નવી દિલ્હી | તા.૨૧ : સમગ્ર ઉત્તર ભારતમાં હવામાનમાં પલટો આવવાની શક્યતા છે. ભારત હવામાન વિભાગ (IMD) એ જારી કરેલી તાજેતરની આગાહી મુજબ, આગામી ૨૪ કલાકમાં હિમાલયના પહાડી વિસ્તારોથી લઈને મેદાની રાજ્યો સુધી કુદરતનો પ્રકોપ જોવા મળી શકે છે. જમ્મુ-કાશ્મીર અને લદ્દાખમાં કરા સાથે ભારે વરસાદની આગાહી કરવામાં આવી છે, જેની અસર સમગ્ર ઉત્તર અને પશ્ચિમ ભારતના તાપમાન પર જોવા મળશે.
પહાડોમાં કરા અને મેદાનોમાં વાવાઝોડું
IMD અનુસાર, આવતીકાલે જમ્મુ, કાશ્મીર, લદ્દાખ તેમજ ગિલગિટ, બાલ્ટિસ્તાન અને મુઝફ્ફરાબાદના વિસ્તારોમાં ગાજવીજ સાથે વાવાઝોડું ફૂંકાશે અને કેટલાક સ્થળોએ કરા પણ પડી શકે છે. આ બદલાવને કારણે જનજીવન પ્રભાવિત થવાની શક્યતા છે. બીજી તરફ, રાષ્ટ્રીય રાજધાની દિલ્હી, પૂર્વ અને પશ્ચિમ રાજસ્થાન તેમજ હિમાચલ પ્રદેશમાં તેજ પવન અને વીજળીના કડાકા સાથે હળવાથી મધ્યમ વરસાદની સંભાવના છે.
ગાઢ ધુમ્મસને કારણે વિઝિબિલિટી ઘટશે
ઠંડીની સાથે હવે ધુમ્મસ પણ આફત બનીને આવી રહ્યું છે. હવામાન વિભાગે પંજાબ, હરિયાણા અને ચંદીગઢમાં આવતીકાલ સુધી સવાર અને રાત્રિના સમયે 'ગાઢ ધુમ્મસ' (Dense Fog) રહેવાની ચેતવણી આપી છે. આને કારણે હાઈવે પર વાહનવ્યવહાર અને ટ્રેન સેવાઓ ખોરવાઈ શકે છે. વાહન ચાલકોને સાવચેતી રાખવા અને હેડલાઇટ ચાલુ રાખવાની સલાહ આપવામાં આવી છે.
રાજસ્થાનમાં પલટાતી અસર: ગુજરાત પર શું થશે અસર?
રાજસ્થાનમાં તેજ પવન અને વાવાઝોડાની આગાહીને કારણે પડોશી રાજ્ય હોવાથી ગુજરાતના સરહદી વિસ્તારોમાં પણ ઠંડા પવનો ફૂંકાવાની અને વાદળછાયું વાતાવરણ રહેવાની શક્યતા છે. ખાસ કરીને વહેલી સવારે ગુલાબી ઠંડીનો અનુભવ થશે.
હવામાન વિભાગની સૂચના: માછીમારો અને ખેડૂતોને વીજળીના કડાકા અને તેજ પવન દરમિયાન ખુલ્લા મેદાનમાં ન જવા અને સુરક્ષિત સ્થળે રહેવા અપીલ કરવામાં આવી છે.