ચેન્નાઈ : તમિલનાડુ વિધાનસભા ચૂંટણી ૨૦૨૬ના બ્યુગલ વાગી રહ્યા છે ત્યારે રાજ્યના રાજકારણમાં એક મોટો વળાંક આવ્યો છે. અમ્મા મક્કલ મુનેત્ર કઝગમ (AMMK) ના સુપ્રીમો ટીટીવી દિનાકરણે આજે સત્તાવાર જાહેરાત કરી છે કે તેમની પાર્ટી ફરી એકવાર રાષ્ટ્રીય લોકશાહી જોડાણ (NDA) એટલે કે ભાજપના કેમ્પમાં જોડાઈ ગઈ છે. ચેન્નાઈમાં કેન્દ્રીય મંત્રી પીયૂષ ગોયલ સાથેની બેઠક બાદ લેવાયેલા આ નિર્ણયથી તમિલનાડુમાં વિપક્ષી ગઠબંધન વધુ મજબૂત બન્યું છે.
ગઈકાલના વિવાદો ભૂલી 'અમ્મા'ના શાસન માટે એકતા
દિનાકરણે પત્રકાર પરિષદમાં ભાવુક અંદાજમાં જણાવ્યું કે, “ભૂતકાળમાં ભલે અમારા ભાજપ સાથે મતભેદો રહ્યા હોય, પરંતુ અત્યારે તમિલનાડુના લોકોના હિત માટે અને ‘અમ્મા’ (જયલલિતા) ની કાર્યશૈલી પાછી લાવવા માટે આપણે સાથે આવવું જરૂરી છે.” તેમણે વધુમાં ઉમેર્યું કે ડીએમકે સરકારના શાસનને ઉથલાવવા માટે વિપક્ષી મતોનું વિભાજન રોકવું એ સમયની માંગ છે.
દક્ષિણ તમિલનાડુમાં ભાજપને મળશે મોટો ફાયદો
રાજકીય વિશ્લેષકો માને છે કે ટીટીવી દિનાકરણનો પ્રભાવ ખાસ કરીને દક્ષિણ તમિલનાડુના જિલ્લાઓમાં ખૂબ વધારે છે. AMMK ના એનડીએમાં આવવાથી:
•    મતોનું વિભાજન અટકશે: AIADMK અને AMMK ના મતો અલગ પડવાને બદલે હવે એકસાથે ભાજપના ગઠબંધનને મજબૂત કરશે.
•    ડીએમકે સામે સીધી ટક્કર: પીયૂષ ગોયલે જણાવ્યું કે આ જોડાણ ડીએમકે-કોંગ્રેસ ગઠબંધનની જનવિરોધી નીતિઓ સામે 'લોકો-કેન્દ્રિત રાજકારણ' લાવશે.
2026ની જંગ: નવા ખેલાડીઓ અને મોદીની એન્ટ્રી
આ ગઠબંધન એવા સમયે થયું છે જ્યારે તમિલનાડુના સુપરસ્ટાર વિજયે પણ પોતાની નવી પાર્ટી ‘ટીવીકે’ લોન્ચ કરીને મેદાનમાં ઝંપલાવ્યું છે. આ મલ્ટી-કોર્નર જંગ વચ્ચે વડાપ્રધાન નરેન્દ્ર મોદી આગામી ૨૩ જાન્યુઆરીએ ચેંગલપટ્ટુમાં એક વિશાળ રેલીને સંબોધિત કરવાના છે, જે એનડીએના ચૂંટણી પ્રચારના શ્રીગણેશ માનવામાં આવશે.
તમિલનાડુની ધરતી પર ‘ભગવો’ અને ‘દ્રવિડિયન’ રાજકારણના આ સંગમથી આગામી ચૂંટણીનો જંગ અત્યંત રોમાંચક બનવાની પૂરેપૂરી સંભાવના છે.