નવી દિલ્હી : આતંકવાદી સંગઠન લશ્કર-એ-તૈયબા (LeT) ફરી એકવાર ભારત અને દક્ષિણ એશિયાની શાંતિ હણવા માટે અત્યંત ઘાતક અને 'હાઇબ્રિડ' વ્યૂહરચના અપનાવી રહ્યું હોવાનું સામે આવ્યું છે. ટોચના ગુપ્તચર સૂત્રોના જણાવ્યા અનુસાર, લશ્કર હવે ૨૦૦૮ના મુંબઈ હુમલા પહેલાના તેના જૂના મોડેલ પર પરત ફરી રહ્યું છે, જેમાં તે રાજકીય અને સામાજિક પ્રવૃત્તિઓના આવરણ હેઠળ પોતાના આતંકવાદી નેટવર્કને મજબૂત કરી રહ્યું છે.
યુવાનોને નિશાન બનાવી 'નવી શક્તિ' ઊભી કરવાનો પ્રયાસ
લશ્કરના યુવા નેતા હરિસ ડારના તાજેતરના વિડિયોએ સુરક્ષા એજન્સીઓની ઊંઘ હરામ કરી દીધી છે. આ વિડિયોમાં તે સ્પષ્ટપણે સ્વીકારે છે કે સંગઠન હવે "યુવાનો પર ધ્યાન કેન્દ્રિત કરીને નવી શક્તિ" બનાવી રહ્યું છે. આ કાવતરાનો મુખ્ય હેતુ પાકિસ્તાનની દરેક 'યુનિયન કાઉન્સિલ' (સ્થાનિક વહીવટી એકમ) સ્તરે લશ્કરની હાજરી ઊભી કરવાનો છે. આ વ્યૂહરચના દ્વારા તેઓ સમાજમાં ભળી જઈને ભવિષ્યમાં મોટા હુમલાઓ માટે એક વિશાળ 'સ્લીપર ફોર્સ' તૈયાર કરી રહ્યા છે.
રાજકારણના મહોરા હેઠળ આતંકની ખેતી
આ 'હાઇબ્રિડ પુનરુત્થાન'નો સૌથી મોટો પાસો રાજકીય કાયદેસરતા મેળવવાનો છે. લશ્કર સમર્થિત સંગઠનો હવે ચૂંટણી પ્રક્રિયામાં ભાગ લઈ રહ્યા છે અને સ્થાનિક સ્તરે પક્ષો બનાવી રહ્યા છે. આનાથી તેમને તપાસ એજન્સીઓની નજરથી બચવામાં અને લોજિસ્ટિકલ સપોર્ટ (રહેવા-ખાવાની અને હથિયારોની વ્યવસ્થા) ઊભી કરવામાં સરળતા રહે છે. મસ્જિદોના નિર્માણ અને ધાર્મિક મેળાવડાઓના બહાને તેઓ સામાન્ય લોકોમાં પોતાની વિચારધારા ફેલાવી રહ્યા છે.
રમઝાન પહેલા આક્રમક ભરતી અભિયાન
ગુપ્તચર અહેવાલો સૂચવે છે કે આગામી રમઝાન માસ પહેલા લશ્કર તેના ભરતી અભિયાનને તેજ કરી રહ્યું છે. પાકિસ્તાનના બહાવલપુરમાં થયેલા તાજેતરના મેળાવડામાં આશરે ૨૦,૦૦૦ જેટલા સમર્થકો ઉમટ્યા હોવાનો દાવો કરવામાં આવ્યો છે. અહીં તેમને "નવી પેઢી" તરીકે તૈયાર કરી ભવિષ્યના 'જેહાદ' માટે સોગંદ લેવડાવવામાં આવ્યા છે.
પેન-ઇસ્લામિક એજન્ડા: કાશ્મીરથી બાંગ્લાદેશ સુધી
લશ્કર હવે માત્ર કાશ્મીર પૂરતું મર્યાદિત રહેવા માંગતું નથી. તે પોતાના વર્ણનને બદલીને "બાંગ્લાદેશી મુસ્લિમ ભાઈઓ" અને અન્ય પ્રાદેશિક મુદ્દાઓને જોડી રહ્યું છે. આ પેન-પ્રાદેશિક અભિગમ પાછળનો હેતુ મુસ્લિમ યુવાનોમાં પોતાની અપીલ વધારવાનો અને આંતરરાષ્ટ્રીય સ્તરે એક મોટી ઇસ્લામિક ચળવળ તરીકે ઉભરી આવવાનો છે.
ભારતીય સુરક્ષા એજન્સીઓ આ 'હાઇબ્રિડ' મોડેલ પર ચાંપતી નજર રાખી રહી છે, કારણ કે રાજકીય સક્રિયતાના મહોરા હેઠળ છુપાયેલો આતંક કોઈપણ ક્ષણે સરહદ પારથી મોટી મુસીબત બની શકે છે.