મુંબઈ : મુંબઈ મહાનગરપાલિકા (BMC) ની ચૂંટણી બાદ હવે મેયર કોનો બનશે તે અંગે રસાકસી જામી છે. આ દરમિયાન મહારાષ્ટ્ર નવનિર્માણ સેના (MNS) ના પ્રમુખ રાજ ઠાકરેએ સોશિયલ મીડિયા પ્લેટફોર્મ 'X' પર કરેલી એક પોસ્ટને કારણે મહારાષ્ટ્રના રાજકારણમાં ખળભળાટ મચી ગયો છે. શિવસેના સ્થાપક બાળાસાહેબ ઠાકરેની ૧૦૦મી જન્મજયંતિ પર શ્રદ્ધાંજલિ આપતા રાજ ઠાકરેએ જે શબ્દો વાપર્યા છે, તેનાથી પિતરાઈ ભાઈ ઉદ્ધવ ઠાકરેની છાવણીમાં ચિંતા વધી ગઈ છે.

શું છે રાજ ઠાકરેની એ 'રહસ્યમય' પોસ્ટ?

રાજ ઠાકરેએ પોતાની પોસ્ટમાં લખ્યું કે, "જો મારે ક્યારેક થોડું લવચીક વલણ (Flexible Stance) અપનાવવું પડે, તો પણ તે મારા વ્યક્તિગત લાભ કે સ્વાર્થ માટે ક્યારેય નહીં હોય." તેમણે બાળાસાહેબના સમયના રાજકારણ અને આજના બદલાયેલા તકવાદી રાજકારણની સરખામણી કરતા જણાવ્યું કે, મરાઠી ભાષા અને લોકો માટેની તેમની લડાઈ અકબંધ રહેશે. રાજકીય વિશ્લેષકો આ 'લવચીક વલણ' ને આગામી BMC મેયરની ચૂંટણીમાં ભાજપ અને એકનાથ શિંદે જૂથને ટેકો આપવાના સંકેત તરીકે જોઈ રહ્યા છે.

KDMC માં 'ટ્રેલર' બતાવ્યું, હવે BMC માં 'ફિલ્મ'?

નોંધનીય છે કે બે દિવસ પહેલા જ કલ્યાણ-ડોંબિવલી મ્યુનિસિપલ કોર્પોરેશન (KDMC) માં મનસેના ૫ કોર્પોરેટરોએ એકનાથ શિંદેની શિવસેનાને ટેકો જાહેર કરીને સૌને ચોંકાવી દીધા હતા. આ નિર્ણયથી ઉદ્ધવ ઠાકરેની શિવસેના (UBT) ને મોટો ફટકો પડ્યો છે, કારણ કે ચૂંટણીમાં બંને ભાઈઓએ સાથે મળીને મેદાન માર્યું હતું. હવે મુંબઈમાં પણ જો મનસે ભાજપ-શિંદે ગઠબંધન (મહાયુતિ) તરફ ઝુકે છે, તો ઉદ્ધવ ઠાકરે માટે BMC નો ગઢ બચાવવો મુશ્કેલ બની જશે.

BMC ચૂંટણી ૨૦૨૬ના પરિણામો પર એક નજર

૧૫ જાન્યુઆરી, ૨૦૨૬ના રોજ યોજાયેલી ૨૨૭ બેઠકોની BMC ચૂંટણીમાં કોઈપણ પક્ષને સ્પષ્ટ બહુમતી મળી નથી, પરંતુ ભાજપ સૌથી મોટા પક્ષ તરીકે ઉભરી આવ્યો છે:

• ભાજપ: ૮૯ બેઠકો
• શિવસેના (UBT): ૬૫ બેઠકો
• શિવસેના (શિંદે જૂથ): ૨૯ બેઠકો
• કોંગ્રેસ: ૨૪ બેઠકો
• મનસે: ૬ બેઠકો

ભાજપ અને શિંદે જૂથ પાસે મળીને ૧૧૮ બેઠકો છે, જે બહુમતીના આંકડા (૧૧૪) થી વધુ છે. જોકે, મેયર પદ માટે શિંદે જૂથ અને ભાજપ વચ્ચે પણ આંતરિક ખેંચતાણ હોવાનું મનાય છે, જેમાં રાજ ઠાકરેના ૬ કોર્પોરેટરો 'કિંગમેકર' ની ભૂમિકા ભજવી શકે છે.

ઠાકરે વર્સિસ ઠાકરે: ૨૦ વર્ષ બાદ એક થયેલા બે ભાઈઓ વચ્ચે ફરીથી તિરાડ પડવાની સંભાવના છે. રાજ ઠાકરેનો આ "લવચીક વલણ" મુંબઈના રાજકારણમાં નવો વળાંક લાવી શકે છે.