મુંબઈ:શેરબજારમાં અત્યારે ત્રીજા ક્વાર્ટર (Q3) ના પરિણામોની મોસમ જામી છે. શુક્રવારે બજાર બંધ થયા પછી કેટલીક દિગ્ગજ કંપનીઓએ તેમના નાણાકીય પરિણામો જાહેર કર્યા છે, જે સોમવારે બજાર ખુલતાની સાથે જ હલચલ મચાવી શકે છે. ખાસ કરીને ૪ કંપનીઓએ નફાના મામલે તમામ અંદાજોને પાછળ છોડી દીધા છે. કોઈનો નફો ૪ ગણો વધ્યો છે તો કોઈએ ૩૩ ગણો નફો કરીને ઈતિહાસ રચ્યો છે.
૧. SML મહિન્દ્રા: નફામાં ૩૩ ગણો ધરખમ ઉછાળો: BSE સ્મોલકેપની કંપની SML મહિન્દ્રાએ બજારને ચોંકાવી દીધું છે. કંપનીનો ચોખ્ખો નફો ગયા વર્ષના ₹૦.૫૩ કરોડથી વધીને સીધો ₹૧૭.૫ કરોડ પર પહોંચી ગયો છે. એટલે કે નફામાં સીધો ૩૩ ગણો વધારો! કંપનીની આવક પણ ૬૨% વધીને ₹૫૩૯ કરોડ થઈ છે, જે રોકાણકારો માટે જેકપોટ સાબિત થઈ શકે છે.
૨. ઇન્ડોસોલર: સોલર સેક્ટરમાં તેજીની લહેર: ઇલેક્ટ્રિકલ ઇક્વિપમેન્ટ ક્ષેત્રની કંપની ઇન્ડોસોલરનો નફો વાર્ષિક ધોરણે ૪ ગણો વધીને ₹૪૧.૫ કરોડ થયો છે. કંપનીની આવકમાં ૯૪% નો તોતિંગ વધારો જોવા મળ્યો છે. સૌથી મહત્વની વાત એ છે કે કંપનીનું માર્જિન ૨૨.૭% થી વધીને ૩૫.૫% થયું છે, જે કંપનીની મજબૂત ઓપરેશનલ પકડ દર્શાવે છે.
૩. પૂનાવાલા ફિનકોર્પ: ૮ ગણો નફો અને મજબૂત આવક: NBFC સેક્ટરની જાણીતી કંપની પૂનાવાલા ફિનકોર્પનો નફો પણ વાર્ષિક ધોરણે ૮ ગણો વધીને ₹૧૫૦ કરોડ થયો છે. કંપનીની નેટ ઇન્ટરેસ્ટ ઇન્કમ (NII) માં પણ ૫૦% નો વધારો નોંધાયો છે. ધિરાણ ક્ષેત્રે કંપનીની વધતી જતી પહોંચ આ આંકડાઓમાં સ્પષ્ટ દેખાઈ રહી છે.
૪. RBL બેંક: નફામાં ૭ ગણો ઉછાળો: બેંકિંગ સેક્ટરમાં RBL બેંકે શાનદાર દેખાવ કર્યો છે. બેંકનો નફો ₹૩૩ કરોડથી વધીને ₹૨૧૪ કરોડ થયો છે. જોકે આ આંકડો વિશ્લેષકોના અંદાજ કરતા થોડો ઓછો છે, પરંતુ વાર્ષિક ધોરણે ૭ ગણો નફો બેંકની સુધરતી સ્થિતિ અને એસેટ ક્વોલિટી તરફ ઈશારો કરે છે. બેંકની વ્યાજની આવકમાં પણ ૪.૬% નો વધારો થયો છે.
(ડિસ્ક્લેમર: શેરબજારમાં રોકાણ જોખમોને આધીન છે. કોઈપણ રોકાણ કરતા પહેલા તમારા નાણાકીય સલાહકારની મદદ અવશ્ય લેવી.)