વોશિંગ્ટન : યુનાઇટેડ સ્ટેટ્સમાં નાગરિકતા મેળવીને સ્થાયી થયેલા લોકો માટે હવે મુશ્કેલીઓ વધી શકે છે. એક નવા વિવાદાસ્પદ બિલ દ્વારા સરકાર એવી સત્તાઓ મેળવવાનો પ્રયાસ કરી રહી છે જેનાથી 'નેચરલાઈઝ્ડ' (બીજા દેશમાંથી આવીને અમેરિકન બનેલા) નાગરિકોની નાગરિકતા રદ કરવી પહેલા કરતા ઘણી સરળ બની જશે. મિઝોરીના રિપબ્લિકન સેનેટર એરિક શ્મિટ દ્વારા રજૂ કરાયેલા આ બિલને ‘SCAM (Stop Citizenship Abuse and Misrepresentation) Act’ નામ આપવામાં આવ્યું છે.
શા માટે લવાયો આ કાયદો?
સેનેટર શ્મિટના જણાવ્યા અનુસાર, અમેરિકન નાગરિકતા એક વિશેષાધિકાર છે અને તાજેતરમાં સામે આવેલા અનેક છેતરપિંડીના કિસ્સાઓએ સિસ્ટમની નબળાઈઓ ખુલ્લી પાડી છે. ખાસ કરીને મિનેસોટામાં થયેલા ૨૫૦ મિલિયન ડોલરના 'ચિલ્ડ્રન ન્યુટ્રિશન' કૌભાંડનો હવાલો આપવામાં આવ્યો છે, જેમાં ઘણા નેચરલાઈઝ્ડ નાગરિકો સામેલ હતા. સરકારની દલીલ છે કે જો કોઈ વ્યક્તિ નાગરિક બન્યાના ટૂંકા ગાળામાં ગંભીર ગુના કરે છે, તો તેનો અર્થ એ છે કે તેણે નાગરિકતા મેળવતી વખતે જ ખોટું બોલીને પોતાની અસલી ઓળખ છુપાવી હતી.
નવા બિલની મુખ્ય જોગવાઈઓ:
•    ૧૦ વર્ષની ડેડલાઇન: જો નાગરિકતા મેળવ્યાના ૧૦ વર્ષની અંદર કોઈ ગંભીર ગુનાહિત દોષિત ઠરે, તો તેને નાગરિકતા રદ કરવા માટે મજબૂત પુરાવો ગણવામાં આવશે.
•    આધારનો વિસ્તાર: કલ્યાણકારી યોજનાઓમાં છેતરપિંડી, આતંકવાદી સંગઠનો સાથે જોડાણ, જાસૂસી અથવા હિંસક ગુનાઓ કરનારની નાગરિકતા તુરંત છીનવી શકાશે.
•    દેશનિકાલની સત્તા: નાગરિકતા રદ થયા બાદ વ્યક્તિને તાત્કાલિક અમેરિકામાંથી કાઢી મૂકવાની જોગવાઈ પણ આ બિલમાં છે.
વ્હાઇટ હાઉસ અને સ્ટીફન મિલરનું સમર્થન
ટ્રમ્પ પ્રશાસનના પ્રભાવશાળી સલાહકાર સ્ટીફન મિલરે આ બિલને સમર્થન આપતા કહ્યું છે કે જે ઈમિગ્રન્ટ્સ અમેરિકા સામે છેતરપિંડી કરે છે, તેમને અહીં રહેવાનો કોઈ હક નથી. જોકે, ઈમિગ્રેશન એક્ટિવિસ્ટ્સ અને વિરોધ પક્ષોએ ચેતવણી આપી છે કે આ કાયદાના દુરુપયોગથી નિર્દોષ ઈમિગ્રન્ટ સમુદાયોમાં ભયનું વાતાવરણ પેદા થશે અને નાગરિકતાની પવિત્રતા જોખમાશે.
ભારતીયો પર શું થશે અસર?
અમેરિકામાં ભારતીય મૂળના લાખો લોકો 'નેચરલાઈઝ્ડ' નાગરિકો છે. જો આ કાયદો પસાર થાય છે, તો નાગરિકતા મેળવવાની પ્રક્રિયામાં થયેલી નાની ભૂલ કે નાગરિક બન્યા પછીના કાયદાકીય પ્રશ્નો ભવિષ્યમાં મોટી મુસીબત બની શકે છે. વોશિંગ્ટનમાં આ બિલ પર હાલમાં ઉગ્ર રાજકીય ચર્ચા ચાલી રહી છે.