પટણા: બિહારના મુખ્યમંત્રી નીતીશ કુમારે રાજ્યની આરોગ્ય વ્યવસ્થાને સુધારવા માટે એક મોટો અને ક્રાંતિકારી નિર્ણય લીધો છે. પશ્ચિમ ચંપારણની મુલાકાત અને 'સમૃદ્ધિ યાત્રા' દરમિયાન તેમણે સ્પષ્ટ જાહેરાત કરી છે કે બિહારમાં સરકારી સેવા હેઠળના ડોક્ટરો હવે કોઈપણ ખાનગી હોસ્પિટલ કે ક્લિનિકમાં પ્રેક્ટિસ કરી શકશે નહીં. મુખ્યમંત્રીએ ભાર પૂર્વક જણાવ્યું હતું કે સરકારી ડોક્ટરોની સંપૂર્ણ જવાબદારી અને સમર્પણ માત્ર સામાન્ય જનતા અને સરકારી હોસ્પિટલો પ્રત્યે જ હોવું જોઈએ.
અત્રે નોંધનીય છે કે બિહારમાં ઘણા એવા કિસ્સાઓ સામે આવ્યા હતા જેમાં સરકારી હોસ્પિટલોમાં ફરજ બજાવતા ડોક્ટરો પટણા કે અન્ય શહેરોની ખાનગી હોસ્પિટલોમાં પણ પ્રેક્ટિસ કરતા હતા. આને કારણે સરકારી હોસ્પિટલોમાં આવતા ગરીબ દર્દીઓને સમયસર સારવાર મળતી નહોતી. નીતીશ કુમારે આ બાબતે કડક વલણ અપનાવતા અધિકારીઓને નિર્દેશ આપ્યો છે કે નવી નીતિનો અમલ તત્કાલ પ્રભાવથી કરવામાં આવે અને નિયમોનું ઉલ્લંઘન કરનારા ડોક્ટરો સામે દાખલારૂપ કાર્યવાહી કરવામાં આવે.
રાજ્ય સરકારના આ નિર્ણયને બિહારની સ્વાસ્થ્ય સેવાઓમાં એક મોટો સુધારાવાદી ફેરફાર માનવામાં આવી રહ્યો છે. મુખ્યમંત્રીએ અધિકારીઓને સ્પષ્ટ માર્ગદર્શિકા જારી કરવા કહ્યું છે જેથી સરકારી હોસ્પિટલોમાં ડોક્ટરોની ૨૪ કલાક ઉપલબ્ધતા સુનિશ્ચિત કરી શકાય. આ નિર્ણયથી સામાન્ય લોકોને હવે સરકારી હોસ્પિટલોમાં જ નિષ્ણાત ડોક્ટરોની સેવાઓ સરળતાથી મળી રહેશે.
નીતીશ કુમારના આ નિર્ણય બાદ રાજ્યના મેડિકલ એસોસિએશનો અને ડોક્ટર સંગઠનોમાં ભારે ચર્ચાઓ શરૂ થઈ છે. અનેક ડોક્ટરો આ નિર્ણયનો વિરોધ કરવાની તૈયારી કરી રહ્યા છે, જ્યારે સામાન્ય જનતા આ કડક પગલાંને આવકારી રહી છે. હવે જોવાનું એ રહેશે કે સરકાર આ નવી નીતિનો અમલ કેટલી મજબૂતીથી કરી શકે છે.