બક્સર: બિહારના બક્સર જિલ્લામાં એક એવી ઘટના પ્રકાશમાં આવી છે, જેણે સમાજ અને તંત્ર બંનેને હચમચાવી દીધા છે. એક દોઢ વર્ષની માસૂમ બાળકીને તેના ગુપ્તાંગમાં સમસ્યા થતાં પટણા AIIMS લઈ જવામાં આવી હતી. ત્યાંના ડોક્ટરોએ જ્યારે બાળકીની તપાસ કરી, ત્યારે તેમના પગ નીચેથી જમીન સરકી ગઈ હતી. આ માસૂમ બાળકીમાં એવો જાતીય સંક્રમિત રોગ (STD) જોવા મળ્યો છે, જે સામાન્ય રીતે માત્ર પુખ્ત વયના પુરુષો અને મહિલાઓમાં શારીરિક સંપર્ક દ્વારા ફેલાય છે.
 તબીબી તપાસમાં વધુ એક ચોંકાવનારો ખુલાસો થયો છે. બાળકીના પિતાનો જ્યારે ટેસ્ટ કરવામાં આવ્યો, ત્યારે જાણવા મળ્યું કે તેઓ પોતે પણ એ જ ગંભીર જાતીય રોગથી પીડાઈ રહ્યા છે. AIIMS ના ડોક્ટરો માટે આ વાત પચાવવી મુશ્કેલ હતી કે દોઢ વર્ષની બાળકી સુધી આ ચેપ કેવી રીતે પહોંચ્યો? આ મામલો અત્યંત સંવેદનશીલ હોવાથી હોસ્પિટલ પ્રશાસને તાત્કાલિક બક્સર પોલીસ અધિક્ષકને જાણ કરી હતી.
બક્સરના એસપી શુભમ આર્યના આદેશ પર મહિલા પોલીસ સ્ટેશનમાં FIR નોંધવામાં આવી છે. જોકે, આ કેસમાં એક વિચિત્ર વળાંક ત્યારે આવ્યો જ્યારે બાળકીની માતાએ પોલીસ પૂછપરછમાં પિતા પર કોઈ પણ પ્રકારનો આરોપ લગાવવાનો સ્પષ્ટ ઇનકાર કરી દીધો. મહિલા પોલીસ સ્ટેશનના પ્રભારી પ્રતિભા કુમારીએ જણાવ્યું કે, "માતા પિતાનો પક્ષ લઈ રહી છે, જે આ કેસને વધુ જટિલ બનાવે છે. અમે મેડિકલ રિપોર્ટના આધારે ઊંડાણપૂર્વક તપાસ કરી રહ્યા છીએ."
 તબીબોનું કહેવું છે કે આવા કિસ્સાઓમાં કાં તો બાળકી સાથે અત્યંત ઘૃણાસ્પદ કૃત્ય થયું હોય અથવા તો સ્વચ્છતાના અભાવે ચેપગ્રસ્ત વ્યક્તિના કપડાં કે અન્ય વસ્તુઓ દ્વારા ચેપ લાગ્યો હોય. જોકે, પિતા અને પુત્રી બંનેમાં એક જ રોગ હોવો એ સંયોગ હોઈ શકે નહીં. હાલ પોલીસ એ પાસાની તપાસ કરી રહી છે કે શું આ કોઈ ગુનાહિત કૃત્ય છે કે તબીબી વિજ્ઞાનની કોઈ દુર્લભ ઘટના.