મોસ્કો: રશિયાના રાષ્ટ્રપતિ વ્લાદિમીર પુતિને અમેરિકી રાષ્ટ્રપતિ ડોનાલ્ડ ટ્રમ્પના ‘ગાઝા શાંતિ બોર્ડ’ના પ્રસ્તાવ પર એક મોટું અને વ્યૂહાત્મક નિવેદન આપ્યું છે. પુતિને જાહેરાત કરી છે કે રશિયા આ શાંતિ પરિષદમાં જોડાવા માટે તૈયાર છે અને તેના ‘સભ્યપદ ફી’ (Membership Fee) તરીકે ૧ અબજ ડોલર (આશરે $1 Billion) આપવા પણ રાજી છે. જોકે, આ રકમ તે હશે જે અગાઉના અમેરિકી વહીવટીતંત્ર દ્વારા ‘ફ્રીઝ’ એટલે કે સ્થિર કરવામાં આવી હતી.
ટ્રમ્પના પ્રસ્તાવનો સકારાત્મક પ્રતિસાદ
એક ટેલિવિઝન ઇન્ટરવ્યુમાં પુતિને કહ્યું કે, "અમે આંતરરાષ્ટ્રીય સ્થિરતા માટેના કોઈપણ પ્રયાસોને સમર્થન આપીએ છીએ. અમેરિકાના રાષ્ટ્રપતિ તરફથી અમને આ અંગે વ્યક્તિગત સંદેશ મળ્યો હતો અને અમે તેનો આભાર માનીએ છીએ." પુતિને ખાસ કરીને પેલેસ્ટિનિયન લોકો સાથે રશિયાના ઐતિહાસિક સંબંધોનો ઉલ્લેખ કરીને આ શાંતિ પ્રક્રિયામાં ભાગ લેવાની ઉત્સુકતા બતાવી છે.
રશિયન સંપત્તિનો દાવ
નોંધનીય છે કે ૨૦૨૨માં યુક્રેન યુદ્ધ શરૂ થયા બાદ અમેરિકા અને પશ્ચિમી દેશોએ રશિયાની આશરે ૩૦૦ અબજ ડોલરની સંપત્તિ ફ્રીઝ કરી દીધી હતી. તેમાંથી અમેરિકામાં આશરે ૪ થી ૫ અબજ ડોલર છે. પુતિને અત્યંત ચતુરાઈ પૂર્વક આ જ ફસાયેલા નાણાંમાંથી ૧ અબજ ડોલર શાંતિ પરિષદને આપવાની ઓફર કરી છે. જો ટ્રમ્પ આ ઓફર સ્વીકારે છે, તો તેનો અર્થ એ થશે કે અમેરિકાએ રશિયા પરના આર્થિક પ્રતિબંધોમાં ઢીલ આપવી પડશે.
યુક્રેન મુદ્દે પણ નરમ વલણ?
શાંતિ પરિષદ ઉપરાંત પુતિને યુક્રેન અંગે પણ મહત્વની વાત કહી છે. તેમણે સંકેત આપ્યો કે જો કિવ (યુક્રેન) સાથે કોઈ કાયમી શાંતિ સંધિ થાય છે, તો રશિયા પોતાની સ્થિર થયેલી સંપત્તિનો ઉપયોગ યુદ્ધગ્રસ્ત યુક્રેનના પુનર્નિર્માણ માટે કરવા પણ તૈયાર છે. આ નિવેદનથી વિશ્વભરના રાજદ્વારીઓમાં નવી ચર્ચા છેડાઈ છે કે શું ટ્રમ્પ અને પુતિન મળીને યુક્રેન યુદ્ધનો અંત લાવી શકશે?
ટ્રમ્પના દૂતો મોસ્કોની મુલાકાતે
આ ગતિવિધિઓ એવા સમયે થઈ રહી છે જ્યારે ટ્રમ્પના ખાસ દૂત સ્ટીવ વિટકોફ અને જેરેડ કુશનર મોસ્કો જઈને વ્લાદિમીર પુતિન સાથે સીધી મુલાકાત કરે તેવી શક્યતા છે. આ મુલાકાત બાદ ગાઝા અને યુક્રેન બંને મોરચે વિશ્વને કોઈ મોટી જાહેરાત જોવા મળી શકે છે.