પ્રયાગરાજ: ઉત્તર પ્રદેશના પ્રયાગરાજમાં મૌની અમાસના પવિત્ર પર્વ પર આજે આસ્થાનો ઘોડાપૂર ઉમટ્યો છે, પરંતુ આ ભક્તિમય વાતાવરણમાં ત્યારે તણાવ સર્જાયો જ્યારે જ્યોતિષપીઠના શંકરાચાર્ય સ્વામી અવિમુક્તેશ્વરાનંદ સરસ્વતીએ પવિત્ર સ્નાનનો બહિષ્કાર કરવાની જાહેરાત કરી. તેમણે પ્રશાસન પર અત્યંત ગંભીર આરોપ લગાવતા કહ્યું કે, મેળાના અધિકારીઓ તેમના શિષ્યો સાથે ગેરવર્તન કરી રહ્યા છે અને તેમને માર મારવા માટે ઈશારા કરી રહ્યા છે. શંકરાચાર્યએ સ્પષ્ટ શબ્દોમાં જણાવ્યું કે જ્યાં સુધી તેમના શિષ્યો સુરક્ષિત નથી અને તેમનું સન્માન જળવાતું નથી, ત્યાં સુધી તેઓ સંગમમાં ડૂબકી નહીં લગાવે. આ જાહેરાતે પ્રશાસનની ઊંઘ ઉડાવી દીધી છે અને મેળા વિસ્તારમાં ભારે ચર્ચા જગાડી છે.
મૌની અમાસના આ અવસરે પ્રયાગરાજમાં ભક્તોનું મહેરામણ એ રીતે ઉમટ્યું છે કે જાણે આખી દુનિયા અહીં વસી ગઈ હોય. મોડી રાત્રે 12 વાગ્યાથી જ 'હર હર ગંગે' ના નાદ સાથે લાખો લોકોએ સંગમ તટ પર ધામા નાખ્યા હતા. પ્રશાસનનો અંદાજ છે કે આજના દિવસે 3 થી 4 કરોડ લોકો પવિત્ર સ્નાન કરશે, જેમાંથી વહેલી સવાર સુધીમાં જ અંદાજે 50 લાખ લોકો ડૂબકી લગાવી ચૂક્યા છે. જોકે, એકતરફ શ્રદ્ધાળુઓ શાંતિપૂર્ણ રીતે સ્નાન કરી રહ્યા છે, ત્યારે બીજી તરફ દેશના સર્વોચ્ચ ધર્મગુરુઓમાંના એક એવા શંકરાચાર્યનો આક્રોશ મેળાના વ્યવસ્થાપન પર સવાલો ઉભા કરી રહ્યો છે.
સુરક્ષાની દૃષ્ટિએ પ્રયાગરાજ અત્યારે અભેદ્ય કિલ્લામાં ફેરવાઈ ગયું છે. 15,000 થી વધુ પોલીસ જવાનો, PAC, RAF અને UP ATS ના કમાન્ડો મેળાની સુરક્ષામાં તૈનાત છે. ભીડને નિયંત્રિત કરવા માટે ડ્રોન કેમેરા અને AI-સક્ષમ CCTV દ્વારા દરેક હિલચાલ પર નજર રાખવામાં આવી રહી છે. સંગમ નોઝ પર લોકોની ભીડ જમા ન થાય તે માટે પોલીસ સતત વ્હિસલ વગાડીને લોકોને આગળ વધવા સૂચના આપી રહી છે. જલ પોલીસ અને NDRF ની ટીમો નદીમાં લાઈફ જેકેટ અને બોટ સાથે ખડેપગે છે જેથી કોઈ અનિચ્છનીય ઘટના ન બને.
આ વિવાદ વચ્ચે પણ ભક્તોની આસ્થા ડગી નથી. ઠંડી અને ગાઢ ધુમ્મસ હોવા છતાં દેશ-વિદેશથી આવેલા શ્રદ્ધાળુઓ રેતીમાં કલ્પવાસ કરી રહ્યા છે. શંકરાચાર્ય અને પ્રશાસન વચ્ચેનો આ ગજગ્રાહ ક્યારે શાંત પડશે તે જોવાનું રહેશે, પરંતુ હાલ તો પ્રયાગરાજમાં એક બાજુ ભક્તિનો રંગ છે અને બીજી બાજુ શાસન-પ્રશાસન સામે સંતોનો રોષ. પોલીસે પરિસ્થિતિને થાળે પાડવા અને શંકરાચાર્યને મનાવવાના પ્રયાસો હાથ ધર્યા છે જેથી આ પવિત્ર પર્વ પર કોઈ ડાઘ ન લાગે.