તિરુવનંતપુરમ: વડાપ્રધાન નરેન્દ્ર મોદીએ આજે કેરળના તિરુવનંતપુરમમાં એક વિશાળ જનસભાને સંબોધતા વિરોધીઓ અને સોશિયલ મીડિયા પર થતી ટીકાઓનો જડબાતોડ જવાબ આપ્યો છે. એક નાના બાળકે વડાપ્રધાનનું સુંદર ચિત્ર દોરીને તેમને ભેટ આપ્યું, ત્યારે પીએમ મોદીએ ભાવુક થઈને કહ્યું કે જનતાનો આ પ્રેમ જ તેમની સાચી શક્તિ છે, ભલે દુનિયા તેને 'પૂર્વ-આયોજિત' કહેતી હોય.
 
"હું અપમાન સહન કરીશ, પણ બાળકોને નિરાશ નહીં કરું"
પીએમ મોદીએ કાર્યકર્તાઓને સંબોધતા જણાવ્યું કે, "જ્યારે પણ હું દેશના ખૂણેખૂણે જાઉં છું, ત્યારે યુવાનો અને બાળકો આ રીતે ચિત્રો કે ભેટ આપીને પોતાનો પ્રેમ વ્યક્ત કરે છે. પરંતુ ત્યારબાદ સોશિયલ મીડિયા પર રીલ્સ બનાવવામાં આવે છે અને આ ક્ષણોને 'નાટક' અથવા 'સ્ક્રિપ્ટેડ' ગણાવી મારું અપમાન કરવામાં આવે છે. હું આ બધું સહન કરી લઉં છું કારણ કે હું એ બાળકની મહેનત અને લાગણીને સમજું છું. હું રીલ્સ બનાવનારાઓનું અપમાન સ્વીકારીશ, પણ કોઈ બાળકના પ્રેમને ઠુકરાવીને તેને નિરાશ નહીં કરી શકું."
બાળકને આપ્યું ખાસ વચન
પોતાનું ચિત્ર બનાવનાર તે નાના છોકરાથી પીએમ મોદી એટલા પ્રભાવિત થયા કે તેમણે જાહેરમાં જ તેને એક ખાસ સૂચના આપી. વડાપ્રધાને કહ્યું, "બેટા, આ ચિત્રની પાછળ તારું નામ અને સરનામું લખી દેજે, હું તને વ્યક્તિગત રીતે પત્ર લખીશ." તેમણે પોતાની સુરક્ષામાં તૈનાત SPG જવાનોને પણ સૂચના આપી કે તે બાળકના ચિત્રને અત્યંત સાવધાનીપૂર્વક સ્વીકારી લેવામાં આવે.
લોકો સાથેનો સંબંધ વધુ મજબૂત થશે
મોદીએ વધુમાં ઉમેર્યું કે ભલે ગમે તેટલી નકારાત્મક રીલ્સ બને, તેનાથી લોકોની તેમના પ્રત્યેની લાગણીઓ ઘટવાને બદલે વધુ મજબૂત થશે. તિરુવનંતપુરમના પુથારીકંડમ મેદાનમાં ઉમટેલી હજારોની મેદનીએ વડાપ્રધાનના આ નિવેદનને તાળીઓના ગડગડાટથી વધાવી લીધું હતું.
વડાપ્રધાનનો અંદાજ: રાજકીય આક્ષેપો વચ્ચે પીએમ મોદીનો આ માનવીય અભિગમ ફરી એકવાર ચર્ચાનો વિષય બન્યો છે. જનતા સાથે સીધો સંવાદ કરવાની તેમની આ કળા જ તેમને અન્યોથી અલગ પાડે છે.