નવી દિલ્હી, તા. 20: ભારતીય ક્રિકેટ કંટ્રોલ બોર્ડ (BCCI) આગામી સમયમાં ભારતીય પુરુષ ક્રિકેટ ટીમના સેન્ટ્રલ કોન્ટ્રાક્ટ માળખામાં ધરખમ ફેરફારો કરવા જઈ રહ્યું છે. અજિત અગરકરની આગેવાની હેઠળની પસંદગી સમિતિએ ખેલાડીઓના વાર્ષિક રીટેનરશીપ કરાર માટે કેટલાક નવા પ્રસ્તાવો તૈયાર કર્યા છે, જેના પર આગામી એપેક્સ કાઉન્સિલની બેઠકમાં ગંભીર ચર્ચા વિચારણા કરવામાં આવશે.
શું 'A+' ગ્રેડનો ઈતિહાસ પૂરો થશે?
સૌથી મોટો અને મહત્વનો ફેરફાર 'A+' ગ્રેડ ને લઈને હોઈ શકે છે. સૂત્રોના જણાવ્યા અનુસાર, BCCI આ ટોચની શ્રેણીને તબક્કાવાર રીતે દૂર કરવાનું વિચારી રહ્યું છે. હાલમાં આ શ્રેણીમાં રહેલા ખેલાડીઓને વાર્ષિક ₹7 કરોડ મળે છે. જો આ શ્રેણી નાબૂદ થાય, તો રોહિત શર્મા, વિરાટ કોહલી અને જસપ્રીત બુમરાહ જેવા દિગ્ગજોના કોન્ટ્રાક્ટ ગ્રેડિંગમાં મોટો ફેરફાર જોવા મળી શકે છે. ખાસ કરીને જે ખેલાડીઓ હવે માત્ર મર્યાદિત ફોર્મેટ રમે છે, તેમના સ્તરમાં ફેરફાર થવાની પૂરેપૂરી શક્યતા છે.
વર્તમાન પગારનું માળખું
BCCI હાલમાં ખેલાડીઓને ચાર સ્તરમાં વહેંચે છે:
•    ગ્રેડ A+ : ₹7 કરોડ (રોહિત, કોહલી, બુમરાહ, જાડેજા)
•    ગ્રેડ A : ₹5 કરોડ (શુભમન ગિલ, ઋષભ પંત, હાર્દિક પંડ્યા વગેરે)
•    ગ્રેડ B : ₹3 કરોડ (સૂર્યકુમાર યાદવ, અક્ષર પટેલ વગેરે)
•    ગ્રેડ C : ₹1 કરોડ (રિંકુ સિંહ, તિલક વર્મા, હર્ષિત રાણા વગેરે)
નવા કપ્તાનો અને યુવા ખેલાડીઓનો વધશે દબદબો
નવા પ્રસ્તાવમાં શુભમન ગિલ (ટેસ્ટ અને ODI કેપ્ટન) અને સૂર્યકુમાર યાદવ (T20I કેપ્ટન) ને પ્રોમોશન મળી શકે છે. બીજી તરફ, ગ્રેડ-સીમાં રહેલા અભિષેક શર્મા, નીતિશ કુમાર રેડ્ડી અને વરુણ ચક્રવર્તી જેવા ખેલાડીઓના પ્રદર્શનને આધારે તેમને ગ્રેડ-બીમાં સ્થાન આપવા પર પણ વિચારણા ચાલી રહી છે.
કેમ લેવાઈ રહ્યો છે આ નિર્ણય?
બોર્ડના સૂત્રોનું કહેવું છે કે પસંદગી સમિતિ ટીમમાં ફોર્મેટ મુજબના સ્પેશિયલિસ્ટ ખેલાડીઓને પ્રોત્સાહન આપવા માંગે છે. એપેક્સ કાઉન્સિલની બેઠકની તારીખ ટૂંક સમયમાં જાહેર કરવામાં આવશે, જેમાં આ નાણાકીય અને માળખાગત ફેરફારો પર અંતિમ મહોર મારવામાં આવશે. આ ફેરફાર બાદ ભારતીય ક્રિકેટમાં એક નવા યુગની શરૂઆત થઈ શકે છે, જ્યાં પ્રદર્શન અને ઉપલબ્ધતાને વધુ પ્રાધાન્ય મળશે.