પણજી/અરમ્બોલ: પ્રવાસીઓના સ્વર્ગ ગણાતા ગોવામાં બે રશિયન મહિલાઓની નિર્મમ હત્યાથી સનસનાટી મચી ગઈ છે. ૩૭ વર્ષીય રશિયન નાગરિક એલેક્સી લિયોનોવ પર આરોપ છે કે તેણે ઉત્તર ગોવાના અરમ્બોલમાં તેની લિવ-ઇન પાર્ટનર એલેના કાસ્તાનોવાની અત્યંત ક્રૂરતાપૂર્વક હત્યા કરી છે. શુક્રવારે જ્યારે પાડોશીઓએ ચીસો સાંભળી ત્યારે મકાનમાલિકને જાણ કરવામાં આવી હતી. પોલીસ પહોંચે તે પહેલા જ લિયોનોવ પહેલા માળેથી કૂદીને ભાગી છૂટ્યો હતો, પરંતુ પોલીસે ગણતરીના કલાકોમાં સવારે ૪ વાગ્યે તેને દબોચી લીધો હતો. રૂમની અંદરનો નજારો ભયાનક હતો; એલેનાનું ગળું કાપેલું હતું અને તેના હાથ દોરડાથી પાછળની તરફ બાંધેલા હતા.

પોલીસ કસ્ટડીમાં લિયોનોવે જે કબૂલાત કરી તેણે તપાસ અધિકારીઓના હોશ ઉડાવી દીધા છે. તેણે માત્ર એલેના જ નહીં, પરંતુ ૧૪ જાન્યુઆરીએ મોર્જિમ ગામમાં મળી આવેલી અન્ય એક રશિયન મહિલા, એલેના વનેવાની હત્યાની પણ કબૂલાત કરી છે. પોલીસને બંને હત્યાઓમાં એક સમાન પેટર્ન જોવા મળી છે, જેમાં પીડિતોના હાથ બાંધીને ગળું દબાવવામાં આવ્યું હતું. આરોપીએ પૂછપરછમાં એવો પણ દાવો કર્યો છે કે તેણે આસામની એક ૪૦ વર્ષીય મહિલાની પણ હત્યા કરી છે જેને તે ડ્રગ્સ આપતો હતો. લિયોનોવના આ દાવાઓએ ગોવા પોલીસને વિચારતા કરી દીધા છે કે શું તેમની પકડમાં કોઈ ખતરનાક 'સીરીયલ કિલર' આવ્યો છે?

જોકે, તપાસમાં એક મોટો પડકાર એ છે કે આરોપી લિયોનોવ વારંવાર પોતાના નિવેદનો બદલી રહ્યો છે. પોલીસના જણાવ્યા અનુસાર, તે લાંબા સમયથી ડ્રગ્સના નશામાં હોવાનું જણાય છે, જેના કારણે તેના તમામ દાવાઓની સત્યતા તપાસવી અનિવાર્ય બની છે. અત્યાર સુધીમાં બે રશિયન મહિલાઓના મૃતદેહ મળી આવ્યા છે, જ્યારે આસામની મહિલાના કેસમાં હજુ પુરાવા એકત્રિત કરવામાં આવી રહ્યા છે. પરનેમના જ્યુડિશિયલ મેજિસ્ટ્રેટે આરોપીને ૧૪ દિવસની પોલીસ કસ્ટડીમાં મોકલી દીધો છે. ફોરેન્સિક ટીમ અને સાયબર નિષ્ણાતો હવે લિયોનોવના મોબાઈલ અને ભૂતકાળની ગતિવિધિઓની ઝીણવટભરી તપાસ કરી રહ્યા છે.

આ ઘટનાએ ગોવામાં વિદેશી પ્રવાસીઓની સુરક્ષા પર ફરી એકવાર સવાલો ઉભા કર્યા છે. ગોવા પોલીસ અન્ય રાજ્યોની પોલીસ સાથે પણ સંપર્ક કરી રહી છે જેથી જાણી શકાય કે લિયોનોવે ગોવાની બહાર ક્યાંય આવી જ પેટર્નથી હત્યાઓ કરી છે કે કેમ. પ્રારંભિક તપાસમાં એવું પણ સામે આવ્યું છે કે આરોપી અને તેની પાર્ટનર વચ્ચે વારંવાર ઝઘડા થતા હતા, પરંતુ આટલી હિંસક હત્યા પાછળનું ચોક્કસ કારણ હજુ રહસ્યમાં છે. ગોવા પોલીસ આ કેસને અત્યંત ગંભીરતાથી લઈ રહી છે અને ટૂંક સમયમાં મોટા ખુલાસા થવાની શક્યતા છે