પ્રયાગરાજ : ઉત્તર પ્રદેશના પ્રયાગરાજમાં આજે બપોરના સમયે ભારતીય વાયુસેના (IAF) નું એક માઇક્રોલાઇટ વિમાન દુર્ઘટનાગ્રસ્ત થયું હતું. સદનસીબે, આ ગંભીર અકસ્માતમાં વિમાનમાં સવાર બંને પાઇલટો સુરક્ષિત રીતે બહાર નીકળવામાં સફળ રહ્યા છે. આ ઘટના શહેરથી લગભગ ૧૨ કિમી દૂર આવેલી કેપી કોલેજ નજીક એક જળાશયમાં બની હતી.
 
શું બની હતી સમગ્ર ઘટના?
બુધવારે બપોરે આશરે ૧૨ વાગ્યાની આસપાસ જ્યારે વાયુસેનાનું આ નાનું વિમાન તેની નિયમિત ઉડાન પર હતું, ત્યારે અચાનક ટેકનિકલ ખામી સર્જાઈ હતી. વિમાન કાબૂ બહાર જઈને સીધું જળાશયમાં ખાબક્યું હતું. વિમાન પાણીમાં પડતા જ જોરદાર અવાજ આવ્યો હતો, જેના કારણે આસપાસના ગ્રામજનો અને કોલેજના વિદ્યાર્થીઓમાં ગભરાટ ફેલાઈ ગયો હતો.
સ્થાનિકો બન્યા દેવદૂત
ધડાકો સાંભળીને નજીકના ખેતરોમાં કામ કરતા લોકો અને રહીશો તાત્કાલિક જળાશય તરફ દોડી આવ્યા હતા. વાયુસેનાના અધિકારીઓ પહોંચે તે પહેલા જ સ્થાનિક લોકોએ હિંમત બતાવી પાણીમાં કૂદીને બંને પાઇલટોને સુરક્ષિત રીતે બહાર કાઢ્યા હતા. પ્રાથમિક તપાસ મુજબ, બંને પાઇલટોને કોઈ ગંભીર ઈજા થઈ નથી અને તેમની હાલત સ્થિર છે.
 
વાયુસેના દ્વારા તપાસના આદેશ
ઘટનાની જાણ થતા જ IAF ના ઉચ્ચ અધિકારીઓ અને બચાવ દળ ઘટનાસ્થળે પહોંચી ગયા હતા. વાયુસેનાએ આ ક્રેશના ચોક્કસ કારણો જાણવા માટે તપાસના આદેશ આપ્યા છે. શું આ એન્જિન ફેલ્યોર હતું કે અન્ય કોઈ ટેકનિકલ ખામી, તે તપાસ બાદ જ સ્પષ્ટ થશે.
 
અગાઉની દુર્ઘટનાની યાદ તાજી થઈ
આ ઘટનાએ ગયા વર્ષે ૨૧ નવેમ્બરના રોજ દુબઈ એર શો દરમિયાન થયેલા તેજસ વિમાન ક્રેશની કડવી યાદો તાજી કરી દીધી છે. તે દુર્ઘટનામાં વિંગ કમાન્ડર નમાશ સ્યાલનું દુઃખદ અવસાન થયું હતું. તેની સરખામણીએ આજની ઘટનામાં પાઇલટોના જીવ બચી જવાથી વાયુસેનાએ રાહતનો શ્વાસ લીધો છે.
જળાશયમાંથી વિમાનના કાટમાળને બહાર કાઢવાની કામગીરી અત્યારે ચાલુ છે અને સુરક્ષાના ભાગરૂપે વિસ્તારને સીલ કરી દેવામાં આવ્યો છે.