રાયપુર:છત્તીસગઢની રાજધાની રાયપુરમાંથી એક એવો કિસ્સો પ્રકાશમાં આવ્યો છે જેણે પોલીસ અને જનતા બંનેને સ્તબ્ધ કરી દીધા છે. હાઈ-ટેક ક્રિપ્ટો કરન્સી અને જટિલ શેરબજારના નામે છેતરપિંડી કરનાર શખ્સ કોઈ મોટો ડિગ્રીધારી એન્જિનિયર નહીં, પરંતુ માત્ર છઠ્ઠા ધોરણ સુધી ભણેલો યુવક નીકળ્યો છે. રાયપુર એન્ટી-ક્રાઈમ એન્ડ સાયબર યુનિટ અને પાંડ્રી પોલીસે એક સંયુક્ત ઓપરેશન હાથ ધરીને કુલદીપ ભાટફરી નામના આ 'ડિજિટલ ઠગ'ની ધરપકડ કરી છે. આ યુવકે પોતાની વાકપટુતા અને ખોટા વચનોના જોરે બે ડઝનથી વધુ સુશિક્ષિત લોકોને નિશાન બનાવીને ₹૧,૩૫,૧૪,૦૦૦ ની મસમોટી રકમ સાફ કરી નાખી હતી.

આ કૌભાંડનો પર્દાફાશ ત્યારે થયો જ્યારે રાયપુરના અમિત દાસ નામના વ્યક્તિએ પાંડ્રી પોલીસ સ્ટેશનમાં ફરિયાદ નોંધાવી. વર્ષ ૨૦૨૧-૨૨માં કુલદીપ આ ફરિયાદીના સંપર્કમાં આવ્યો હતો અને પોતાની ઓળખ શેરબજાર, IPO, NSE અને CDSL ના મસમોટા રોકાણ સલાહકાર તરીકે આપી હતી. કુલદીપે 'માસિક KB પ્લાન' નામની એક આકર્ષક સ્કીમ બતાવી હતી, જેમાં રોકાણ કરવાથી દર મહિને અધધ વ્યાજ મળવાની લાલચ આપી હતી. તેની જાળમાં ફસાઈને અમિત દાસ અને તેના ભાઈએ અંદાજે ₹૧૫.૬૦ લાખ ઓનલાઈન અને રોકડા ગુમાવ્યા હતા. શરૂઆતમાં વિશ્વાસ જીતવા માટે આરોપીએ થોડા મહિના વ્યાજ ચૂકવ્યું, પરંતુ ડિસેમ્બર ૨૦૨૪માં તે કરોડો રૂપિયા લઈને ગાયબ થઈ ગયો હતો.

પોલીસ તપાસમાં બહાર આવ્યું છે કે કુલદીપ ભાટફરી કોઈ સાધારણ ગુનેગાર નથી, તે અગાઉ પણ આવી જ છેતરપિંડીના આરોપમાં ટિકરાપારા પોલીસ સ્ટેશન હેઠળ જેલની હવા ખાઈ ચૂક્યો છે. જેલમાંથી છૂટ્યા પછી પણ તેણે પોતાનો રસ્તો બદલવાને બદલે વધુ મોટા પાયે લોકોના ખિસ્સા ખાલી કરવાનું શરૂ કર્યું હતું. તે પોતાની જાતને માર્કેટ એક્સપર્ટ તરીકે રજૂ કરતો હતો અને લોકોના મોબાઈલમાં નકલી ટ્રેડિંગ ગ્રાફ બતાવીને તેમને પ્રભાવિત કરતો હતો. તેની પાસેથી અત્યારે પોલીસે હાઈ-ટેક કમ્પ્યુટર સિસ્ટમ, લેપટોપ અને બે મોબાઈલ ફોન જપ્ત કર્યા છે, જેની મદદથી તે આખું નેટવર્ક ચલાવતો હતો.

હાલમાં પાંડ્રી પોલીસ સ્ટેશનમાં આરોપી વિરુદ્ધ છેતરપિંડીની વિવિધ કલમો હેઠળ કેસ નોંધવામાં આવ્યો છે. પોલીસને આશંકા છે કે પીડિતોની સંખ્યા ૨૬ થી પણ વધી શકે છે, કારણ કે અત્યારે ઘણા લોકો પોતાની ફરિયાદ લઈને સામે આવી રહ્યા છે. આ ઘટનાએ સાબિત કરી દીધું છે કે સાયબર ગુનેગારોને ભણતર કરતા લોકોની લાલચનો ફાયદો ઉઠાવતા વધુ સારી રીતે આવડે છે. પોલીસે લોકોને અપીલ કરી છે કે કોઈપણ બિન-અધિકૃત વ્યક્તિ દ્વારા આપવામાં આવતી ઊંચા વ્યાજની લાલચમાં ન આવવું અને રોકાણ કરતા પહેલા તેની અધિકૃતતાની તપાસ કરવી.