મુંબઈ, તા. 20: ભારતીય અર્થતંત્ર માટે ચિંતાજનક સમાચાર સામે આવ્યા છે. મંગળવારે અમેરિકી ડોલર સામે ભારતીય રૂપિયો 90.97ની અત્યાર સુધીની સૌથી નીચી સપાટીએ (All-time Low) બંધ થયો છે. ધાતુના આયાતકારો તરફથી ડોલરની ભારે માંગ અને ભારતીય બજારમાંથી વિદેશી ભંડોળના સતત બહાર જવાને કારણે રૂપિયાના મૂલ્યમાં 7 પૈસાનો ઘટાડો નોંધાયો છે.
બજારમાં ગભરાટનું વાતાવરણ
ફોરેક્સ માર્કેટના નિષ્ણાતોના જણાવ્યા મુજબ, વૈશ્વિક સ્તરે વધી રહેલી ભૂરાજકીય અનિશ્ચિતતા અને અમેરિકાના બદલાતા વલણને કારણે રોકાણકારો જોખમ લેવાનું ટાળી રહ્યા છે. ઇન્ટરબેંક ફોરેન એક્સચેન્જ પર રૂપિયો 90.91 પર ખુલ્યો હતો, પરંતુ વેચવાલીના દબાણને કારણે તે દિવસ દરમિયાન 91.06 સુધી ગગડી ગયો હતો. અગાઉ 16 ડિસેમ્બર, 2025ના રોજ રૂપિયો 91.14ના ઇન્ટ્રા-ડે સ્તરે પહોંચ્યો હતો, પરંતુ આજનો ક્લોઝિંગ રેટ ઇતિહાસમાં સૌથી નીચો છે.
શેરબજારના કડાકાની પણ પડી અસર
રૂપિયાના નબળા પડવા પાછળ સ્થાનિક શેરબજારની સુસ્તી પણ જવાબદાર છે. આજે સેન્સેક્સ 1,065 પોઈન્ટ અને નિફ્ટી 353 પોઈન્ટ તૂટ્યા હતા. વિદેશી સંસ્થાકીય રોકાણકારોએ (FII) માત્ર એક જ દિવસમાં ₹3,262 કરોડથી વધુના શેર વેચી નાખ્યા હતા, જેની સીધી અસર રૂપિયા પર પડી છે. જોકે, નિષ્ણાતો માને છે કે જો RBI (રિઝર્વ બેંક ઓફ ઇન્ડિયા) હસ્તક્ષેપ ન કર્યો હોત, તો રૂપિયો હજુ વધુ નીચે જઈ શક્યો હોત.
આગામી સમય કેવો રહેશે?
મિરે એસેટ શેરખાનના રિસર્ચ એનાલિસ્ટ અનુજ ચૌધરીના જણાવ્યા મુજબ, આગામી દિવસોમાં પણ રૂપિયો દબાણ હેઠળ રહી શકે છે. વેપાર વાટાઘાટો અંગેની અનિશ્ચિતતા અને વિદેશી મૂડીનું બહાર જવું રૂપિયા માટે મુશ્કેલી ઊભી કરશે. USD-INR નો સ્પોટ ભાવ નજીકના ભવિષ્યમાં 90.70 થી 91.25ની રેન્જમાં રહેવાની ધારણા છે.
બીજી તરફ, ડોલર ઇન્ડેક્સમાં 0.91 ટકાનો ઘટાડો થયો છે અને તે 98.48 પર ટ્રેડ કરી રહ્યો છે, જે રૂપિયા માટે થોડી રાહત આપી શકે છે. ક્રૂડ ઓઈલના ભાવ પણ બેરલ દીઠ 63.94 ડોલરની આસપાસ સ્થિર છે.