દાવોસ : સ્વિટ્ઝર્લૅન્ડના દાવોસમાં સોમવાર, ૧૯ જાન્યુઆરીથી વિશ્વ આર્થિક મંચ (WEF) ની ૫૬મી વાર્ષિક બેઠકનો ભવ્ય પ્રારંભ થઈ રહ્યો છે. આ વર્ષે રેકોર્ડબ્રેક ૩,૦૦૦ થી વધુ વૈશ્વિક હસ્તીઓ આ મંચ પર એકઠી થઈ રહી છે, જેમાં ૬૪ દેશોના વડાઓ અને ૧,૭૦૦ થી વધુ દિગ્ગજ કંપનીઓના CEOનો સમાવેશ થાય છે. ૧૯૭૧માં એક નાનકડા મેનેજમેન્ટ ફોરમ તરીકે શરૂ થયેલું આ સંગઠન આજે વૈશ્વિક નીતિઓ ઘડવાનું મુખ્ય કેન્દ્ર બની ગયું છે. ખાસ કરીને હાર્વર્ડના પ્રોફેસર ક્લાઉસ શ્વાબ દ્વારા રજૂ કરાયેલા 'સ્ટેકહોલ્ડર કેપિટલિઝમ'ના વિચારને કારણે આજે દુનિયાની ૧,૦૦૦ થી વધુ અગ્રણી કંપનીઓ આ ફોરમ સાથે જોડાયેલી છે.

આ વખતની બેઠકમાં આર્ટિફિશિયલ ઇન્ટેલિજન્સ (AI), ચીનનો આર્થિક વિકાસ અને વધતી જતી ભૂ-રાજકીય અસ્થિરતા જેવા વિષયો કેન્દ્રસ્થાને રહેવાના છે. દાવોસનું આ મંચ ઇતિહાસમાં અનેક મોટા ફેરફારોનું સાક્ષી રહ્યું છે. ૧૯૯૨માં નેલ્સન મંડેલાની ઐતિહાસિક મુલાકાત હોય કે ૧૯૯૮માં G20 જેવી શક્તિશાળી વ્યવસ્થાના વિચારનું સર્જન, WEF એ હંમેશા સંકટના સમયે દુનિયાને નવી દિશા ચીંધી છે. ભલે આ મંચ પાસે સીધી કાયદાકીય સત્તા નથી, પરંતુ અહીં લેવાયેલા અનૌપચારિક નિર્ણયો અને 'નેટવર્કિંગ' વિશ્વના વેપાર અને સંરક્ષણ નીતિઓને મોટાપાયે પ્રભાવિત કરે છે.

પાંચ દિવસ સુધી ચાલનારા આ કાર્યક્રમમાં ભારત તરફથી પણ હાઈ-પ્રોફાઈલ પ્રતિનિધિમંડળ ભાગ લઈ રહ્યું છે, જે ભારતને 'ગ્લોબલ મેન્યુફેક્ચરિંગ હબ' તરીકે રજૂ કરશે. ૩૦ થી વધુ વિદેશ મંત્રીઓ અને ૬૦ થી વધુ નાણા મંત્રીઓની હાજરી સૂચવે છે કે ૨૦૨૬નું વર્ષ આર્થિક દૃષ્ટિએ ખૂબ જ મહત્ત્વપૂર્ણ રહેવાનું છે. આ બેઠકમાં લેવાનારા નિર્ણયો આગામી સમયમાં મોંઘવારી, નવી નોકરીઓ અને ટેકનોલોજીના નિયમો પર સીધી અસર પાડશે. દાવોસની ઠંડીમાં વિશ્વના નેતાઓ જ્યારે ગરમાગરમ ચર્ચાઓ કરશે, ત્યારે આખું વિશ્વ નવી આર્થિક આશા સાથે તેની તરફ મીટ માંડીને બેઠું હશે.