નવી દિલ્હી/તેહરાન: ઈરાનની રાજધાની તેહરાન અત્યારે માત્ર એક શહેર નથી, પરંતુ યુદ્ધનું મેદાન બની ગયું છે. ત્યાં ફસાયેલા ભારતીય વિદ્યાર્થીઓ જ્યારે શુક્રવારે મોડી રાત્રે દિલ્હીના ઈન્દિરા ગાંધી આંતરરાષ્ટ્રીય એરપોર્ટ પર ઉતર્યા, ત્યારે તેમની આંખોમાં જીવ બચ્યાનો સંતોષ અને વિતાવેલી રાતોનો ફફડાટ સ્પષ્ટ દેખાતો હતો. તેહરાન મેડિકલ યુનિવર્સિટીની MBBSની વિદ્યાર્થીની ઝોયા સૈયદે ધ્રૂજતા અવાજે જણાવ્યું કે, "અમે જીવિત છીએ કે નહીં તે ઘરના લોકોને કહેવા માટે પણ અમારી પાસે કોઈ સાધન નહોતું. ઈન્ટરનેટ અને ફોન સેવાઓ સંપૂર્ણપણે કાપી નાખવામાં આવી હતી." દિલ્હી એરપોર્ટ પર જ્યારે આ વિદ્યાર્થીઓ પહોંચ્યા ત્યારે ફૂલોના હાર અને ભીની આંખો સાથે માતા-પિતાએ તેમનું સ્વાગત કર્યું, જે દ્રશ્યોએ ત્યાં હાજર દરેક વ્યક્તિની આંખો ભીની કરી દીધી હતી.

ઈરાનના વિવિધ શહેરો જેવા કે અરક, કોમ, શિરાઝ અને મશહદમાં પરિસ્થિતિ એટલી ભયાનક છે કે ત્યાંની પ્રતિષ્ઠિત યુનિવર્સિટીઓને અત્યારે લશ્કરી છાવણીઓમાં ફેરવી દેવામાં આવી છે. MBBSના વિદ્યાર્થી આમિરે જણાવ્યું કે તેહરાન અને તબરીઝમાં અઘોષિત કર્ફ્યુ જેવી સ્થિતિ છે. બજારો બંધ છે અને ખાવા-પીવાની ચીજવસ્તુઓની ભારે અછત સર્જાઈ છે. સૌથી વધુ દયનીય સ્થિતિ વિદ્યાર્થિનીઓની છે, જેઓ ભયના માર્યા હોસ્ટેલના રૂમમાં કેદ છે. બે મહિના પહેલા જ ડોક્ટર બનવાનું સપનું લઈને અમરોહાથી ઈરાન ગયેલા યુસરા અને અર્શના સપનાઓ અત્યારે હિંસાના ધુમાડામાં ક્યાંક ખોવાઈ ગયા છે. તેઓ કહે છે કે તેમના સપના પૂરા થાય તે પહેલા જ કુદરતે તેમની કસોટી કરી લીધી.

આ અંધાધૂંધી વચ્ચે ભારતીય ત્રિરંગો એક રક્ષક બનીને સામે આવ્યો હતો. શબૂર અલી નામના વિદ્યાર્થીએ જણાવ્યું કે જ્યારે તેઓ એરપોર્ટ તરફ જઈ રહ્યા હતા, ત્યારે ઠેર-ઠેર હથિયારબંધ સૈનિકો તૈનાત હતા. પરંતુ ગાડી પર લાગેલો ભારતીય ત્રિરંગો જોતા જ સુરક્ષા કર્મચારીઓનો વ્યવહાર બદલાઈ જતો હતો. "ભારતીય ધ્વજ જોઈને સૈનિકોએ અમને માન સન્માન આપ્યું અને ભીડભાડવાળા રસ્તાઓ પરથી બહાર નીકળવામાં મદદ કરી," તેમ મુસાફરોએ જણાવ્યું. ભારત સરકાર અને દૂતાવાસના સતત પ્રયાસોને કારણે જ આ વિદ્યાર્થીઓ કોમર્શિયલ ફ્લાઈટ્સ દ્વારા સુરક્ષિત રીતે વતન પરત ફરી શક્યા છે. ત્રિરંગાની તાકાતે આજે વિદેશી ધરતી પર સેંકડો ભારતીયોના જીવ બચાવ્યા છે.

જોકે, હજુ પણ અનેક ભારતીયો ત્યાં ફસાયેલા છે અને તેમના પરિવારો ચિંતામાં ડૂબેલા છે. ગાઝિયાબાદના મર્ચન્ટ નેવી એન્જિનિયર કેતન મહેતા પણ ઈરાનમાં ફસાયેલા હોવાના સમાચાર છે, પરંતુ હવે વિદ્યાર્થીઓની વાપસી જોઈને તેમના પરિવારમાં આશાનું કિરણ જાગ્યું છે. દિલ્હી પરત ફરેલા ૧૨-૧૩ મુસાફરોના જૂથમાં સામેલ અલી નકવીએ કહ્યું કે, તેઓ ખૂબ જ મુશ્કેલીથી અને મોતને વહાલી કરીને પાછા ફરવામાં સફળ રહ્યા છે. ઈરાનમાં ચાલી રહેલા સરકાર વિરોધી પ્રદર્શનો અને હિંસા વચ્ચે હવે દરેક ભારતીય પ્રાર્થના કરી રહ્યો છે કે ત્યાં ફસાયેલો છેલ્લો ભારતીય પણ જલ્દી સુરક્ષિત રીતે વતનની ધરતી પર પગ મૂકે.