નવી દિલ્હી: ભારત અને અમેરિકા વચ્ચે ચાલી રહેલા 'વેપાર યુદ્ધ' ની અસર હવે ભારતના રાજકારણમાં સ્પષ્ટપણે જોવા મળી રહી છે. કોંગ્રેસ નેતા રાહુલ ગાંધીએ ડોનાલ્ડ ટ્રમ્પના ‘ડેડ ઇકોનોમી’ વાળા નિવેદનને ટાંકીને કેન્દ્ર સરકાર પર આકરા પ્રહાર કર્યા, તો સામા પક્ષે ભાજપે પણ 'બેટા' (પુત્ર) શબ્દનો ઉપયોગ કરીને રાહુલ ગાંધીને વળતો જવાબ આપ્યો છે. આ વિવાદે દેશના આર્થિક અને રાજકીય માહોલમાં ગરમાવો લાવી દીધો છે.
 
રાહુલ ગાંધીના સવાલ: ૪.૫ કરોડ નોકરીઓ જોખમમાં?
રાહુલ ગાંધીએ સોશિયલ મીડિયા પ્લેટફોર્મ X પર પોસ્ટ કરીને વડાપ્રધાન મોદીને ઘેર્યા હતા. તેમણે કહ્યું કે, અમેરિકા દ્વારા ભારતીય માલ પર લાદવામાં આવેલા ૫૦% ટેરિફને કારણે ટેક્સટાઇલ (કાપડ) ઉદ્યોગ બરબાદ થઈ રહ્યો છે. ગાંધીએ આરોપ લગાવ્યો કે, "ફેક્ટરીઓ બંધ થઈ રહી છે અને ઓર્ડર ઘટી રહ્યા છે, જે આપણી 'મૃત અર્થવ્યવસ્થા'ની વાસ્તવિકતા છે. મોદીજી, ૪.૫ કરોડ નોકરીઓ દાવ પર છે, તમે મૌન કેમ છો?"
ભાજપનો પલટવાર: ‘બેટા’ સાથે સમસ્યા છે!
રાહુલ ગાંધીની ટીકાઓનો જવાબ આપતા ભાજપના પ્રવક્તા શહેઝાદ પૂનાવાલાએ તીખો કટાક્ષ કર્યો હતો. તેમણે કહ્યું કે, "ભારતના ડેટા સાથે કોઈ સમસ્યા નથી, સમસ્યા કોંગ્રેસના ‘બેટા’ (રાહુલ ગાંધી) સાથે છે, જે હંમેશા ભારત વિરુદ્ધ એજન્ડા ચલાવે છે." પૂનાવાલાએ IMF (ઇન્ટરનેશનલ મોનેટરી ફંડ) ના આંકડા ટાંકીને જણાવ્યું કે ભારત ૨૦૨૫ માં ૭.૩% ના દરે વૃદ્ધિ કરી રહ્યું છે અને તે વિશ્વનું ગ્રોથ એન્જિન છે.
IMF ના આંકડા વિરુદ્ધ રાજકીય આક્ષેપો
એકતરફ રાહુલ ગાંધી અમેરિકા સાથેના વેપાર તણાવને કારણે અર્થતંત્ર ડૂબી રહ્યું હોવાનો દાવો કરી રહ્યા છે, તો બીજી તરફ ભાજપ આંતરરાષ્ટ્રીય એજન્સીઓના રિપોર્ટ બતાવી રહ્યું છે. IMF મુજબ, યુએસ ટેરિફના દબાણ છતાં ભારતનો વિકાસ દર અપેક્ષા કરતાં મજબૂત રહ્યો છે. ભાજપે સવાલ ઉઠાવ્યો કે જ્યારે દુનિયા ભારતને ચોથું સૌથી મોટું અર્થતંત્ર માને છે, ત્યારે રાહુલ ગાંધી તેને 'ડેડ' કેમ કહી રહ્યા છે?
વિશ્લેષણ: ડોનાલ્ડ ટ્રમ્પની રક્ષણવાદી નીતિઓ અને રશિયા પાસેથી તેલ ખરીદવા બદલ ભારત પર લદાયેલા દંડને કારણે ભારત-અમેરિકા સંબંધો અત્યારે કસોટીની એરણે છે. આ વૈશ્વિક ખેંચતાણ હવે ભારતમાં ‘ડેટા vs બેટા’ ના જંગમાં ફેરવાઈ ગઈ છે.