મોસ્કો: અમેરિકાના રાષ્ટ્રપતિ ડોનાલ્ડ ટ્રમ્પ દ્વારા વિશ્વના વિવિધ દેશો પર લાદવામાં આવેલા આકરા ટેરિફ અને આર્થિક દબાણ વચ્ચે રશિયાએ એક મોટું રાજદ્વારી પગલું ભર્યું છે. રશિયાના વિદેશ મંત્રી સર્ગેઈ લાપરોવે બુધવારે જાહેરાત કરી છે કે હવે સમય આવી ગયો છે કે RIC (રશિયા-ભારત-ચીન) ગઠબંધનને ફરીથી સક્રિય કરવામાં આવે. લાપરોવના મતે, અમેરિકાની આર્થિક 'દાદાગીરી' અને ટેરિફ વોરનો સામનો કરવા માટે એશિયાની આ ત્રણ મોટી શક્તિઓએ એક છત્ર નીચે આવવું અનિવાર્ય છે.
રશિયા ઈચ્છે છે કે ભારત અને ચીન વચ્ચેના સરહદી વિવાદોને બાજુ પર રાખીને બંને દેશો રશિયા સાથે મળીને એક મજબૂત આર્થિક અને સુરક્ષા મોરચો બનાવે.
ડોલરનો પ્રભાવ ઘટાડવો: આ પ્લાન હેઠળ ત્રણેય દેશો પોતાની સ્થાનિક કરન્સીમાં વેપાર વધારવા અને ડોલર પરની નિર્ભરતા ઘટાડવા પર ભાર મૂકશે.
મલ્ટીપોલર વર્લ્ડ: વિશ્વ હવે માત્ર અમેરિકાના ઈશારે ન ચાલે અને સત્તાના વિવિધ કેન્દ્રો (Multi-polar world) બને તેવો રશિયાનો મુખ્ય ઉદ્દેશ્ય છે.
ડોનાલ્ડ ટ્રમ્પે સત્તા સંભાળતાની સાથે જ 'ટેરિફ વોર' છેડ્યું છે, જેના કારણે ભારતીય શેરબજારથી લઈને યુરોપિયન અર્થતંત્ર સુધી ખળભળાટ મચ્યો છે. જો રશિયાના આહવાન પર ભારત અને ચીન આર્થિક મોરચે એક થઈ જાય, તો અમેરિકા માટે એશિયન માર્કેટમાં ટકી રહેવું મુશ્કેલ બની શકે છે. રશિયાએ સ્પષ્ટ કહ્યું છે કે અમેરિકાની 'અક્કડ' ઢીલી કરવા માટે આ ગઠબંધન સૌથી શક્તિશાળી હથિયાર સાબિત થશે.
ભારત માટે પડકાર અને તક: ભારત માટે આ પરિસ્થિતિ 'બેધારી તલવાર' સમાન છે. એક તરફ ચીન સાથેના જૂના વિવાદો છે અને બીજી તરફ અમેરિકાની ટેરિફ નીતિઓથી થતું આર્થિક નુકસાન. જોકે, નિષ્ણાતો માને છે કે વડાપ્રધાન નરેન્દ્રભાઈ  મોદીની 'ચાણક્ય નીતિ' ભારતને આ સંકટમાં પણ વિશ્વગુરુ તરીકે સ્થાપિત કરી શકે છે. ભારત પોતાની રાષ્ટ્રીય સુરક્ષા અને આર્થિક હિતોને સર્વોપરી રાખીને આ ગઠબંધન અંગે નિર્ણય લેશે.