પ્રયાગરાજ: પવિત્ર માઘ મેળાના પાવન અવસરે પ્રયાગરાજના સંગમ તટે એક નવો વિવાદ છેડાયો છે. જ્યોતિષપીઠના શંકરાચાર્ય સ્વામી અવિમુક્તેશ્વરાનંદ સરસ્વતી રવિવાર બપોરથી અન્ન-જળનો ત્યાગ કરી ભૂખ હડતાળ પર બેસી ગયા છે. શંકરાચાર્યની માંગ છે કે તેમને અને તેમની પાલખીને પૂરા સન્માન અને પ્રોટોકોલ સાથે ગંગામાં સ્નાન કરવા માટે જવા દેવામાં આવે. વહીવટીતંત્રના વલણથી નારાજ શંકરાચાર્યએ સરકાર પર તેમને જાણીજોઈને પાઠ ભણાવવાનો અને બેવડા ધોરણો અપનાવવાનો આરોપ લગાવ્યો છે.
રવિવારે મૌની અમાવાસ્યાના દિવસે જ્યારે ૪.૫ કરોડથી વધુ શ્રદ્ધાળુઓ સંગમમાં ડૂબકી લગાવી રહ્યા હતા, ત્યારે શંકરાચાર્ય સ્વામી અવિમુક્તેશ્વરાનંદ તેમના સેંકડો અનુયાયીઓ અને પાલખી સાથે સંગમ નાક તરફ આગળ વધ્યા હતા. ભીડને જોતા પોલીસે તેમને પાલખી છોડીને પગપાળા સ્નાન કરવા વિનંતી કરી હતી, પરંતુ શંકરાચાર્ય પ્રોટોકોલની માંગ પર અડગ રહ્યા. આ દરમિયાન ભક્તો અને પોલીસ વચ્ચે ઝપાઝપી થઈ હતી અને સીસીટીવી ફૂટેજમાં સમર્થકો બેરિકેડ તોડતા પણ કેદ થયા છે.
શંકરાચાર્યએ અત્યંત ગંભીર આરોપો લગાવ્યા, તેમણે કહ્યું કે, "સરકારના ઈશારે મારી સાથે આવું વર્તન કરવામાં આવ્યું છે. મૌની અમાવાસ્યાના દિવસે મારી હત્યા કરવાનું કાવતરું ઘડવામાં આવ્યું હતું." તેમણે અન્ય એક જાણીતા સંતનું નામ લીધા વગર નિશાન સાધતા કહ્યું કે, જો બીજા સંતોને VIP સ્નાનની સુવિધા મળી શકે તો શંકરાચાર્યને કેમ નહીં?
 બીજી તરફ, પ્રયાગરાજ વિભાગીય કમિશનર સૌમ્ય અગ્રવાલે પ્રેસ કોન્ફરન્સમાં જણાવ્યું હતું કે શંકરાચાર્યએ સ્નાન માટે અગાઉથી કોઈ સૂચના આપી ન હતી. તેમણે બે વાહનો માટે પરવાનગી માંગી હતી જે સુરક્ષાના કારણોસર નકારી કાઢવામાં આવી હતી. મેળા અધિકારી ઋષિ રાજે સ્પષ્ટ કર્યું કે ૨૦૨૨ના સુપ્રીમ કોર્ટના ચુકાદા મુજબ શંકરાચાર્યને કોઈ વિશેષ પ્રોટોકોલ આપવાની જોગવાઈ નથી. જો વહીવટીતંત્ર આવું કરે તો તે કોર્ટના આદેશનું ઉલ્લંઘન ગણાશે.
હાલમાં શંકરાચાર્ય સેક્ટર ૪ માં આવેલા તેમના શિબિરમાં ધરણા પર બેઠા છે. તેમના સ્વાસ્થ્યને લઈને શિષ્યોમાં ચિંતા છે, તો બીજી તરફ વહીવટીતંત્ર મક્કમ છે કે સુરક્ષા વ્યવસ્થામાં કોઈ બાંધછોડ કરવામાં આવશે નહીં. મૌની અમાવાસ્યાએ ૪૫.૨ મિલિયન લોકોના સફળ સ્નાન બાદ આ વિવાદે મેળાના વાતાવરણમાં ગરમાવો લાવી દીધો છે.
શંકરાચાર્ય પદની ગરિમા અને વહીવટી સુરક્ષા વ્યવસ્થા વચ્ચેના આ સંઘર્ષે શ્રદ્ધાળુઓમાં ચર્ચા જગાવી છે. હવે જોવાનું એ રહેશે કે વહીવટીતંત્ર શંકરાચાર્યને મનાવવામાં સફળ રહે છે કે વિવાદ વધુ વકરશે.