હરિદ્વાર: દેવભૂમિ ઉત્તરાખંડના પવિત્ર હરિદ્વાર ખાતે આજે એક દૈવી વાતાવરણ જોવા મળ્યું હતું. ગાયત્રી પરિવાર દ્વારા આયોજિત શતાબ્દી વર્ષ સમારોહ અને 'અખંડ જ્યોતિ સંમેલન'માં કેન્દ્રીય ગૃહ અને સહકાર મંત્રી અમિતભાઇ શાહે હાજરી આપી હતી. હજારો શ્રદ્ધાળુઓની હાજરીમાં તેમણે આ મહોત્સવને શ્રદ્ધા, આધ્યાત્મિકતા અને ભારતીય સંસ્કૃતિનો અનોખો ત્રિવેણી સંગમ ગણાવ્યો હતો.
સપ્તર્ષિઓની તપસ્યા ભૂમિને વંદન
પોતાના સંબોધનની શરૂઆતમાં અમિતભાઇ શાહે હરિદ્વારને યાદ કરતા કહ્યું કે, "આ પવિત્ર કુંભ ક્ષેત્ર સપ્તર્ષિઓની તપસ્યાની ભૂમિ છે. આ દૈવી ધરા પર સંતોએ પોતાની આધ્યાત્મિક શક્તિથી માત્ર પોતાનો ઉદ્ધાર નથી કર્યો, પરંતુ કરોડો લોકોને સન્માર્ગે ચાલવાની પ્રેરણા આપી છે." તેમણે ઉમેર્યું કે આ સમારોહમાં ઉપસ્થિત રહીને તેઓ પોતે એક શાશ્વત ઉર્જા અને દૈવી ચેતનાનો અનુભવ કરી રહ્યા છે.
પંડિત શ્રીરામ શર્મા આચાર્યનું વિઝન
ગાયત્રી પરિવારના સ્થાપક પંડિત શ્રીરામ શર્મા આચાર્ય અને વંદનીય માતાજીને યાદ કરતા ગૃહમંત્રીએ જણાવ્યું કે, તેમણે ગાયત્રી મંત્રની ઉર્જાને જન-જન સુધી પહોંચાડીને માનવતાનું મોટું કાર્ય કર્યું છે. શાહે ભારપૂર્વક કહ્યું કે, "આચાર્યજીએ વ્યક્તિગત ચારિત્ર્ય નિર્માણનો જે વિચાર આપ્યો હતો, તે જ આજે સંસ્કૃતિના પુનરુત્થાનનો મુખ્ય માર્ગ બન્યો છે."
સ્વાસ્થ્ય સેવામાં નવું સીમાચિહ્ન: પતંજલિ હોસ્પિટલનું ઉદ્ઘાટન
ગાયત્રી પરિવારના કાર્યક્રમ અગાઉ, અમિતભાઇ શાહે હરિદ્વારમાં જ પતંજલિ ઇમરજન્સી અને ક્રિટિકલ કેર હોસ્પિટલનું ઉદ્ઘાટન કર્યું હતું. યોગગુરુ બાબા રામદેવ અને આચાર્ય બાલકૃષ્ણની ઉપસ્થિતિમાં આ અત્યાધુનિક હોસ્પિટલ જનતાને સમર્પિત કરવામાં આવી હતી. આ પ્રસંગે ઉત્તરાખંડના મુખ્યમંત્રી પુષ્કર સિંહ ધામી પણ હાજર રહ્યા હતા. ગૃહમંત્રીએ આધુનિક તબીબી ટેકનોલોજી અને આયુર્વેદના સમન્વયથી લોકોની સેવા કરવાના પતંજલિના પ્રયાસોની પ્રશંસા કરી હતી.
આ મુલાકાત દરમિયાન અમિતભાઇ શાહે ઉત્તરાખંડમાં ચાલી રહેલા વિવિધ વિકાસ કાર્યોની સમીક્ષા પણ કરી હતી અને રાજ્યની સુરક્ષા વ્યવસ્થા અંગે અધિકારીઓ સાથે ચર્ચા કરી હતી.