટે મતદાન યોજાયું હતું, જે અત્યંત વિવાદાસ્પદ અને તણાવભર્યું રહ્યું છે. છેલ્લા ચાર દાયકાથી સત્તા પર બિરાજમાન ૮૧ વર્ષીય રાષ્ટ્રપતિ યોવેરી મુસેવેની સામે આ વખતે ભારે જનરોષ જોવા મળી રહ્યો છે. ચૂંટણી દરમિયાન દેશભરમાં ઈન્ટરનેટ સેવાઓ સંપૂર્ણપણે બંધ કરી દેવામાં આવી હતી, જેના કારણે વિપક્ષોએ સરકાર પર ચૂંટણીમાં ગેરરીતિ અને વોટ રિગિંગના ગંભીર આક્ષેપો કર્યા છે.
ટેકનોલોજી દગાબાજ સાબિત થઈ
ચૂંટણીમાં પારદર્શિતા લાવવા માટે પ્રથમ વખત બાયોમેટ્રિક વોટિંગ મશીનોનો ઉપયોગ કરવામાં આવ્યો હતો, પરંતુ મતદાન શરૂ થતાની સાથે જ અનેક સ્થળોએ આ મશીનોમાં ટેકનિકલ ખામીઓ સર્જાઈ હતી. પરિણામે કલાકો સુધી મતદાન અટકી પડ્યું હતું. આખરે ચૂંટણી પંચે મધ્યરાત્રિએ જાહેરાત કરી હતી કે હવે ૫૦,૦૦૦થી વધુ મતદાન મથકો પર જૂની પદ્ધતિ એટલે કે પેપર વેરિફિકેશન દ્વારા મતદારોની ઓળખ કરવામાં આવશે. આ વિલંબ છતાં મતદારોની લાંબી લાઈનો જોવા મળી હતી.
પોપ સ્ટાર વિરુદ્ધ રાષ્ટ્રપતિ
આ ચૂંટણીમાં કુલ સાત ઉમેદવારો મેદાનમાં છે, પરંતુ મુખ્ય મુકાબલો વર્તમાન રાષ્ટ્રપતિ મુસેવેની અને ભૂતપૂર્વ પોપ સ્ટાર બોબી વાઈન (રોબર્ટ ક્યાગુલાની) વચ્ચે છે. બોબી વાઈન યુવા પેઢીમાં અત્યંત લોકપ્રિય છે અને પરિવર્તનની લહેર ચલાવી રહ્યા છે. મતદાન બાદ બોબી વાઈન અને તેમની પત્ની બાર્બરા ક્યાગુલાની જ્યારે મતદાન મથકે પહોંચ્યા ત્યારે ભારે ભીડ ઉમટી પડી હતી. વિપક્ષે ચેતવણી આપી છે કે જો પરિણામોમાં ચેડાં કરવામાં આવશે તો દેશવ્યાપી વિરોધ પ્રદર્શનો કરવામાં આવશે.
ઈન્ટરનેટ બ્લેકઆઉટ અને ભયનો માહોલ
યુગાન્ડા સરકાર દ્વારા લાદવામાં આવેલા ઈન્ટરનેટ પ્રતિબંધને કારણે વિશ્વ સાથેનો દેશનો સંપર્ક કપાઈ ગયો છે. માનવાધિકાર સંગઠનોનું કહેવું છે કે મુક્ત અને ન્યાયી ચૂંટણી પ્રક્રિયાને રોકવા માટે જાણીજોઈને આ પગલું ભરવામાં આવ્યું છે. રાજધાની કમ્પાલામાં સુરક્ષા દળોનો ચુસ્ત બંદોબસ્ત તૈનાત કરવામાં આવ્યો છે. હવે સમગ્ર વિશ્વની નજર આ ચૂંટણીના પરિણામો પર છે, જે યુગાન્ડાનું ભવિષ્ય નક્કી કરશે.