પટણા: બિહારના વૈશાલી જિલ્લામાંથી કોમી એકતા અને પ્રેમનું એક અનોખું ઉદાહરણ પૂરું પાડતો કિસ્સો પ્રકાશમાં આવ્યો છે. અહીં એક મુસ્લિમ યુવતીએ ધર્મના બંધનો તોડીને પોતાના હિન્દુ પ્રેમી સાથે વિધિવત લગ્ન કર્યા છે. દૈનિક ભાસ્કરના અહેવાલ અનુસાર, આ યુવતી અને યુવક વચ્ચે છેલ્લા ચાર વર્ષથી મિત્રતા હતી જે પ્રેમમાં પરિણમી હતી. લાંબા સમય સુધી એકબીજાને જાણ્યા અને સમજ્યા બાદ બંનેએ જીવનભર સાથે રહેવાનો નિર્ણય લીધો હતો.
આ લગ્નનો વીડિયો સોશિયલ મીડિયા પર ખૂબ વાયરલ થઈ રહ્યો છે. વીડિયોમાં જોઈ શકાય છે કે હિન્દુ યુવક યુવતીની માંગમાં સિંદૂર ભરી રહ્યો છે. રસપ્રદ વાત એ છે કે યુવકે એક કે બે વાર નહીં પરંતુ પાંચ વખત યુવતીની માંગમાં સિંદૂર ભર્યું હતું અને તેને પોતાની પત્ની તરીકે સ્વીકારી હતી. 
લગ્ન બાદ યુવતીએ મીડિયા સમક્ષ નિવેદન આપતા સ્પષ્ટ કર્યું હતું કે તેણે કોઈના દબાણમાં આવીને નહીં પરંતુ પોતાની મરજીથી આ લગ્ન કર્યા છે. તેણે કહ્યું, "મેં મારી રાજીખુશીથી હિન્દુ ધર્મ સ્વીકાર્યો છે અને સનાતન સંસ્કૃતિ મુજબ લગ્ન કર્યા છે."
આ લગ્ન વૈશાલીના એક મંદિરમાં હિન્દુ રીતિ-રિવાજ મુજબ સંપન્ન થયા હતા. યુવતીએ જણાવ્યું હતું કે તે યુવકને છેલ્લા ચાર વર્ષથી ઓળખતી હતી અને બંને વચ્ચે ગાઢ પ્રેમ હતો. બંનેના પરિવારજનોને મનાવવાના પ્રયાસો થયા હતા, પરંતુ જ્યારે પ્રેમ અને ધર્મ વચ્ચે પસંદગી કરવાની આવી ત્યારે યુવતીએ પ્રેમને પ્રાધાન્ય આપ્યું. લગ્ન સમયે યુવક અને યુવતી બંને ખુશ જણાતા હતા.
આ ઘટના બાદ સુરક્ષાના કારણોસર દંપતીએ પોલીસનો સંપર્ક પણ કર્યો હોવાની વિગતો મળી છે. આંતરધર્મીય લગ્ન હોવા છતાં, યુવતીની સ્પષ્ટતા અને મક્કમ નિર્ધારે આ કિસ્સાને ચર્ચાનું કેન્દ્ર બનાવ્યો છે. સોશિયલ મીડિયા પર લોકો આ નવદંપતીને આશીર્વાદ આપી રહ્યા છે અને યુવતીની હિંમતના વખાણ કરી રહ્યા છે.