છેલ્લા 8 દિવસમાં સૌથી લોકપ્રિય હેં...વારાણસીમાં ભાજપનો પરાજય 9:51 AM
૧૯૮૪ના શીખ વિરોધી રમખાણો કેસમાં સજ્જન કુમારને મોટી રાહતઃ નિર્દોષ જાહેર
દિલ્હીની કોર્ટે જનકપુરી અને વિકાસપુરી વિસ્તાર હિંસા મામલે આરોપ મુક્ત જાહેર કર્યા
નવી દિલ્હી, તા.૨૨: ૧૯૮૪ના શીખ વિરોધી રમખાણો સંબંધિત કેસમાં સજ્જન કુમારને મોટી રાહત મળી છે. ૧૯૮૪ના શીખ વિરોધી રમખાણો દરમિયાન રાજધાનીના જનકપુરી અને વિકાસપુરી વિસ્તારોમાં ફાટી નીકળેલી હિંસા સંબંધિત કેસમાં દિલ્હીની એક કોર્ટે તેમને નિર્દોષ જાહેર કર્યા છે. સજ્જન કુમાર કોંગ્રેસના ભૂતપૂર્વ સાંસદ હતા. સ્પેશિયલ જજ દિગ્વિજય સિંહે તેમને મૌખિક રીતે ટૂંકા આદેશમાં નિર્દોષ જાહેર કર્યા.
જ્યારે કોર્ટે કોંગ્રેસના ભૂતપૂર્વ સાંસદ સજ્જન કુમારને જાણ કરી કે તેમને ૧૯૮૪ના શીખ વિરોધી રમખાણો સંબંધિત કેસમાં નિર્દોષ જાહેર કરવામાં આવ્યા છે, ત્યારે સજ્જન કુમારે હાથ જોડીને કોર્ટનો આભાર માન્યો. ઓગસ્ટ ૨૦૨૩માં, એક કોર્ટે સજ્જન કુમાર પર રમખાણો અને દુશ્મનાવટને પ્રોત્સાહન આપવાનો આરોપ મૂકયો હતો, પરંતુ તેમને હત્યા અને ગુનાહિત કાવતરાના આરોપમાંથી મુક્ત કર્યા હતા. ગયા વર્ષે ડિસેમ્બરમાં કેસમાં સુનાવણી પૂર્ણ કર્યા પછી, ખાસ જજ દિગ્વિજય સિંહે ૨૨ જાન્યુઆરી માટે પોતાનો ચુકાદો અનામત રાખ્યો હતો.
ફેબ્રુઆરી ૨૦૧૫ માં, દિલ્હીના જનકપુરી અને વિકાસપુરીમાં રમખાણો દરમિયાન થયેલી હિંસા સંબંધિત ફરિયાદોના આધારે એક ખાસ તપાસ ટીમે કુમાર વિરુદ્ધ બે FIR નોંધી હતી. પહેલી FIR જનકપુરીમાં થયેલી હિંસા સંબંધિત હતી, જ્યાં ૧ નવેમ્બર, ૧૯૮૪ ના રોજ સોહન સિંહ અને તેમના જમાઈ અવતાર સિંહની હત્યા કરવામાં આવી હતી. બીજી FIR ગુરબચન સિંહના કેસમાં દાખલ કરવામાં આવી હતી, જેમને ૨ નવેમ્બર, ૧૯૮૪ ના રોજ વિકાસપુરીમાં જીવતા સળગાવી દેવામાં આવ્યા હતા.
સજ્જન કુમાર હાલમાં જેલમાં છે. ગયા વર્ષે ૨૫ ફેબ્રુઆરીના રોજ, એક ટ્રાયલ કોર્ટે તેમને ૧ નવેમ્બર, ૧૯૮૪ ના રોજ સરસ્વતી વિહાર વિસ્તારમાં જસવંત સિંહ અને તેમના પુત્ર તરણદીપ સિંહની હત્યા બદલ આજીવન કેદની સજા ફટકારી હતી. કોર્ટે જણાવ્યું હતું કે આ કેસમાં બે નિર્દોષ વ્યક્તિઓની હત્યા કોઈ નાનો ગુનો નહોતો, પરંતુ તે દુર્લભમાં દુર્લભ કેસ પણ નહોતો જેમાં મળત્યુદંડની સજાની જરૂર હતી.
ટ્રાયલ કોર્ટે એમ પણ જણાવ્યું હતું કે આ કેસ એ જ ઘટનાનો ભાગ હતો અને તેને એ જ ઘટનાના સિલસિલા તરીકે જોઈ શકાય છે જેના માટે ૧૭ ડિસેમ્બર, ૨૦૧૮ ના રોજ દિલ્હી હાઈકોર્ટ દ્વારા સજ્જન કુમારને આજીવન કેદની સજા ફટકારવામાં આવી હતી. હાઈકોર્ટે તેમને ભૂતપૂર્વ વડા પ્રધાન ઈન્દિરા ગાંધીની હત્યા બાદ પાલમ કોલોની વિસ્તારમાં થયેલા સમાન રમખાણો દરમિયાન પાંચ લોકોના મોત માટે દોષિત ઠેરવ્યા હતા. (રર.૨૦)
(3:27 PM IST)
