અમદાવાદ : ઇન્સ્ટિટ્યૂટ ઓફ ચાર્ટર્ડ એકાઉન્ટન્ટ્સ ઓફ ઇન્ડિયા (ICAI) એ CA ઇન્ટરમીડિયેટ જાન્યુઆરી-2026 ની પરીક્ષાના સમયપત્રકમાં મહત્વનો ફેરફાર કર્યો છે. સંસ્થા દ્વારા જારી કરાયેલ સત્તાવાર સૂચના અનુસાર, ગ્રુપ-II ના એક મહત્વના પેપરની તારીખ લંબાવવામાં આવી છે. આ ફેરફારની સીધી અસર એવા વિદ્યાર્થીઓ પર પડશે જેઓ આ વર્ષે પ્રોફેશનલ કોર્સની બીજી સીડી ચડી રહ્યા છે.
કઈ તારીખે લેવાશે હવે પરીક્ષા?
નવા સમયપત્રક મુજબ, CA ઇન્ટરમીડિયેટ (Group II) નું પેપર-5, જે 'ઓડિટિંગ અને એથિક્સ' (Auditing and Ethics) વિષયનું છે, તે અગાઉ ૧૯ જાન્યુઆરી, ૨૦૨૬ ના રોજ લેવાનું આયોજન હતું. હવે આ પરીક્ષા ૩૧ જાન્યુઆરી, ૨૦૨૬ ના રોજ યોજાશે. પરીક્ષાનો સમય બપોરે ૨:૦૦ થી સાંજે ૫:૦૦ વાગ્યાનો (IST) જ રહેશે અને પરીક્ષા કેન્દ્રમાં પણ કોઈ ફેરફાર કરવામાં આવ્યો નથી.
એડમિટ કાર્ડ અંગે સ્પષ્ટતા
ICAI એ સ્પષ્ટતા કરી છે કે જે વિદ્યાર્થીઓને અગાઉથી પ્રવેશપત્રો (Admit Cards) મળી ચૂક્યા છે, તેઓએ નવા કાર્ડ ડાઉનલોડ કરવાની જરૂર નથી. જૂના એડમિટ કાર્ડ જ ૩૧ જાન્યુઆરીની પરીક્ષા માટે માન્ય ગણાશે. જોકે, વિદ્યાર્થીઓને સલાહ આપવામાં આવે છે કે તેઓ સંસ્થાની વેબસાઇટ icai.org પર જઈને સુધારેલું નોટિફિકેશન એકવાર ચોક્કસ વાંચી લે.
બાકીના પેપર્સ યથાવત
નોંધનીય છે કે માત્ર ઇન્ટરમીડિયેટના પેપર-૫ માં જ ફેરફાર થયો છે. સીએ ફાઉન્ડેશન (CA Foundation) જાન્યુઆરી ૨૦૨૬ ની પરીક્ષાના બાકીના તમામ પેપર્સ તેના નિર્ધારિત સમયપત્રક મુજબ એટલે કે ૨૦, ૨૨ અને ૨૪ જાન્યુઆરીના રોજ જ લેવામાં આવશે. વિદ્યાર્થીઓએ અન્ય પેપર્સ માટે અગાઉના ટાઈમટેબલને જ અનુસરવાનું રહેશે.
કેવી રીતે ચેક કરશો નવું શિડ્યુલ?
•    સૌ પ્રથમ ICAI ની સત્તાવાર વેબસાઇટ icai.org પર જાઓ.
•    હોમ પેજ પર 'Important Announcements' સેક્શનમાં 'Revised Schedule for CA Inter Jan 2026' લિંક પર ક્લિક કરો.
•    ત્યાંથી પીડીએફ ફાઇલ ડાઉનલોડ કરી તમારી પાસે સાચવી રાખો.
શિક્ષણ વિશેષ: પરીક્ષાની તારીખ લંબાવવાથી વિદ્યાર્થીઓને ઓડિટિંગ જેવા અઘરા વિષયની તૈયારી માટે વધારાના ૧૨ દિવસનો સમય મળશે, જે રિવીઝન માટે ખૂબ જ મહત્વના સાબિત થઈ શકે છે.