પટના : બિહારની રાજધાની પટનામાં મેડિકલ પ્રવેશ પરીક્ષા (NEET) ની તૈયારી કરતી એક યુવતીના રહસ્યમય સંજોગોમાં થયેલા મોત બાદ રાજકીય અને સામાજિક ગરમાવો વધી ગયો છે. આ મામલે શનિવારે 'જન સુરાજ' ના સ્થાપક પ્રશાંત કિશોરે પટના એસએસપી (SSP) કાર્તિકેય કે શર્મા સાથે મુલાકાત કરી હતી. કિશોરે આક્ષેપ કર્યો છે કે પોલીસ પીડિત પરિવારને ન્યાય આપવાને બદલે કેસ દબાવવા માટે દબાણ કરી રહી છે અને તેમને લાંચ આપવાની ઓફર પણ કરવામાં આવી છે.
શું પોલીસ કેસ રફેદફે કરવા માંગે છે?
પીડિત પરિવારને મળ્યા બાદ પ્રશાંત કિશોરે પત્રકારો સમક્ષ ચોંકાવનારા ખુલાસા કર્યા હતા. તેમણે કહ્યું કે, "છોકરી સાથે જે બન્યું તે જોતા સ્પષ્ટ લાગે છે કે તેને હેરાન કરવામાં આવી હતી. પરિવારે આરોપ લગાવ્યો છે કે તપાસ કરનારા અધિકારીઓ પક્ષપાતી વલણ અપનાવી રહ્યા છે. એટલું જ નહીં, ૧૨ જાન્યુઆરીએ જ્યારે પરિવારે ન્યાય માટે વિરોધ પ્રદર્શન કર્યું ત્યારે પોલીસે તેમના પર નિર્મમ લાઠીચાર્જ કર્યો હતો." કિશોરે માંગ કરી છે કે SIT દ્વારા નિષ્પક્ષ તપાસ થાય અને દોષિતોને કડક સજા મળે.
પોલીસનો દાવો: જાતીય હુમલાના પુરાવા નથી
બીજી તરફ, પટના પોલીસે હજુ સુધી આ મામલે કોઈ જાતીય હુમલાની પુષ્ટિ કરી નથી. એએસપી અભિનવ કુમારે જણાવ્યું હતું કે, યુવતીનું પોસ્ટમોર્ટમ વીડિયોગ્રાફી હેઠળ મેડિકલ બોર્ડ દ્વારા કરવામાં આવ્યું છે. અત્યાર સુધીના મેડિકલ રિપોર્ટમાં સેક્સ્યુઅલ એસોલ્ટના કોઈ પુરાવા મળ્યા નથી. પોલીસે લોકોને અપીલ કરી છે કે તેઓ અફવાઓ પર ધ્યાન ન આપે અને કાયદો પોતાના હાથમાં ન લે.
તપાસનો વ્યાપ વધારતી SIT
પટના એસએસપીએ ખાતરી આપી છે કે મામલાની ગંભીરતાને જોતા એક ખાસ તપાસ ટીમ (SIT) બનાવવામાં આવી છે. હોસ્ટેલના સંચાલકો અને મેનેજરની લાંબી પૂછપરછ કરવામાં આવી છે, જોકે હજુ સુધી કોઈની ધરપકડ કરવા માટે પૂરતા પુરાવા મળ્યા નથી. એડીજી (નબળા વર્ગો) પણ આ તપાસમાં સીધી દેખરેખ રાખી રહ્યા છે.