નવી દિલ્હી: ટેકનોલોજીની દુનિયામાં એક મોટી ક્રાંતિના ભણકારા વાગી રહ્યા છે. છેલ્લા ત્રણ મહિનામાં અમેરિકા અને ચીનની કેટલીક અગ્રણી કંપનીઓએ જાહેરાત કરી છે કે તેઓ માણસ જેવા દેખાતા એટલે કે ‘હ્યુમનોઇડ’ રોબોટ્સનું મોટા પાયે ઉત્પાદન કરવા જઈ રહ્યા છે. આ કંપનીઓનો દાવો છે કે આવા રોબોટ્સ હવે વ્યાપારી ધોરણે ઉપયોગી થવાની અણી પર છે. સંશોધકોના મતે છેલ્લા પાંચ વર્ષમાં રોબોટના સ્પેરપાર્ટ્સ સસ્તા થયા છે અને બેટરીની ક્ષમતામાં મોટો સુધારો થયો છે, જેને કારણે આ ક્ષેત્રમાં બદલાવ આવ્યો છે.
હાલમાં આ રોબોટ્સનો ઉપયોગ કાર મેન્યુફેક્ચરિંગ એટલે કે કાર બનાવતી ફેક્ટરીઓમાં પ્રાયોગિક ધોરણે શરૂ કરવામાં આવ્યો છે. ગૂગલ ડીપમાઈન્ડના રોબોટિક્સ ટીમના લીડર કેરોલિના પરાડાના જણાવ્યા મુજબ, કાર ઉત્પાદન ક્ષેત્ર આ રોબોટ્સના પરીક્ષણ માટે એક આદર્શ જગ્યા છે. જોકે, આ રોબોટ્સ કંપનીઓનો સમય કે પૈસા બચાવી રહ્યા છે કે કેમ તે જોવું હજુ બાકી છે. ઘણા કાર્યો માટે હજુ પણ માનવ ઓપરેટરોની જરૂર પડે છે.
ઉપરાંત, કેટલાક નિષ્ણાતો અને સંશોધકો માને છે કે તકનીકી મર્યાદાઓ અને સલામતીના કારણોસર આ રોબોટ્સ હમણાં જલ્દી આપણા ઘરો કે ઓફિસોમાં જોવા મળશે નહીં. જ્યાં સુધી આ રોબોટ્સ સંપૂર્ણપણે સલામત અને ખર્ચની દ્રષ્ટિએ પોસાય તેવા ન બને ત્યાં સુધી સામાન્ય માણસ માટે તેનો ઉપયોગ દૂરની વાત છે. તેમ છતાં, ફેક્ટરીઓમાં તેમની એન્ટ્રી એ ભવિષ્યની દિશામાં એક મહત્વપૂર્ણ પગલું ગણી શકાય.