નવી દિલ્હી: મધ્ય પૂર્વના આકાશમાં ફરી એકવાર યુદ્ધના વાદળો ઘેરાવા લાગ્યા છે. અમેરિકા અને ઈરાન વચ્ચેનો તણાવ હવે ચરમસીમાએ પહોંચ્યો હોય તેમ લાગી રહ્યું છે. તાજા રિપોર્ટ અનુસાર, અમેરિકાએ હિંદ મહાસાગરમાં આવેલા તેના વ્યૂહાત્મક સૈન્ય મથક 'ડિએગો ગાર્સિયા' પર અસામાન્ય પ્રવૃત્તિ તેજ કરી દીધી છે. અમેરિકાની આ હલચલ વર્ષો પહેલા વેનેઝુએલા પર લશ્કરી દબાણ લાવતી વખતે જોવા મળેલી પેટર્ન જેવી જ છે, જેનાથી અટકળો તેજ થઈ છે કે શું હવે ઈરાનનો વારો છે?
 C-17 ગ્લોબમાસ્ટર્સની જમાવટ: પરિસ્થિતિ ત્યારે વધુ ગંભીર બની જ્યારે ફ્લાઇટ-ટ્રેકિંગ ડેટામાં વધુ બે યુએસ એરફોર્સ C-17 ગ્લોબમાસ્ટર III ટ્રાન્સપોર્ટ વિમાનો મધ્ય પૂર્વમાં ઉતરતા જોવા મળ્યા. આ વિમાનો ૧,૭૦,૯૦૦ પાઉન્ડ જેટલો તોતિંગ કાર્ગો વહન કરવા અને ટૂંકા રનવે પરથી પણ ઓપરેટ કરવા માટે સક્ષમ છે. તેની હાજરી સૂચવે છે કે અમેરિકા મોટા પાયે સૈન્ય સાધનો અથવા દળોની હેરફેર કરી રહ્યું છે.
અમેરિકી રાષ્ટ્રપતિ ડોનાલ્ડ ટ્રમ્પે સોશિયલ મીડિયા પર જાહેરાત કરી હતી કે તેમનો ઈરાદો હાલ લશ્કરી હુમલો કરવાનો નથી, પરંતુ તેમણે ઈરાનમાં 'નેતૃત્વ પરિવર્તન' (Leadership Change) ના સ્પષ્ટ સંકેત આપ્યા છે. ટ્રમ્પ દ્વારા ઈરાનના સુપ્રીમ લીડર આયાતુલ્લાહ અલી ખામેનીની સતત ટીકા કરવામાં આવી રહી છે. આ નિવેદનો અને બીજી બાજુ લશ્કરી જમાવટ વચ્ચેનો વિરોધાભાસ ઈરાન માટે ચિંતાનો વિષય બન્યો છે.
અમેરિકાની નૌકાદળ શક્તિ પણ ઈરાન તરફ આગળ વધી રહી છે. રિપોર્ટ અનુસાર, અમેરિકન એરક્રાફ્ટ કેરિયર 'USS અબ્રાહમ લિંકન' ૨૩ જાન્યુઆરી સુધીમાં અરબી સમુદ્રમાં પહોંચી શકે છે. તેની સાથે આધુનિક યુદ્ધ જહાજો અને સબમરીનનો કાફલો પણ પેટ્રોલિંગ કરી રહ્યો છે. ઈરાનના રાષ્ટ્રપતિ પેઝેશ્કિયાને ચેતવણી આપી છે કે ખામેની પર કોઈપણ પ્રકારનો હુમલો સીધો યુદ્ધની ઘોષણા સમાન ગણાશે.
ડિએગો ગાર્સિયા બેઝ એટલો વ્યૂહાત્મક છે કે ત્યાંથી અમેરિકા સમગ્ર મધ્ય પૂર્વ અને એશિયા પર નજર રાખી શકે છે. અહીં ફાઇટર જેટ્સ અને ટેન્કર વિમાનોની જમાવટ એ વાતનો પુરાવો છે કે અમેરિકા કોઈ મોટા 'સરપ્રાઈઝ' મિશનની તૈયારીમાં હોઈ શકે છે. જો ઈરાનની આર્થિક ઘેરાબંધી અને લશ્કરી દબાણ વધશે, તો તેની હાલત પણ વેનેઝુએલા જેવી જર્જરિત થઈ શકે છે.
૨૩ જાન્યુઆરી પછી મધ્ય પૂર્વની સ્થિતિ નિર્ણાયક વળાંક લેશે. જો એરક્રાફ્ટ કેરિયરની પોઝિશન ઈરાનની જળસીમાની નજીક હશે, તો તે યુદ્ધની ચિનગારી ચાંપી શકે છે.