જોધપુર : સોશિયલ મીડિયા પર અવારનવાર અનેક વીડિયો વાયરલ થતા હોય છે, પરંતુ કેટલીક ક્ષણો એવી હોય છે જે પથ્થર દિલના માણસને પણ રડાવી દે છે. હાલમાં રાજસ્થાનના જોધપુરની એક શાળાનો આવો જ એક ભાવનાત્મક વીડિયો ઈન્ટરનેટ પર તોફાન મચાવી રહ્યો છે. કેન્સર સામે જિંદગીની જંગ લડી રહેલી એક નાની બાળકીને જે રીતે તેના સહાધ્યાયીઓ અને શિક્ષકોએ સાથ આપ્યો છે, તે જોઈને આખું વિશ્વ તેમને સલામ કરી રહ્યું છે.
મિત્રની પીડા જોઈ આખો વર્ગ એક થયો
કેન્સર એક એવી બીમારી છે જે માણસને શારીરિક રીતે જ નહીં પણ માનસિક રીતે પણ તોડી નાખે છે. વાયરલ વીડિયો મુજબ, જોધપુરની એક શાળામાં ભણતી એક કિશોરીને કેન્સર થયું હતું. સારવાર દરમિયાન કીમોથેરાપીને કારણે તેના બધા જ વાળ ખરી ગયા હતા. વાળ વગરનો પોતાનો ચહેરો જોઈને તે બાળકી એટલી દુઃખી થઈ ગઈ હતી કે તે ડિપ્રેશનમાં સરી પડી હતી. પોતાની વહાલી સખીને આ રીતે નિરાશ જોઈને તેના મિત્રોથી રહેવાયું નહીં.
શિક્ષકો અને વિદ્યાર્થીઓએ કરાવી નાખ્યું મુંડન
પોતાની મિત્રને એવો અહેસાસ કરાવવા માટે કે "તે એકલી નથી", શાળાના તમામ બાળકો અને શિક્ષકોએ એક અત્યંત પ્રેરણાદાયી નિર્ણય લીધો. વીડિયોમાં જોઈ શકાય છે કે શાળાના નાના-નાના બાળકો પોતાની બેગ લઈને લાઈનમાં ઉભા છે અને તે દરેકના માથા મુંડાયેલા છે. એટલું જ નહીં, તેની મહિલા શિક્ષિકા અને અન્ય સ્ટાફે પણ પોતાના વાળ કપાવીને મુંડન કરાવી લીધું જેથી કેન્સર પીડિત બાળકીને પોતાનો વાળ વગરનો દેખાવ વિચિત્ર ન લાગે.
સોશિયલ મીડિયા પર પ્રતિક્રિયાઓનું પૂર
X (અગાઉનું ટ્વિટર) પર @gharkekalesh દ્વારા શેર કરાયેલા આ વીડિયો પર લોકો દિલ ખોલીને પ્રતિક્રિયા આપી રહ્યા છે.
•    એક યુઝરે લખ્યું, "આ વાસ્તવિક જીવનની 'ટપ્પુ સેના' છે, સાચી મિત્રતા આને જ કહેવાય." * અન્ય એક યુઝરે ભાવુક થઈને લખ્યું, "જ્યારે કોઈ જીવનની સૌથી અઘરી લડાઈ લડતું હોય, ત્યારે આવા નિઃસ્વાર્થ ટેકાની જ જરૂર હોય છે."
માનવતા અને સહાનુભૂતિનો આ કિસ્સો શીખવે છે કે દવા કરતા ક્યારેક વ્હાલ અને સાથની શક્તિ મોટી હોય છે. જોધપુરના આ બાળકોએ સાબિત કરી દીધું કે મિત્રતામાં માત્ર સુખ વહેંચવાનું હોતું નથી, પણ મિત્રના દુઃખમાં તેના જેવા બનીને ઉભા રહેવાનું હોય છે.