ભોપાલ: મધ્યપ્રદેશના રાજકારણમાં આજે ત્યારે ખળભળાટ મચી ગયો જ્યારે કોંગ્રેસના વરિષ્ઠ ધારાસભ્ય ફૂલ સિંહ બારૈયાનો એક વિડિયો સોશિયલ મીડિયા પર વાયરલ થયો. આ વિડિયોમાં તેમણે બળાત્કાર જેવી જઘન્ય ઘટનાને યોગ્ય ઠેરવતા અને અનુસૂચિત જાતિ (SC) તથા આદિવાસી (ST) સમુદાયની મહિલાઓ વિશે અત્યંત વાંધાજનક અને અપમાનજનક ટિપ્પણીઓ કરી છે, જેના કારણે ચારેતરફથી ફિટકાર વરસી રહ્યો છે.
બળાત્કારને ગણાવ્યો 'પુરુષના મનનું વિચલન'
ફેસબુક પર પોસ્ટ કરાયેલા વિડિયોમાં બારૈયાએ વિવાદાસ્પદ તર્ક આપતા કહ્યું કે, "બળાત્કારનો સિદ્ધાંત એ છે કે જો કોઈ વ્યક્તિ રસ્તા પર જતી કોઈ ખૂબસૂરત છોકરીને જોઈ લે, તો તેનું મન વિચલિત થઈ શકે છે અને બળાત્કાર થઈ શકે છે." આટલેથી ન અટકતા તેમણે જાતિગત ટિપ્પણી કરતા પ્રશ્ન પૂછ્યો કે, "આદિવાસી, SC કે OBCમાં કઈ સ્ત્રી અતિ સુંદર છે? તો પછી ત્યાં બળાત્કાર કેમ થાય છે?" તેમણે આ ગુનાઓને 'શાસ્ત્રો' અને 'ધર્મગ્રંથો' સાથે જોડીને દલિત મહિલાઓ વિરુદ્ધ હિંસાને પ્રોત્સાહન આપતો હોય તેવો તર્ક રજૂ કર્યો હતો.
ભાજપનો આકરો પ્રહાર: "આ વિચાર નથી, ગુનો છે"
ભાજપે આ નિવેદનને લઈને કોંગ્રેસ પર પસ્તાળ પાડી છે. ભાજપના મીડિયા પ્રભારી આશિષ અગ્રવાલે જણાવ્યું કે આ કોઈ જીભની લપસી નથી, પરંતુ વિકૃત માનસિકતાનું પ્રદર્શન છે. તેમણે ઉમેર્યું કે મહિલાઓને સુંદરતાના ત્રાજવે તોલવી અને ગરીબ-દલિત મહિલાઓ પરના અત્યાચારને સામાન્ય ગણાવવો એ અત્યંત ખતરનાક વિચાર છે. કેન્દ્રીય મંત્રી શિવરાજ સિંહ ચૌહાણે પણ આ નિવેદન પર દુઃખ વ્યક્ત કરતા કહ્યું કે, "દીકરીઓ દેવી સમાન હોય છે, તેમને જાતિના આધારે વિભાજીત કરવી અસ્વીકાર્ય છે."
કોંગ્રેસ પાસે કાર્યવાહીની માંગ
રાજકીય તોફાન વધતા ભાજપે માંગ કરી છે કે કોંગ્રેસ કાં તો ફૂલ સિંહ બારૈયા પાસે જાહેરમાં માફી મંગાવે અથવા તેમને તાત્કાલિક પક્ષમાંથી હાંકી કાઢે. જો કોંગ્રેસ મૌન રહેશે, તો તેનો અર્થ એ થશે કે તે પણ આ મહિલા વિરોધી અને દલિત વિરોધી વિચારધારાને સમર્થન આપી રહી છે. આ ઘટનાએ ૨૦૨૬ની ચૂંટણીઓ પહેલા મધ્યપ્રદેશમાં જાતિગત અને લિંગ આધારિત સંવેદનશીલતા પર નવી ચર્ચા છેડી દીધી છે.