ન્યૂયોર્ક, તા. 20: વિશ્વના સૌથી શક્તિશાળી શેરબજાર એવા અમેરિકી બજાર (Wall Street) માં આજે મંગળવારે પ્રચંડ ઉથલપાથલ જોવા મળી છે. રાષ્ટ્રપતિ ડોનાલ્ડ ટ્રમ્પની તાજેતરની આક્રમક ટેરિફ જાહેરાતોએ વૈશ્વિક અર્થતંત્રમાં ડરનો માહોલ પેદા કર્યો છે. ટ્રેડિંગ શરૂ થાય તે પહેલા જ ડાઉ જોન્સ ફ્યુચર્સ (Dow Futures) માં 750 પોઈન્ટનો મોટો કડાકો બોલી ગયો છે, જેની સીધી અસર એશિયા અને યુરોપના બજારો પર પણ જોવા મળી રહી છે.
કેમ મચ્યો આ હાહાકાર?
ટ્રમ્પે સોશિયલ મીડિયા પ્લેટફોર્મ 'ટ્રુથ સોશિયલ' પર એક ધડાકો કરતા જાહેરાત કરી કે આઠ નાટો (NATO) સભ્ય દેશોમાંથી અમેરિકામાં આવતી આયાત પર ભારે ટેક્સ લાદવામાં આવશે.
•    નવો ટેક્સ સ્લેબ: 1 ફેબ્રુઆરીથી 10% ટેરિફ શરૂ થશે, જે 1 જૂન સુધીમાં વધીને 25% થઈ જશે.
•    ગ્રીનલેન્ડ કનેક્શન: ટ્રમ્પે આ કડક પગલાંને ગ્રીનલેન્ડ ખરીદવાના અમેરિકાના પ્રસ્તાવ સાથે જોડ્યા છે, જેણે આંતરરાષ્ટ્રીય રાજનીતિમાં ગરમાવો લાવી દીધો છે.
ફ્રાન્સ અને બ્રિટન પર પણ તવાઈ
ટ્રમ્પની આર્થિક સર્જિકલ સ્ટ્રાઈક અહીં જ નથી અટકી. તેમણે ફ્રેન્ચ વાઇન અને શેમ્પેન પર 200% ટેરિફ લાદવાની ધમકી આપી છે. આનું કારણ ફ્રાન્સના રાષ્ટ્રપતિ મેક્રોન દ્વારા ગાઝા શાંતિ બોર્ડમાં જોડાવાનો ઈનકાર હોવાનું મનાય છે. આ ઉપરાંત, બ્રિટન દ્વારા ચાગોસ ટાપુઓનું સાર્વભૌમત્વ મોરેશિયસને સોંપવાની યોજનાને પણ ટ્રમ્પે 'મૂર્ખતાપૂર્ણ' ગણાવી રાષ્ટ્રીય સુરક્ષાનો મુદ્દો ઉઠાવ્યો છે.
વૈશ્વિક બજારોની સ્થિતિ
અમેરિકી બજારની સાથે યુરોપિયન બજારોમાં પણ લોહીની નદીઓ વહી હોય તેવી સ્થિતિ છે:
•    Nasdaq Futures: લગભગ 500 પોઈન્ટનો ઘટાડો.
•    LVMH અને લક્ઝરી બ્રાન્ડ્સ: પેરિસમાં લિસ્ટેડ લક્ઝરી બ્રાન્ડ્સના શેરમાં 1.7% થી 2% સુધીનો ઘટાડો નોંધાયો છે.
•    ભારતીય બજાર પર અસર: વૈશ્વિક નકારાત્મક સંકેતોને કારણે ભારતીય શેરબજારમાં પણ રોકાણકારો સાવચેત જોવા મળી રહ્યા છે.
શું કહે છે નિષ્ણાતો?
યુરોપિયન યુનિયન હવે અમેરિકાના આ પગલાં સામે બદલાની કાર્યવાહી કરવાનું વિચારી રહ્યું છે. જો 'ટ્રેડ વોર' (વ્યાપાર યુદ્ધ) શરૂ થશે, તો તેની વિપરીત અસર આવનારા દિવસોમાં મોંઘવારી અને વૈશ્વિક સપ્લાય ચેઈન પર પડી શકે છે. રોકાણકારો અત્યારે સલામત આશરો શોધી રહ્યા છે, જેના કારણે બજારમાં ભારે વેચવાલી જોવા મળી રહી છે.