ઈન્દોર : ભારતીય ક્રિકેટ ચાહકો માટે રવિવારનો દિવસ નિરાશાજનક રહ્યો છે. ઈન્દોર ખાતે રમાયેલી ત્રીજી અને નિર્ણાયક વન-ડે મેચમાં ન્યુઝીલેન્ડે ભારતને ૪૧ રને હરાવીને ૨-૧થી સિરીઝ પોતાના નામે કરી લીધી છે. ન્યુઝીલેન્ડના ક્રિકેટ ઈતિહાસમાં આ પ્રથમ પ્રસંગ છે જ્યારે તેમણે ભારતની ધરતી પર દ્વિપક્ષીય વન-ડે સિરીઝ જીતવામાં સફળતા મેળવી હોય. મુખ્ય કોચ ગૌતમ ગંભીરના માર્ગદર્શન હેઠળ રમી રહેલી ભારતીય ટીમ માટે આ પરાજય મોટો ફટકો માનવામાં આવી રહ્યો છે.
કિવી બેટ્સમેનોનો તરખાટ:
સિરીઝ ૧-૧ની બરાબરી પર હોવાથી આ મેચ બંને ટીમો માટે 'કરો અથવા મરો' સમાન હતી. ન્યુઝીલેન્ડ તરફથી ગ્લેન ફિલિપ્સ અને ડેરીલ મિશેલે શાનદાર સદી ફટકારીને ભારત સામે વિશાળ સ્કોર ખડો કર્યો હતો. ભારતીય બોલરો કિવી બેટ્સમેનો પર અંકુશ મેળવવામાં નિષ્ફળ રહ્યા હતા, જેના કારણે મહેમાન ટીમને મજબૂત સ્થિતિ મળી હતી.
ભારતની નબળી શરૂઆત અને કોહલીની લડત:
લક્ષ્યનો પીછો કરવા ઉતરેલી ભારતીય ટીમની શરૂઆત સારી રહી ન હતી. વિરાટ કોહલીએ એક છેડો સાચવી રાખીને શાનદાર લડત આપી હતી અને જીતની આશા જીવંત રાખી હતી, પરંતુ અન્ય બેટ્સમેનો તરફથી જોઈએ તેવો સાથ ન મળતા ભારત અંતે ૪૧ રન દૂર રહી ગયું હતું. ગત ઓક્ટોબરમાં વન-ડે ટીમની કમાન સંભાળનાર કેપ્ટન શુભમન ગિલ હજુ પણ કેપ્ટન તરીકે પોતાની પ્રથમ સિરીઝ જીતવાની રાહ જોઈ રહ્યો છે.
ભારત માટે ન્યુઝીલેન્ડ બન્યું ‘બોગી ટીમ’:
નોંધનીય છે કે ગયા વર્ષે ન્યુઝીલેન્ડે ભારતને ઘરઆંગણે ટેસ્ટ સિરીઝમાં ૩-૦થી વ્હાઇટવોશ કર્યો હતો અને હવે વન-ડેમાં પણ હાર આપીને સાબિત કરી દીધું છે કે તેઓ તમામ ફોર્મેટમાં ભારત માટે મુશ્કેલ પ્રતિસ્પર્ધી બની રહ્યા છે. સિરીઝની પ્રથમ મેચ જીત્યા બાદ ભારત જે રીતે બીજી અને ત્રીજી મેચમાં લય ગુમાવી બેઠું તે ટીમ મેનેજમેન્ટ માટે ચિંતાનો વિષય છે.
આ ઐતિહાસિક વિજય સાથે ન્યુઝીલેન્ડે વર્ષની ધમાકેદાર શરૂઆત કરી છે, જ્યારે ભારતે ઘરઆંગણે પોતાના પ્રશંસકોની હાજરીમાં સિરીઝ ગુમાવવાનો વારો આવ્યો છે.