નવી દિલ્હી: દેશના સામાન્ય બજેટ 2026ની આતુરતાપૂર્વક રાહ જોવાઈ રહી છે અને હવે ગણતરીના માત્ર 10 દિવસ બાકી છે. નાણામંત્રી નિર્મલા સીતારમણ 1 ફેબ્રુઆરીએ સવારે 9 વાગ્યે તેમનું સતત 9મું બજેટ રજૂ કરશે. આ વખતે મધ્યમ વર્ગ અને પગારદાર વર્ગની નજર 'નવી કર વ્યવસ્થા' પર ટકેલી છે. સૂત્રોના જણાવ્યા અનુસાર, સરકાર કરદાતાઓને આકર્ષવા માટે મુક્તિ મર્યાદામાં વધારો કરી શકે છે અથવા આરોગ્ય વીમા જેવી કપાતનો સમાવેશ કરી શકે છે.
 આ વખતે બજેટના દિવસે એટલે કે 1 ફેબ્રુઆરીએ રવિવાર હોવા છતાં NSE અને BSE લાઇવ ટ્રેડિંગ માટે ખુલ્લા રહેશે. બજારના નિષ્ણાતો અપેક્ષા રાખી રહ્યા છે કે સરકાર લાંબા ગાળાના મૂડી લાભ (LTCG) ટેક્સમાં રાહત આપી શકે છે. જો મૂડી બજાર માટે સાનુકૂળ જાહેરાતો થશે, તો બજેટ પછી સેન્સેક્સ અને નિફ્ટીમાં ઐતિહાસિક તેજી જોવા મળી શકે છે. વિદેશી સંસ્થાકીય રોકાણકારો (FII) પણ ફરી ભારત તરફ વળે તેવી શક્યતા છે.
બજેટ 2025માં સરકારે ₹12 લાખ સુધીની આવકને કરમુક્ત બનાવી હતી, જેના કારણે 80% કરદાતાઓ નવી કર વ્યવસ્થામાં શિફ્ટ થયા છે. હવે બજેટ 2026માં સરકાર આ મર્યાદા વધારીને મધ્યમ વર્ગના હાથમાં વધુ રોકડ આપવાનું આયોજન કરી રહી છે. આ ઉપરાંત, નોકરિયાત વર્ગ માટે પીએફ (PF) ઉપાડ પરની ટેક્સ મુક્તિનો સમયગાળો 5 વર્ષથી ઘટાડીને 3 વર્ષ કરવાની વિચારણા પણ ચાલી રહી છે.
 રેલ્વે: વરિષ્ઠ નાગરિકોને ટ્રેન ટિકિટમાં મળતી જૂની છૂટછાટ ફરી શરૂ થઈ શકે છે.
 ઘર ખરીદનારાઓ માટે ₹45 લાખની પરવડે તેવા આવાસ (Affordable Housing) ની મર્યાદા વધારવાની માંગ છે.
 બાયો-ફર્ટિલાઇઝર પર GST ઘટાડવાની અને ટકાઉ ખેતી માટે PLI સ્કીમ લાવવાની અપેક્ષા છે.
હોસ્પિટાલિટી સેક્ટરને 'ઈન્ફ્રાસ્ટ્રક્ચર'નો દરજ્જો આપવાની માંગ કરવામાં આવી છે જેથી સસ્તી લોન મળી શકે.
આ વખતે બજેટ તૈયાર કરનારી ટીમમાં 'નાણા સચિવ'ની ગેરહાજરી એક મોટો પડકાર છે, છતાં સરકાર ફુગાવો અને વૈશ્વિક તણાવ વચ્ચે સંતુલિત બજેટ રજૂ કરવા માટે મક્કમ છે. 1 ફેબ્રુઆરીએ નિર્મલા સીતારમણનું 'બજેટ ભાષણ' નક્કી કરશે કે વર્ષ 2026માં ભારતીય અર્થતંત્રની ગતિ કેવી રહેશે.