દહેરાદૂન:વિશ્વપ્રસિદ્ધ બદ્રીનાથ ધામના કપાટ ખુલવાની તારીખ જાણવા માટે દેશ-વિદેશના લાખો શ્રદ્ધાળુઓ આતુરતાથી રાહ જોઈ રહ્યા છે. આ વર્ષે ભગવાન બદ્રી વિશાલના દ્વાર કયા દિવસે અને કયા શુભ મુહૂર્તમાં ખુલશે, તેની સત્તાવાર જાહેરાત આગામી ૨૩ જાન્યુઆરી એટલે કે વસંત પંચમીના પવિત્ર દિવસે કરવામાં આવશે.
 દર વર્ષની પરંપરા મુજબ, તેહરી ગઢવાલના નરેન્દ્રનગર સ્થિત રાજમહેલમાં કપાટ ખોલવાનું મુહૂર્ત નક્કી કરવામાં આવશે. વસંત પંચમીના દિવસે સવારે રાજપુરોહિતો પંચાંગ ગણતરી કરશે અને તેહરીના મહારાજાની હાજરીમાં શુભ મુહૂર્ત જાહેર કરવામાં આવશે. આ પ્રસંગે બદ્રીનાથ-કેદારનાથ મંદિર સમિતિ (BKTC) ના પદાધિકારીઓ અને અધિકારીઓ પણ ઉપસ્થિત રહેશે.
 હિમાલયની કડકડતી ઠંડી અને હિમવર્ષાને કારણે શિયાળા દરમિયાન બદ્રીનાથ ધામના કપાટ બંધ રાખવામાં આવે છે. વસંત પંચમીના દિવસે માત્ર કપાટ ખુલવાની તારીખ જ નહીં, પરંતુ ભગવાન બદ્રીનાથના અભિષેક માટે વપરાતા 'ગાડુ ઘડા' (તેલ કળશ) યાત્રાનું શિડ્યુલ પણ નક્કી કરવામાં આવશે. આ તેલ કળશ યાત્રા યાત્રા શરૂ થવાના થોડા દિવસો પહેલા રાજમહેલથી બદ્રીનાથ ધામ માટે પ્રસ્થાન કરે છે.
ઉત્તરાખંડ સરકાર અને પ્રશાસન દ્વારા ચારધામ યાત્રા ૨૦૨૬ને લઈને અત્યારથી જ આયોજન શરૂ કરી દેવામાં આવ્યું છે. બદ્રીનાથ માસ્ટર પ્લાન હેઠળ થઈ રહેલા નિર્માણ કાર્યો અને રસ્તાઓની સુવિધા પર ખાસ ધ્યાન આપવામાં આવી રહ્યું છે. મુહૂર્ત જાહેર થયા બાદ યાત્રાળુઓ માટે ઓનલાઈન રજીસ્ટ્રેશનની પ્રક્રિયા પણ ટૂંક સમયમાં શરૂ કરવામાં આવશે.
ભક્તોમાં એવી માન્યતા છે કે બદ્રીનાથ ધામના દર્શન કરવાથી મોક્ષની પ્રાપ્તિ થાય છે. ગત વર્ષે પણ રેકોર્ડબ્રેક સંખ્યામાં ભક્તોએ દર્શન કર્યા હતા, જેને જોતા આ વર્ષે પણ મોટી સંખ્યામાં શ્રદ્ધાળુઓ ઉમટી પડે તેવી શક્યતા છે.