છેલ્લા 8 દિવસમાં સૌથી લોકપ્રિય હેં...વારાણસીમાં ભાજપનો પરાજય 9:51 AM
ટ્રમ્પે એક વર્ષમાં $૧.૪૦ બિલિયન ઘરભેગાં કર્યાઃ વગનો ભરપૂર ઉપયોગ કર્યો
અમેરિકાના પ્રેસિડેન્ટે સત્તાનો પૂરેપૂરો ઉપયોગ કરી પોતાના અનેક કામ કઢાવીને ક્રિપ્ટોથી લઈ રિયલ એસ્ટેટમાં તગડી કમાણી કરીઃ ન્યૂયોર્ક ટાઈમ્સે પોતાના એક એનાલિસિસમાં ચોંકાવનારો દાવો કર્યો : ટ્રમ્પ ઓર્ગેનાઈઝેશન હાલ અલગ-અલગ દેશોમાં ૨૦ જેટલા પ્રોજેક્ટ્સ પર કામ કરી રહ્યું છેઃ આ પ્રોજેક્ટ્સમાં ઓમાનમાં એક વૈભવી હોટેલ, ઈન્ડિયામાં બની રહેલા ઓફિસ ટાવર, સાઉદી અરેબિયાના ગોલ્ફ કોર્સનો સમાવેશ થાય છે
ન્યૂયોર્ક,તા.૨૨: દુનિયાના સૌથી વગદાર માણસ ગણાતા અમેરિકાના પ્રેસિડેન્ટ ડોનલ્ડ ટ્રમ્પ શું પોતાને મળેલી સત્તાનો ઉપયોગ ખિસ્સા ભરવા માટે કરી રહ્યા છે? ટ્રમ્પની સેકન્ડ ટર્મને એક વર્ષ પૂરું થઈ ગયું છે ત્યારે ન્યૂયોર્ક ટાઈમ્સે પોતાના એક એનાલિસિસમાં ચોંકાવનારો દાવો કરતા જણાવ્યું છે કે ટ્રમ્પ માત્ર એક જ વર્ષમાં ૧.૪૦ બિલિયન ડોલરની કમાણી કરી ચૂક્યા છે અને તેના માટે તેમણે પોતાની વગનો થાય તેટલો ઉપયોગ કર્યો છે.
ન્યૂયોર્ક ટાઈમ્સના એડિટોરિયલ બોર્ડ દ્વારા ટ્રમ્પે મેળવેલા આર્થિક લાભોની માહિતી આપતા અલગ-અલગ રિપોર્ટ્સનું એનાલિસિસ કરીને ૧.૪૦ બિલિયન ડોલરના આર્થિક લાભનો અંદાજ વ્યક્ત કર્યો છે. જોકે, સાથે જ અખબારે એવું પણ કહ્યું છે કે આ આંકડો પ્રેસિડેન્ટને થયેલી વાસ્તવિક કમાણીથી ઘણો ઓછો હોઈ શકે છે અને આવનારા દિવસોમાં આ કમાણી વધતી રહે તેવી પણ શક્યતા છે. ટ્રમ્પે કઈ રીતે પોતાની ખુરશીનો ઉપયોગ કરીને આ કમાણી કરી છે તેની તમામ વિગતો સમજીશું આ આર્ટિકલમાં.
ટ્રમ્પ ઓર્ગેનાઈઝેશન હાલ અલગ-અલગ દેશોમાં ૨૦ જેટલા પ્રોજેક્ટ્સ પર કામ કરી રહ્યું છે. આ પ્રોજેક્ટ્સમાં ઓમાનમાં એક વૈભવી હોટેલ, ઈન્ડિયામાં બની રહેલા ઓફિસ ટાવર, સાઉદી અરેબિયાના ગોલ્ફ કોર્સનો સમાવેશ થાય છે. આ તમામ પ્રોજેક્ટ્સમાં જે-તે દેશની સરકારનો સહયોગ જરૂરી હતો અને આ ડીલ્સમાં ટ્રમ્પને મિલિયન્સ ઓફ ડોલર્સનો આર્થિક ફાયદો થયો હોવાની શક્યતા રોઈટર્સના એક રિપોર્ટમાં વ્યક્ત કરવામાં આવી હતી.
કેટલીકવાર તો કદાચ પોતાનું અંગત કામ કઢાવવા માટે ટ્રમ્પે આ દેશોને ટેરિફની ધમકી પણ આપી હતી, જેમકે વિયેતનામમાં ૧.૫ બિલિયન ડોલરના ગોલ્ફ કોમ્પ્લેક્સના પ્રોજેક્ટને ક્લીયર કરાયો તેના એક મહિના બાદ ટ્રમ્પ વિયેતનામ પર ટેરિફ ઘટાડવા માટે તૈયાર થઈ ગયા હતા.
એવું નથી કે ટ્રમ્પ ઓર્ગેનાઈઝેશન માત્ર બિલ્ડિંગો ઉભી કરીને જ ડોલર્સ કમાય છે, પોતાના નામનો ઉપયોગ કરીને પણ ટ્રમ્પ કોઈ કલ્પના ના કરી શકે તેવી રીતે કમાણી કરવામાં હોંશિયાર છે. જેમકે, એમેઝોને ટ્રમ્પના પત્ની મિલાનિયા ટ્રમ્પ પર ડોક્યુમેન્ટ્રી બનાવવા માટેના રાઈટ્સ મેળવવા માટે ૨૮ મિલિયન ડોલર ચૂકવ્યા છે. આમાં રસપ્રદ વાત એ છે કે એમેઝોને ક્યારેય આવા કોઈ પ્રોજેક્ટ માટે આટલી મોટી રકમ કોઈનેય નથી ચૂકવી તેવું ધી વોલ સ્ટ્રીટ જર્નલના એક રિપોર્ટમાં જણાવાયું હતું.
ટ્રમ્પની જેમ એમેઝોનના ચેરમેન તેમજ દુનિયાના સૌથી ધનવાન લોકોમાંના એક જેફ બેઝોસ પણ પાક્કા વેપારી માણસ છે. ટ્રમ્પની પત્ની પર ડોક્યુમેન્ટરી બનાવવા માટે ૨૮ મિલિયન ચૂકવનારી એમેઝોન પ્રેસિડેન્ટને ખુશ કરીને અનેક કામો કઢાવી શકે તેમ છે. જેમકે, એન્ટીટ્રસ્ટ રેગ્યુલેશનથી લઈને ડીફેન્સ કોન્ટ્રાક્ટ અને તેની સ્પેસ કંપની બ્લૂ ઓરિજિન ફેડરલ કોન્ટ્રાક્ટ્સ મેળવીને ૨૮ મિલિયન ડોલરના બદલામાં ઘણો વધારે ફાયદો મેળવી શકે તેમ છે. આ ઉપરાંત જેફ બેસોઝની માલિકીના અમેરિકન અખબાર વોશિગ્ટન પોસ્ટ પર પણ ટ્રમ્પની ચાપલૂસી કરવાના આક્ષેપ થતા રહ્યા છે.
ટ્રમ્પ પ્રેસિડેન્ટ બન્યા ત્યારબાદ તેમણે અનેક ટેક્રોલોજી અને મીડિયા કંપનીઓ સામે લાલ આંખ કરી તેમની સામે મસમોટા દાવા માંડી મિલિયન્સ ઓફ ડોલર્સમાં સમાધાન કર્યું હતું. આ કંપનીઓમાં એક્સ, એબીસી ન્યૂઝ, મેટા, યૂટ્યૂબ અને પેરામાઉન્ટનો સમાવેશ થાય છે. જોકે, ટ્રમ્પને તગડી રકમ ચૂકવી તેમની સામે કયા કારણોસર સમાધાન કરવામાં આવ્યું છે તેને લગતી કોઈ સ્પષ્ટતા આ કંપનીઓએ નહોતી કરી.
જેમકે, પેરામાઉન્ટ પર ટ્રમ્પે ૨૦૨૪માં કમલા હેરિસનો એડિટેડ ઈન્ટરવ્યુ પબ્લિશ કરવા જેવા ફાલતુ કારણસર દાવો માંડ્યો હતો જેમાં તેમણે ૧૬ મિલિયન ડોલર લઈને સમાધાન પણ કરી લીધું હતું. આ સમાધાન થયું તેના ત્રણ જ વીકમાં ફેડરલ કોમ્યુનિકેશન્સ કમિશને પેરામાઉન્ટ અને સ્કાયડાન્સના આઠ બિલિયન ડોલરના મર્જરને મંજૂરી આપી દીધી હતી.
અમેરિકાના પ્રેસિડેન્ટ પોતાને જ એક બ્રાન્ડ માને છે અને પોતાના નામનો તે ભરપૂર ફાયદો કઈ રીતે ઉઠાવવો તે પણ સારી રીતે જાણે છે. જોકે, બિઝનેસ અને લોસ્યૂટ્સ દ્વારા કમાણી કરવાની સાથે-સાથે ડોનલ્ડ ટ્રમ્પને મોંઘીદાટ ગિફટ્સ મેળવવાનું પણ ખૂબ જ પસંદ છે. તેમણે ૨૦૨૫માં જ કતાર પાસેથી ૪૦૦ મિલિયન ડોલરનું એક લક્ઝુરિયસ પ્રાઈવેટ જેટ ગિફટ તરીકે સ્વીકાર્યું હતું, આ પ્લેનને સરકારી ખર્ચે એર ફોર્સ વનમાં કન્વર્ટ કરવામાં આવશે અને ટ્રમ્પ વ્હાઈટ હાઉસમાંથી વિદાય લીધા બાદ આ પ્લેનને પોતાની પાસે જ રાખવાની પણ ફિરાકમાં છે.
આ બધા સિવાય ટ્રમ્પે ક્રિપ્ટોકરન્સીમાં પણ જોરદાર કમાણી કરી છે. રોઈટર્સના એક રિપોર્ટ અનુસાર ફેડરલ પોલિસીને ઈન્ફલ્યુઅન્સ કરવા માગતા અમેરિકન્સ કે પછી વિદેશીઓ ટ્રમ્પની ફેમિલી દ્વારા લોન્ચ કરાયેલા ક્રિપ્ટો કોઈન્સ ખરીદી શકે છે અને આવી જેટલી પણ ડીલ થાય છે તેની કોઈ વિગતો જાહેર કરવામાં નથી આવતી.
આવી એક બે બિલિયન ડોલરની ડીલની માહિતી બહાર આવી હતી જેમાં શ્ખ્ચ્ની ઈન્વેસ્ટમેન્ટ ફર્મે ટ્રમ્પ ફેમિલીની ક્રિપ્ટોકરન્સીમાં આ રોકાણ કરવાના પ્લાનની જાહેરાત કરી હતી અને તેના બે વીક પહેલા જ ટ્રમ્પે આ કંપનીને ખાસ પ્રકારની એડવાન્સ ચિપ્સનો એક્સેસ આપ્યો હતો. ફળ્વ્નું કહેવું છે કે ટ્રમ્પ ફેમિલી ક્રિપ્ટો કરન્સીના ધંધામાં જ ઼૮૬૭ મિલિયનની કમાણી કરી ચૂક્યું છે.
અમેરિકાના કોઈપણ પ્રેસિડેન્ટે અત્યારસુધી પબ્લિક સર્વિસના નામે પોતાના ખિસ્સા ભરવાનું ટાળ્યું છે, પણ ટ્રમ્પ તેમાં અપવાદ છે. ૧૯૫૩માં જ્યારે પ્રેસિડેન્ટ હેરી ટ્રુમેને વ્હાઈટ હાઉસમાંથી વિદાય લીધી ત્યારે તેમની પાસે પોતાની માલિકીની કાર પણ નહોતી. તે વખતે તે પોતાના પત્ની સાથે ટ્રેનમાં મિસૌરી ગયા હતા અને પોતાને મળતા આર્મી પેન્શનમાંથી બાકીની જિદગી વિતાવી હતી.
પ્રેસિડેન્ટ બન્યા બાદ તેમણે કોઈ પ્રકારની જોબ લેવાનો પણ ઈનકાર કરી દીધો હતો કારણકે તેઓ પોતાની વગ અંગત હિત માટે વાપરવા નહોતા માગતા. જોકે, ડોનલ્ડ ટ્રમ્પ પોતાને ગિફટમાં મળેલું ઼૪૦૦ મિલિયન ડોલરનું પ્લેન સાથે લઈ જવા માગે છે.
ટ્રમ્પ અમેરિકાના અત્યારસુધીના સૌથી ધનવાન પ્રેસિડેન્ટ છે. તેમણે સેકન્ડ ટર્મની શરૂઆત કરી ત્યારે તેમની પાસે રિયલ એસ્ટેટ હોલ્ડિંગ્સનો વિશાળ પોર્ટફોલિયો હતો અને સોશિયલ મીડિયા કંપનીમાં પણ તે સ્ટેક ધરાવતા હતા. તેમના આ બંને બિઝનેસને તેમની પ્રેસિડેન્સીથી ફાયદો થયો છે. અમેરિકામાં હાલ જોબ્સની તંગી છે, દેશની આર્થિક હાલત પણ ઠીક નથી, દેવું વધી રહ્યું છે તેમજ અફોર્ડેબિલિટી ક્રાઈસિસ પણ ઘેરી બની રહી છે. જોકે, આ બધી સમસ્યાઓ વચ્ચે પણ પ્રેસિડેન્ટે એક જ વર્ષમાં ૧.૪૦ અબજ ડોલરથી પણ વધારેનો કહેવાતો આર્થિક ફાયદો મેળવી લીધો છે.
ગુજરાતીમાં એક કહેવત છે, જેનો રાજા વેપારી તેની પ્રજા ભીખારી. અત્યારસુધી અમેરિકા આમાંથી અપવાદ હતું પણ પોતાને વેપારી તરીકે ઓળખાવવામાં ગર્વ અનુભવતા ટ્રમ્પને વોટ આપનારા લોકોએ એવું માન્યું હતું કે ટ્રમ્પ તેમની દરેક સમસ્યાઓનો ઉકેલ લાવી દેશે, પણ હાલ એવું કંઈ થતું હોય તેવું દેખાઈ નથી રહ્યું.
(10:32 AM IST)
