નવી દિલ્હી : તેલંગાણાના વિવાદાસ્પદ ફોન ટેપિંગ કેસમાં સુપ્રીમ કોર્ટે આજે રાજ્ય સરકાર પર આકરી ટિપ્પણી કરી છે. જસ્ટિસ બી.વી. નાગરત્ના અને આર. મહાદેવનની બેન્ચે પૂર્વ સ્પેશિયલ ઇન્ટેલિજન્સ બ્યુરો (SIB) ના વડા ટી. પ્રભાકર રાવની આગોતરા જામીન અરજી પર સુનાવણી કરતા તેલંગાણા સરકારને પૂછ્યું હતું કે, શું તેઓ પૂર્વ અધિકારીને ત્યાં સુધી જેલમાં રાખવા માંગે છે જ્યાં સુધી તેઓ માનસિક કે શારીરિક રીતે ભાંગી ન પડે?
સરકારનો વિરોધ અને કોર્ટનો જવાબ
તેલંગાણા સરકાર તરફથી હાજર રહેલા વરિષ્ઠ વકીલ સિદ્ધાર્થ લુથરાએ રાવને જામીન આપવાનો સખત વિરોધ કર્યો હતો. તેમણે દલીલ કરી હતી કે જે વ્યક્તિ વિદેશમાં હોય અને ભાગેડુ ગણાતી હોય તેને આગોતરા જામીન કેવી રીતે મળી શકે? જોકે, બેન્ચે આ દલીલ સામે નારાજગી વ્યક્ત કરતા કહ્યું કે, "અમને લાગે છે કે તમે ઈચ્છો છો કે તે જેલમાં જ રહે. અમે વચગાળાનું રક્ષણ આપવા માટેના અમારા આદેશનો દુરુપયોગ થવા દઈશું નહીં."
તપાસમાં સહયોગની શરત
સર્વોચ્ચ અદાલતે સ્પષ્ટ કર્યું હતું કે આગોતરા જામીન મળવાનો અર્થ એ નથી કે આરોપી પોલીસ પૂછપરછથી બચી શકે છે. રાજ્ય પોલીસ હજુ પણ તેમને તપાસ માટે બોલાવી શકે છે અને રાવે તપાસમાં પૂરો સહયોગ આપવો પડશે. અગાઉ સરકારે આરોપ લગાવ્યો હતો કે રાવ તેમના iCloud એકાઉન્ટની વિગતો છુપાવી રહ્યા છે અને તપાસમાં અડચણો ઉભી કરી રહ્યા છે. કોર્ટે હવે આ મામલાની આગામી સુનાવણી ૧૦ માર્ચ પર મુલતવી રાખી છે અને ત્યાં સુધી રાવની ધરપકડ સામેનું રક્ષણ લંબાવ્યું છે.
શું છે આખો ફોન ટેપિંગ વિવાદ?
માર્ચ ૨૦૨૪ થી ચર્ચામાં આવેલા આ કેસમાં આરોપ છે કે અગાઉના BRS શાસન દરમિયાન SIB ના સંસાધનોનો દુરુપયોગ કરીને રાજકીય નેતાઓ, ઉદ્યોગપતિઓ અને સામાન્ય નાગરિકોના ફોન ગેરકાયદેસર રીતે ટેપ કરવામાં આવ્યા હતા. આરોપ મુજબ, આરોપીઓએ અનેક વ્યક્તિઓની પ્રોફાઇલ બનાવી તેમની જાસૂસી કરી હતી અને બાદમાં પુરાવા નાશ કરવા માટે ઇલેક્ટ્રોનિક ગેજેટ્સમાંથી ડેટા ભૂંસી નાખ્યો હતો. ટી. પ્રભાકર રાવ આ કથિત ષડયંત્રના મુખ્ય સૂત્રધાર હોવાનું પોલીસ માની રહી છે.