મુંબઈ: આંતરરાષ્ટ્રીય ક્રિકેટ કાઉન્સિલ (આઈસીસી) એ ટી૨૦ વર્લ્ડ કપ ૨૦૨૬માં બાંગ્લાદેશની ભાગીદારી અંગે ઐતિહાસિક અને કડક નિર્ણય લીધો છે. જય શાહની આગેવાની હેઠળ મળેલી આઈસીસીની બેઠકમાં બાંગ્લાદેશ ક્રિકેટ બોર્ડને સ્પષ્ટ અલ્ટીમેટમ આપવામાં આવ્યું છે કે તેઓ કાં તો ભારતમાં રમવા માટે સહમત થાય અથવા ટુર્નામેન્ટમાંથી બહાર થવા તૈયાર રહે. આ પ્રસ્તાવ ૧૪-૨ ની બહુમતીથી પસાર થયો છે અને જો બાંગ્લાદેશ પીછેહઠ નહીં કરે તો સ્કોટલેન્ડ તેમનું સ્થાન લેશે.

આંતરરાષ્ટ્રીય ક્રિકેટ જગતમાં આજે એક મોટી ઉથલપાથલ મચી ગઈ છે. આઈસીસી ટી૨૦ વર્લ્ડ કપ ૨૦૨૬ના આયોજન અને બાંગ્લાદેશની ભાગીદારીને લઈને ચાલી રહેલા વિવાદમાં આઈસીસીએ અંતે લાલ આંખ કરી છે. આઈસીસીના ચેરમેન જય શાહની અધ્યક્ષતામાં મળેલી બોર્ડની તાકીદની બેઠકમાં બાંગ્લાદેશ ક્રિકેટ બોર્ડ (બીસીબી) ને સ્પષ્ટ ચેતવણી આપવામાં આવી છે. આ બેઠકમાં લેવાયેલા નિર્ણય મુજબ, જો બાંગ્લાદેશ ક્રિકેટ ટીમ ભારતમાં આવીને રમવા માટે ઇનકાર કરશે, તો તેમને ટુર્નામેન્ટમાંથી તાત્કાલિક અસરથી દૂર કરવામાં આવશે અને તેમના સ્થાને સ્કોટલેન્ડની ટીમનો સમાવેશ કરવામાં આવશે.
૧૪-૨ વોટથી પ્રસ્તાવ પસાર: આઈસીસીની આ હાઈ-પ્રોફાઈલ બેઠકમાં તમામ સભ્ય દેશોના પ્રતિનિધિઓ હાજર રહ્યા હતા. સુત્રોના જણાવ્યા અનુસાર, બાંગ્લાદેશને ભારતમાં રમવાની ફરજ પાડતા પ્રસ્તાવ પર મતદાન કરવામાં આવ્યું હતું, જેમાં ૧૪ સભ્યોએ આ નિર્ણયની તરફેણમાં મત આપ્યો હતો, જ્યારે માત્ર ૨ મત આ પ્રસ્તાવની વિરુદ્ધમાં પડ્યા હતા. માનવામાં આવે છે કે વિરોધમાં મત આપનારા બે દેશોમાં એક બાંગ્લાદેશ પોતે અને બીજું પાકિસ્તાન હોઈ શકે છે. આ પ્રચંડ બહુમતીથી લેવાયેલા નિર્ણયે સ્પષ્ટ કરી દીધું છે કે ક્રિકેટ જગત હવે બાંગ્લાદેશની 'સુરક્ષાના બહાના' વાળી દલીલો સાંભળવા તૈયાર નથી.
બાંગ્લાદેશ પાસે હવે માત્ર બે જ વિકલ્પ: રમો અથવા છોડો: આઈસીસીએ બાંગ્લાદેશ ક્રિકેટ બોર્ડને નિર્ણય લેવા માટે માત્ર ૨૪ કલાકનો સમય આપ્યો છે. આ સમયગાળામાં બીસીબીએ તેમની સરકાર સાથે મસલત કરીને આઈસીસીને અંતિમ નિર્ણય જણાવવાનો રહેશે. તેમની પાસે માત્ર બે જ વિકલ્પો છે:
૧. નિર્ધારિત કાર્યક્રમ મુજબ ભારતમાં આવીને મેચ રમવી.
૨. ટુર્નામેન્ટમાંથી બહાર નીકળી જવું (ફોરફિટ કરવું).
જો બાંગ્લાદેશ ૨૪ કલાકમાં હકારાત્મક જવાબ નહીં આપે, તો આઈસીસી આપમેળે જ સ્કોટલેન્ડને વર્લ્ડ કપ માટે ક્વોલિફાય થયેલી ટીમ જાહેર કરી દેશે. રેન્કિંગના આધારે સ્કોટલેન્ડ આ સ્થાન માટે સૌથી પ્રબળ દાવેદાર છે.
સુરક્ષાના કારણો માત્ર એક બહાનું: ઉલ્લેખનીય છે કે, છેલ્લા કેટલાક સમયથી બાંગ્લાદેશ ક્રિકેટ બોર્ડ ભારતમાં રમવા સામે સુરક્ષાના કારણો આગળ ધરી રહ્યું હતું અને તેમની મેચો અન્ય કોઈ તટસ્થ સ્થળે ખસેડવાની માંગ કરી રહ્યું હતું. જોકે, આઈસીસી દ્વારા કરાવવામાં આવેલા સ્વતંત્ર સુરક્ષા ઓડિટમાં સ્પષ્ટ થયું હતું કે ભારતમાં ખેલાડીઓને કોઈ પણ પ્રકારનો ખતરો નથી અને સુરક્ષા વ્યવસ્થા અભૂતપૂર્વ છે. આ રિપોર્ટના આધારે જય શાહ અને આઈસીસી મેનેજમેન્ટ વેન્યુ બદલવાની માંગને ફગાવી દીધી હતી.
ઘણા ક્રિકેટ વિશ્લેષકોનું માનવું છે કે બાંગ્લાદેશના આ વલણ પાછળ રાજકીય કારણો અને તાજેતરમાં આઈપીએલ સંબંધિત થયેલા વિવાદો જવાબદાર હોઈ શકે છે. પરંતુ આઈસીસીએ સ્પષ્ટ સંદેશ આપ્યો છે કે રમતને રાજકારણથી અલગ રાખવી જોઈએ અને કોઈ પણ એક દેશની મનમાની ચલાવી લેવામાં આવશે નહીં.
સ્કોટલેન્ડ માટે ખુશીના સમાચાર: બાંગ્લાદેશના આ અક્કડ વલણનો સીધો ફાયદો સ્કોટલેન્ડને થતો દેખાઈ રહ્યો છે. યુરોપિયન ક્વોલિફાયર્સમાં સારા પ્રદર્શન છતાં વર્લ્ડ કપમાં સ્થાન મેળવવાથી વંચિત રહેલી સ્કોટલેન્ડની ટીમ હવે અચાનક ટુર્નામેન્ટમાં પ્રવેશ મેળવવાની તૈયારીમાં છે. જો બાંગ્લાદેશ પીછેહઠ નહીં કરે તો સ્કોટલેન્ડની ટીમ ભારત આવશે અને ગ્રુપ રાઉન્ડની મેચો રમશે.
હવે આગામી ૨૪ કલાકમાં બાંગ્લાદેશ શું નિર્ણય લે છે તેના પર સમગ્ર ક્રિકેટ જગતની નજર મંડાયેલી છે. પરંતુ એક વાત નિશ્ચિત છે કે જય શાહના નેતૃત્વમાં આઈસીસીએ કડક નિર્ણયો લેવાની પોતાની ક્ષમતા સાબિત કરી દીધી છે.